جیوتسنا سنگھ دلی

	تاجروں کا کہنا تھا کہ برڈ فلو کی افواہیں میڈیا نے پھیلائی ہیں

اتوار کو ڈیڑھ کلو چکن کی قیمت چالیس روپے فی کلو سےگر کر پچیس روپے فی کلو تک پہنچ گئی تھی لیکن پیر کی صبح تک یہ قیمتیں تیس روپے فی کلو تک گرگئی تھیں۔

برڈ فلو کب کہاں اور کیسے

حالانکہ منڈی میں مرغیوں کی تجارت سے تعلق رکھنے والے لوگوں کا کہنا ہے کہ افواہ تو ضرور تیزی سے پھیل رہی ہیں لیکن فی الوقت ڈرنے کی کوئی بات نہیں ہے۔

اس کے علاوہ انہوں نے اس بات سے بھی انکار نہیں کیا کہ مرغیاں فروخت کرنے میں کچھ دقتیں پیش آ رہی ہیں۔

	منڈی کے تاجروں نے کہا کہ انہیں مرغی بیچنے میں کوئی مشکل پیش نہیں آ رہی ہے

ایک تاجر کا کہنا تھا کہ ’ کوئی برڈ فلو نہیں ہے۔ یہ افواہیں میڈیا نے پھیلائی ہیں۔ اس سے پہلے بھی میڈیا نے ایسا کیا تھا لیکن اس وقت بھی کچھ نہیں نکلا تھا‘۔

دوسری جانب بعض لوگ مرغیوں کی قیمتیں کم ہونے کا فائدہ بھی اٹھانے کی کوشش کر رہے ہیں۔ انہی میں سے ایک محمد تقی ہیں۔ ان کا کہنا ہے کہ ’عام دنوں میں میں صرف ایک سو مرغیاں ہی خریدتا ہوں لیکن کم داموں کے سبب میں نے دو سو مرغیاں خریدی ہیں، میں یہ بھی جانتا ہوں کہ انہیں فروخت کرنے میں مجھے دقت ضرور پیش آئے گی‘۔

حکومت کی طرف سےمنڈی میں دو ڈاکٹروں کو مقرر کیا گیا ہے اور یہ مرغیوں کے خون کی مسلسل جانچ کر رہے ہیں۔

محکمہ صحت کے ایک اعلیٰ اہلکار نے بتایا کہ ’سال دو ہزار چار ہی سے دلی حکومت نے دو ڈاکٹروں کو یہاں مقرر کیا ہے۔ ڈاکٹر مرغیوں کے خون کی جانچ کرتے رہتے ہیں‘۔

	بازار میں دو ڈاکٹروں کو بھی مقرر کیا گیا ہے

لیکن یہاں آنے والے بعض خریدار ایسے بھی تھےجو برڈ فلو کے ڈر سے با لکل بھی متاثر نہیں تھے۔

ایسے ہی ایک خریدار جگیاس نے بے جھجھک انڈے اور مرغی خریدی تھی۔ ان کا کہنا تھا کہ ’جب کچھ ہوا ہی نہیں تو کھانا کیوں بند کر دیا جائے‘۔

لیکن ایک بڑی تعداد ایسے افراد کی بھی ہے جو برڈ فلو کے سبب انڈے اور مرغی نہیں کھا رہے ہیں۔

منڈی کے باہر حاجی عبد اللہ کی دکان اس بات کا ثبوت پیش کرتی ہے۔ حاجی صاحب صرف مٹن بریانی فروخت کرتے ہیں اور گزشتہ دو دنوں میں ان کا کاروبار کافی اچھا چل رہا ہے۔

غازی پور منڈی میں دلی کی تین پڑوسی ریاستوں سے مرغیاں آتی ہیں اور عام دنوں میں یہاں ہر روز ایک لاکھ مرغیوں کی خرید و فروخت کی جاتی ہے۔