لالنگ کو گزشتہ ہفتے ایک روپے کے ذاتی مچلکے کے عوض رہا کیا گیا

ستتر سالہ مچنگ لالنگ کو گواہاٹی سے انیس سو اکیاون میں ’شدید ضربیں‘ لگانے کے جرم میں گرفتار کیا گیا تھا۔ اس جرم کی سزا دس سال ہے۔

پولیس کا کہنا ہے کہ لالنگ کے خلاف ثبوت نہیں ملے تھے جس کے بعد انہیں ذہنی امراض کے ایک ادارے میں منتقل کر دیا گیا تھا۔

انیس سو سڑسٹھ میں اس ادارے نے لالنگ کو صحت مند قرار دے کر ان کی رہائی کی سفارش کی تھی لیکن پولیس نے انہیں ایک اور جیل میں منتقل کر دیا۔

حیران کن طور پر اس معاملے میں لالنگ کے گھر والوں نے بھی انہیں بھلا دیا۔

گزشتہ سال مقامی سطح پر کام کرنے والے انسانی حقوق کے ایک اہلکار نے ان کے معاملے کو انسانی حقوق کے قومی کمشن کے سامنے رکھا جس نے فوری طور پر لالنگ کی رہائی کی کوششیں شروع کر دیں۔

لالنگ کو گزشتہ ہفتے ایک روپے کے ذاتی مچلکے کے عوض رہا کیا گیا۔

رہائی کے بعد لالنگ کو ان کے گاؤں لے جایا گیا جہاں ایک شخص بینو لالنگ نے انہیں پہچان لیا۔

پولیس کا کہنا ہے کہ انہوں نے لالنگ کو گاؤں کے مکھیا کے حوالے کر دیا ہے کیونکہ انہیں ان کا کوئی رشتہ دار یا عزیز نہیں ملا۔

پولیس نے بتایا کہ لالنگ کو اپنا ماضی تقریباً بھول چکا ہے اور انہیں اپنے گاؤں کی کوئی بات یاد نہیں۔

پولیس کے ایک اہلکار نے بتایا کہ مچنگ لالنگ نے اپنے گاؤں پہنچ کر کوئی رد عمل ظاہر نہیں کیا۔