بھارت کے زیر انتظام کشمیر سے رہنماؤں نے تین ماہ قبل پاکستان کا دورہ کیا تھا

اس دھڑے کے رہنما میرا واعظ عمر فاروق اور عباس انصاری ہیں اور میرواعظ عمر فاروق نے کہا ہے کہ وہ اور ان کے ساتھی بھارتی وزیراعظم سے کھل کر اور کشمیر کے حل کی بات کرینگے۔

انہوں نے کہا کہ یہ ملاقات ایک مختلف ماحول میں ہو رہی اور اس میں کشمیر کے مسئلے کا حل اور امن کے قیام کے لیے کوششوں پر بات کی جائے گی۔

ان کا کہنا ہے کہ پاکستان اور بھارت میں بات چیت ہو رہی ہے ہم بھی بات کر رہے ہیں اور یہ ایک اچھی بات ہے کہ بھارت پاکستان اور پاکستان بھارت سے کشمیری دونوں سے بات چیت کریں اور مسئلے کا حل نکالنے کوششیں کریں۔

دلی میں نامہ نگاروں کا کہنا ہے کہ اس بات کی ملاقات کی اہم بات یہ ہے کہ اس بار شرائط کی باتیں نہیں ہو رہی ہیں تاہم یہ ابتدائی بات چیت ہے اور پہلی بار کشمیری علیحدگی پسند رہنماؤں کی وزیراعظم سے ملاقات ہو رہی ہے لیکن اس کے باوجود بہت زیادہ امیدیں نہیں لگائی جانی چاہیں۔

عمر فاروق نے بی بی سی کو بتایا کہ بات چیت کا مقصد مسئلہ کشمیر کا پر امن اور دیر پا حل تلاش کرنا ہے۔

تین ماہ قبل حریت رہنماؤں نے پاکستان کے زیر انتظام کشمیر کا دورہ کیا تھا اور اسلام آباد میں پاکستان کے صدر سے ملاقات کی تھی۔