صلاح الدین بی بی سی اردو ڈاٹ کام دلی

	سو افراد ہلاک ہو چکے ہیں اور ہزاروں کو محفوظ مقامات پر منتقل کیا گیا ہے

محکمہ موسمیات نے خبردار کیا ہے کہ خلیج بنگال میں ہوا کے دباؤ میں کمی کے سبب آندھرا کے ساحلی علاقوں میں طوفان کا خطرہ ہے۔ ریاستی حکومت نے ناگہانی حالات سے نمٹنے کے لیے انتظامیہ کو چوکس رہنے کے لیے کہا ہے اور ماہی گیروں کوسمندر میں نہ جانے کی ہدایات دی ہیں۔

جنوب کے کئی علاقوں میں مسلسل کئی روز سے بارش ہورہی ہے جس کے سبب شہروں میں پانی بھر گیا ہے۔ چنّئی کے بیشتر علاقوں میں گٹھنوں تک پانی بھرا ہے اور ترائی کے علاقے میں بسے تقریبا چار ہزار لوگوں کو محفوظ مقامات پر منتقل کیا گیا ہے۔

پانی بھرنے سے جنوبی ہندوستان میں ریل کے بیشتر راستے بھی متاثر ہوئے ہیں اور کئی ٹرینیں منسوخ کر دی گئی ہیں ۔ دو روز بعد مدراس ائر پورٹ پر پروازوں کی آمد و رفت بحال ہوئی ہے لیکن شہر کے اندر سڑکوں پر پانی کے سبب عوام کو کئی طرح کی مشکلوں کا سامنا ہے۔ ریاستی حکومت نے فوج کی مدد کی درخواست کی ہے۔

کرناٹک کے بھی بعض علاقوں میں کئی روز سے بارش ہورہی ہے۔ بنگلور شہر میں پانی بھرنے کے سبب اسکول دفاتر بند کر دیے گیے ہیں۔ بنگلور ائیر پورٹ کا بھی زیادہ تر حصہ زیر آب آگیا تھا لیکن اب فضائی سروس بحال ہو گئی ہے۔ حکام کا کہنا ہے کہ بارش سے کروڑوں روپے کی فصل بھی تباہ ہوئی ہے۔

محکمہ موسمیات کا کہنا ہے کہ خلیج بنگال میں ہوا کے دباؤ میں کمی کے سبب اڑیسہ کے ساحلی علاقوں میں طوفان کا خدشہ اب ٹل گیا ہے لیکن اب آندھرا پردیش میں خطرہ قدرے زیادہ ہے۔