صلاح الدین بی بی سی اردو ڈاٹ کام دلی

	کئی روز سے ہونے والی بارش سے شہروں میں پانی بھر گیا ہے

محکمہ موسمیات نے خبردار کیا ہے کہ خلیج بنگال میں ہوا کے دباؤ میں کمی کے سبب اڑیسہ کے ساحلی علاقوں میں بھی طوفان کا خطرہ ہے۔ ریاستی حکومت نے ناگہانی حالات سے نمٹنے کے لیے انتظامیہ کو چوکس رہنے کے لیے کہا ہے۔

جنوب کے کئی علاقوں میں مسلسل کئی روز سے بارش ہورہی ہے جس کی وجہ سے شہروں میں پانی بھر گیا ہے۔ چینّائی کے بیشتر علاقوں میں گھٹنوں تک پانی بھرا ہے اور ترائی کے علاقے میں بسے تقریبًا چار ہزار لوگوں کو محفوظ مقامات پر پہنچا دیا گیا ہے۔

مدراس ائیر پورٹ پر جانے والی کئی پروازوں کے راستے تبدیل کردیے گئے ہیں۔ پانی بھرنے سے بعض مقامات پر ریل کے راستے بھی متاثر ہوۓ ہیں۔

بنگلور شہر میں پانی بھرنے کے سبب سکول دفاتر بند کر دیے گئے ہیں۔ بنگلور ائیر پورٹ کا بھی زیادہ تر حصہ زیر آب ہے۔ سڑکوں پر بسوں اور آٹو رکشا ناچلنے کی وجہ سے لوگوں کو کئی طرح کی مشکلات کا سامنا ہے۔

محکمہ موسمیات کا کہنا ہے کہ خلیج بنگال میں ہوا کے دباؤ میں کمی کے سبب اڑیسہ کے ساحلی علاقوں میں طوفان کا خدشہ ہے۔

حکام کے مطابق ابھی یہ دباؤ اڑیسہ سے سات سو کلو میٹر کی دوری پر ہے اور جنوبی علاقوں میں مزید بارش کے آثار ہیں۔