ریاض مسرور سرینگر

پانی کا رنگ سبز ہوا تو اسے ترقی اور امن کی علامت سمجھا جاتا ہے اور اگر رنگ گدلا ہوتو اس کا مطلب مایوسی اور مصیبت کی آمد ہوتی ہے۔

انیس سو نوّے میں پرتشدد صورتحال کی وجہ سے ہجرت کرنے والے کشمیری پنڈت ہر سال اس مقدس مقام پر حاضری دیتے ہیں اور یہ امید لے کر آتے ہیں کہ کھیر بھوانی چشمے کا پانی ہرا ہوگا۔

سرینگر سے بیس کلو میٹر دور تحصیل گاندربل کے تلمل علاقہ میں کشمیری پنڈتوں کے مشہور استھاپن پر جمعرات کو میلہ کھیربھوانی کے سلسلے میں عقیدت مندوں کی خاصی تعداد نے شرکت کی۔

جموں کے مہاجر کمپ سے آئے راکیش کمار کا کہنا ہے کہ ’ہم بہت خوش ہوئے کہ ہمارے مسلم ہم وطنوں نے ہمارا دل و جان سے استقبال کیا لیکن ہم مایوس ہوئے کہ چشمے کا پانی آج بھی گدلا ہے‘۔

دریں اثناء جمعرات کی صبع کھیر بھوانی مندر سے صرف دو کلومیٹر کے فاصلے پر مسُلح کشمیری جنگجوؤں اور بھارتی فوج کے درمیان ایک جھڑپ ہوئی جو دوپہر تک جاری رہی۔

جھڑپ میں دو مقامی جنگجومارے گئے جبکہ ایک فوجی اہلکار بھی زخمی ہوا-
وطن واپسی کی امید لیے کشمیری پنڈتوں نے خوف ناک صورت حال کے باوجود کھیربھوانی دیوی کے ہاں حاضری دی-

اس دوران علیحدگی پسند رہنماء شبیر احمد شاہ نے بھی تقریب میں شمولیت کی اور کشمیری پنڈتوں کو بتایا کہ اُن کی واپسی کا ہرکشمیری کو اشتیاق بھی ہے اور انتظار بھی۔

مہاجر کشمیری پنڈتوں کی وطن واپسی مفتی محمد سعید کی حکومت کی ترجیحات میں شامل ہے- حکومت کا مؤقف ہے کہ پنڈتوں کی واپسی کے حوالے سے سلامتی اور دیگر سہولیات کو حتمی شکل دیدی گئی ہے اور اب پنڈتوں کو لوٹ آنا چاہیے-

لیکن کھیربھوانی مندر میں چشمے کے پانی کا گدلا رنگ پنڈتوں کی بے اطمینانی کی وجہ ہے کیونکہ وہ پچھلے پندرہ سال سے آس لگائے بیٹھے ہیں کہ چشمے کا پانی سبز ہوجائےگا جو اُن کے دِن پھرنے کی علامت ہوگا اور وہ کشمیر واپس آسکیں گے۔

کشمیری ہندو عقیدے کے مطابق راگیانہ دیوی کو بھگوان ہنومان سری لنکا سے کشمیرلائے تھے اور یہاں راگیانہ دیوی نے اپنے قیام کے لیے تولمولہ کا انتخاب کیا جہاں پانی کا ایک خوبصورت چشمہ ہے اور اس چشمے میں بڑی اور اعلیٰ نسل کی مچھلیاں بھی ہیں۔