صلاح الدین بی بی سی اردو ڈاٹ کام، دلی

	شہاب الدین نے جیل میں رہتے ہوئے انتخابات میں کامیابی حاصل کی تھی

دلی پولیس کا کہنا ہے کہ ان کی گرفتاری کے لیے بہار سے پولیس کی ٹیم آئی تھی اور دلی پولیس نے اس ٹیم کی صرف مدد کی ہے۔ گرفتاری کے بعد جب شہاب الدین کو پارلیمنٹ اسٹریٹ تھانے لایا گیا تو وہ صرف لنگی اور بنیان پہنے بیٹھے تھے۔ پولیس کا کہنا تھا کہ انہیں عدالت میں پیش کیا جائیگا۔

تھانے کے باہر شہاب الدین کے حامیوں کا ایک گروہ ان کی حمایت میں نعرے بازی بھی کر رہا تھا۔

شہاب الدین کے خلاف تقریبا آٹھ مقدمات درج ہیں لیکن پولیس نے ان کے خلاف غیر قانونی طور پر ہتھیار رکھنے کے الزام میں ناقابلِ ضمانت وارنٹ جاری کیا تھا۔ پولیس کافی دنوں سے انہیں گرفتار کرنے کی کوشش کر رہی تھی لیکن وہ بچتے رہے تھے۔

اس سے پہلے جب پارلیمنٹ کا اجلاس جاری تھا تب بھی بہار کی پولیس دلی آئی تھی لیکن اسے کامیابی نہیں ملی تھی۔ لیکن اس درمیان وہ ذرائع ابلاغ سے اکثر باتیں کرتے رہے تھے۔ انکا کہنا تھا کہ وہ پولیس کی کارروائی کے خلاف عدالت کا سہارا لیں گے۔

فی الوقت بہارمیں اسمبلی کے انتخابات آخری مرحلے میں ہیں ۔ لیکن اسکے آغاز میں انتظامیہ نے حکم جاری کیا تھا کہ تمام لوگ اپنا اسلحہ جمع کرا دیں۔

پولیس کا کہنا ہے کہ شہا ب الدین نے اس حکم کی تعمیل نہیں کی تھی اسی لیے انکے خلاف کارروائی کی جارہی ہے۔

شہاب الدین کے بارے میں کہا جاتا ہے کہ وہ اپنے علاقے میں ایک مافیا ڈان کی طرح ہیں جن سے لوگ بہت ڈرتے ہیں اور احترام بھی کرتے ہیں۔وہ اکثر کسی نا کسی تنازعے میں گھرے رہتے ہیں۔ حال ہی میں انتخابات کے دوران انتخابی کمیشن نے ان پر ووٹ ڈالنے کی پابندی عائد کر دی تھی اور انہوں نے جیل میں رہتے ہوئے انتخاب جیتا تھا۔

لالو پرساد یادو کی جماعت راشٹریہ جنتادل کے وہ ایک اہم رکن ہیں اور تقریباً سبھی مواقع پر انہیں لالو کی حمایت حاصل رہتی ہے۔