صلاح الدین بی بی سی اردو ڈاٹ کام، دِلی

پولیس کا کہنا ہے کہ یہ واقعہ راجوری ضلع کے دوردراز پہاڑی علاقے میں پیش آیا ہے

راجوری کے ڈپٹی انسپکٹر آف پولیس وی کے سنگھ نے جموں میں بی بی سی کی نامہ نگار بینو جوشی کو بتایا ہے کہ جمعرات کی شب کو بعض انتہا پسندوں نے دھوب علاقے میں چھاپا مارا تھا۔ انہوں نے سبھی کو لائن میں کھڑاکیا اور پھرہندوؤں کو علحیدہ کرکے تھوڑی دور لےجاکر انکی گردنوں کو کاٹ دیا گیا۔ مرنے والے چالیس اور ساٹھ برس کے لوگ ہیں۔

مسٹر سنگھ کا کہنا تھا کہ حالات کا جائزہ لینے کے لیے بعض سینئر پولیس اہلکار جاۓ وارادات پر پہنچے ہیں۔ انکا کہنا تھا کہ چونکہ وہ دور دراز علاقہ ہے اس لیے تفصیلات ملنے میں دیر لگ سکتی ہے۔ اس واقعے کی ابھی تک کسی بھی گروپ نے ذمہ داری قبول نہیں کی ہے۔

انتہا پسندی کے سبب وادی کشمیر کے بہت سے پنڈت کمشیر سے نقل مکانی کرگئے ہیں۔ تاہم گزشتہ کافی دنوں سے یہ کوشش کی جارہی ہے کہ انہیں دوبارہ وادی میں بسایا جاۓ۔ اس سلسلے میں حال ہی میں کشمیری لیڈروں اور پنڈتوں کے درمیان بات چیت بھی ہوئی تھی۔ لیکن اس طرح کے تازہ واقعات سے ایسی کوششوں کو زبردست جھٹکا لگ سکتا ہے۔