الطاف حسین بی بی سی اردو ڈاٹ کام، سری نگر

	وادی میں کاروبارِ زندگی معطل ہے

ہڑتال کی وجہ سے وادی میں بازار بند ہیں اور کاروباری سرگرمیاں معطل ہیں۔ اس ہڑتال کی اپیل کشمیر کے علیحدگی پسند گروہوں کی طرف سے کی گئي تھی۔

منگل کو ہنڈوارہ شہر کے ایک سکول کے پرنسپل، اساتذہ اور طلباء مشہور وولر جھیل پر پکنک منانے گئے تھے۔ یہ لوگ وہاں موجود بحریہ کی ایک کشتی پر سوار تھے اور اس کشتی کے غرق ہو جانے سے با‎ئیس بچوں اور ایک استاد کی موت ہوگئی تھی۔

انڈیا کی وزارتِ دفاع نے اس معاملے کی تفتیش کے احکامات جاری کر دیئے ہیں جبکہ ریاستی حکومت نے بھی اس معاملے کی عدالتی تحقیقات کا حکم دیا ہے۔

بچوں کی ہلاکت کے بعد لواحقین اور عوام میں غم وغصہ کی لہر دوڑ گئی تھی اور انہوں نے بچوں کی ہلاکتوں کے خلاف زبردست احتجاج کیا تھا۔ اس احتجاج میں پانچ سو سے زيادہ افراد شامل تھے۔ مظاہرین فوج کے خلاف نعرے لگا رہے تھے اور ان کا الزام تھا کہ کشتی ڈوبنے کا حادثہ موٹر بوٹ کے ڈرا‏ئیور کی لاپرواہی سے ہوا ہے۔

فوجی اہلکاروں کے مطابق مشتعل ہجوم فوج کے کیمپ کو مسمار کرنے پر اتر آیا تھا اور انہیں منتشر کرنےکے لیئے پہلے آنسو گیس پھینکی گئی اور بعد میں گولی چلانی پڑی جس سے دو افراد ہلاک ہوگئے تھے۔