عراق میں ایک پاکستانی کو بھی اغوا کیا گیا تھا

تینتیس سالہ ٹرک ڈرائیور انتریامی کے غریب ماں باپ نے بی بی سی کو بتایا کہ ان کے پاس جو کچھ بھی وہ اسے بیچ کر اپنے بیٹے کی رہائی حاصل کرنا چاہتے ہیں۔

انتریامی کے پریشان بوڑھے باپ رام مورتی نے کہا کہ ’ میرے پاس جو کچھ بھی ہے اسے لے لو مگر میرے بیٹے کو لوٹا دو۔‘

انتریامی کی بوڑھی ماں اس دوران زارو قطار روتی رہی۔ یہ بدنصیب ماں تین سال پہلے اپنے بڑے بیٹے کی موت کا صدمہ برداشت کر چکی ہے اور اس کی موت کے بعد خاندان کا واحد سہارا انتریامی ہے جس عراق میں اغواء کر لیا گیا ہے۔

انہوں نے بتایا کہ انتر یامی پہلے دہلی میں ٹیکس چلاتا تھا پھر اس نے اچھے پیسوں کے لیے کویت میں ایک کمپنی میں ملازمت اختیار کر لی۔

عراق میں دو دن قبل تین بھارتی باشندوں کو اغواء کر لیا گیا تھا اور اغواء کنندگان نے اس سب کے سر قلم کرنے کی دھمکی دی تھی۔

ایک اور مغوی کی بیوی کسم لتا نے بھی اپنے شوہر کی رہائی کے لیے اپیل کی ہے۔ کسم کی ایک دو ماہ کی بیٹی ہے جس نے ابھی تک اپنے باپ کو نہیں دیکھا۔

عراق میں اغواء ہونے والے تینوں بھارتی باشندوں کا تعلق ہماچل پردیش سے ہے۔

تیسرے مغوی چالیس سالہ تلک راج کے گھر والوں نے ان کے اغوا کیے جانے کی خبر ٹیلی ویژن پر سنی۔ تلک راج کی بیوی نے بھی اپنے شوہر کی رہائی کی اپیل کرتے ہوئے کہا کہ ’ مجھے پیسے کی ضرورت نہیں صرف میرے شوہر کو لوٹا دو۔‘
تلک راج بھی اپنے خاندان کا واحد کفیل ہے۔