بینو جوشی بی بی سی اردو ڈاٹ کام، جموں

	لاشوں اور زخمیوں کو نزدیکی ہسپتال منتقل کر دیا گیا

پولیس کے مطابق یہ حادثہ اس وقت پیش آیا جب جموں سے سری نگر جانے والی مسافر بس بے قابو ہو کر گہری کھائی میں جا گری۔

زخمی مسافروں کو نزدیکی ہسپتال میں داخل کروا دیا گیا ہے جن میں سے بعض مسافروں کی حالت نازک بتائی جا رہی ہے۔ بس میں اڑتالیس مسافر سوار تھے۔

یہ حادثہ جموں سے ایک سو ساٹھ کلومیٹر کے فاصلے پر رمبان کےقصبے کے نزدیک پیش آیا۔ فوری طور پر حادثے کی وجہ معلوم نہیں ہو سکی ہے۔

جموں زون کے آئی جی ایس پی وید کے مطابق امدای کارروائیوں کے لیئے ٹیم جائے حادثہ پر پہنچ چکی ہے اور اس نےاپنا کام شروع کر دیا ہے۔ انسپکٹر جنرل پولیس کا کہنا تھا کہ پولیس اہلکاروں نے پانچ سو فٹ گہری کھائی سے پندرہ لاشیں نکالیں جبکہ دس افراد نے ہسپتال میں دم توڑا ہے۔

ان دنوں ہندو مذہب کی سالانہ امرناتھ یاترا کے سبب جموں سری نگر ہائی وے پر بڑی تعداد میں مسافر بسوں کی آمدورفت جاری ہے اور ان بسوں میں گنجائش سے زیادہ مسافروں کی سواری اورگاڑیوں کی خستہ حالت بھی اس قسم کے حادثوں کی ایک بڑی وجہ ہے۔