نادیہ پرويز بی بی سی اردو ڈاٹ کام، دلی

	میڈیکل طلباء کئی ہفتوں سے احتجاج کررہے ہیں

سنیچر کو وزیراعظم نے اعلیٰ تعلیمی اداروں میں رزرویشن کے خلاف احتجاج کرنے والے میڈیکل اسٹوڈنٹس سے خوشگوار ماحول میں اس مسئلہ کا حل نکالنے کی صلاح دیتے ہوئے ڈاکٹروں سے ہڑتال ختم کرنے کی اپیل کی تھی۔

اس درمیان حکومت نے ہڑتال کرنے والوں کے خلاف سخت رویہ اختیار کرتے ہوئے ریزیڈنٹ ڈاکٹروں سے 24 گھنٹوں ميں ہاسٹل خالی کرنے کا نوٹس جاری کیا ہے۔

نوٹس ملنے کی تصدیق کرتے ہوئے آل انڈیا انسٹیٹیوٹ آف میڈیکل سائنسز یعنی ایمز میں ڈاکٹروں کے نمائندے ونود پاترا نے بی بی سی کو بتایا کہ ’ایمز کے اڈمنسٹریٹو یونٹ کی طرف سے نوٹس حاصل ہوا ہے جس میں لکھا ہے کہ اگر آپ ہڑتال میں شامل ہیں تو چوبیس گھنٹوں کے اندر ہاسٹل خالی کر دیں۔‘

وزیراعظم کی اپیل کے بارے میں ڈاکٹر پاترا نے کہا کہ منموہن سنگھ دو رخی بات چیت کر رہے ہیں۔ ’ایک طرف وہ بات چیت کے ذریعے اس مسئلہ کا حل نکانلے کی بات کرتے ہیں اور دوسری جانب انہوں نے ڈاکٹروں کی نوکری ختم کرنے کے بعد رام منہور لوہیا، لیڈی ہارڈنگز اور صفدر جنگ جیسے ہسپتالوں میں نئے ڈاکٹروں کی بھرتی کے لیئے اخبارات میں اشتہار بھی دے دیے ہیں۔‘

ڈاکٹروں کا کہنا ہے کہ حکومت جب تک ان کی مانگیں پوری نہیں کرتی ان کا احتجاج جاری رہے گا۔ ڈاکٹرز کا مطالبہ ہے کہ حکومت رزرویشن سے متعلق اپنی موجودہ تجویز کو فورا واپس لے اور رزرویشن کی موجودہ پالیسی پر نظرثانی کے لیئے ایک غیرسیاسی کمیٹی تشکیل دے۔

حکومت کی تعلیمی اداروں میں موجودہ سیٹوں میں اضافے کی تجویز کی پیش کش کو بھی ان ڈاکٹرز نے مسترد کر دیا ہے۔ ان کا کہنا ہے کہ یہ اس مسئلہ کا عبوری حل ہے۔ مرکزی حکومت تعلیمی اداروں میں سیٹیں مخصوص کرنے کے ساتھ ساتھ داخلوں میں اضافے پر بھی غور کررہی ہے۔

حکومت نے اس مسئلے کے حل کے لیے وزیر دفاع پرنب مکھرجی کی سربراہی میں وزراء کے ایک گرپ نے رزرویشن کے خلاف تنظیموں کے نمائندوں سے بات چیت کرنے کے بعد ایک رپورٹ تیار کی ہے۔ اطلاعات کے مطابق اس رپورٹ پر وزيراعظم مختلف سیاسی جماعتوں سے پیر کے روز سے صلاح و مشورے کا سلسلہ شروع کريں گے۔