وزیر خارجہ نٹور سنگھ لندن کے دورے پر آئے ہوئے ہیں۔

انہوں نے یہ بات ہندی سروس کے ساتھ ایک خصوصی انٹرویو میں کہی۔ انہوں نے کہا کہ وہ شدت پسندوں کے تربیتی کیمپوں سے متعلق اپنے موقف کے حق میں تصاویر پیش کر سکتے ہیں۔

بھارتی وزیر خارجہ نے کہا کہ شدت پسندوں کے تربیتی کیمپوں سے متعلق یہ صرف ہماری رائے نہیں ہے بلکہ آس پاس کے ملکوں کی بھی یہی رائے ہے۔ اُن کا اشارہ افغانستان کے صدر حامد کرزئی کے بیان کی طرف تھا۔

نٹور سنگھ نے پچھلے دنوں وسطی ایشیاء کے دورے کے دوران پاکستان کے وزیر اعظم شوکت عزیر سے اپنی ملاقات کا ذکر کرتے ہوئے کہا کہ انہوں نے پاکستانی وزیر اعظم سے کہہ دیا ہے کہ اگر وہ چاہیں تو شدت پسندوں کے کیمپوں سے متعلق ثبوت انہیں فراہم کیے جا سکتے ہیں۔

مسئلہ کشمیر سے متعلق ایک سوال کا جواب دیتے ہوئے مسٹر نٹور سنگھ نے کہا کہ کشمیر سے متعلق ہر ہفتے پاکستان سے نیا بیان داغا جاتا ہے۔

’کبھی وزیر خارجہ اس پر بیان جاری کرتے ہیں تو کبھی وزیر اعظم اور کبھی کبھی جنرل صاحب خود اس پر بیان دیتے ہیں۔ ہم روز روز ان بیانوں کا جواب نہیں دے سکتے لیکن پارلیمنٹ میں ضرور ان بیانوں پر بات ہوتی ہے۔‘

’جہاں تک حریت کانفرنس کے رہنماؤں کا تعلق ہے انہوں نے پاکستان جانے کی خواہش کا اظہار کیا تھا اور ہم نے انہیں اجازت دے دی۔ اب کہتے ہیں کہ نئے انتخابات کرائیں۔ بھئی انتخابات تو پہلے بھی ہوتے ہیں ہیں۔ رکن پارلیمنٹ منتخب ہوتے ہیں۔‘

پاکستان کی جانب سے کشمیر کے مسئلے کے حل کے لیے ایک سال کی مہلت سے متعلق ایک سوال کا جواب دیتے ہوئے انہوں نے کہا کہ وزیر منموہن سنگھ پہلے ہی کہہ چکے ہیں کہ بھارت پاکستان کے ساتھ ہر معاملے پر بات چیت کے لیے تیار ہے، لیکن پاکستان کو بھی یہ بات سمجھنی چاہیے کہ جو مسئلہ اٹھاون سال سے حل طلب ہے وہ راتوں رات کیسے حل ہو سکتا ہے۔

پاکستان اور ہندوستان کے مابین امن مذاکرات کے سلسلہ کے امکانات کے بارے میں ایک سوال پر انہوں نے کہا کہ اگر لندن کی طرح کا کوئی شدت پسند حملہ نہ ہوا تو یہ سلسلہ ضرور آگے بڑھے گا۔

ادھر پاکستان نے بھارتی وزیر خارجہ کی طرف سے لگائے ان الزامات کی سختی سے تردید کی۔

پاکستانی وزارت خارجہ کے ترجمان جلیل عباس جیلانی نے کہا کہ ایسے بیان تو اس وقت آتے تھے جب دونوں ملکوں کے مابین بات چیت نہیں ہو رہی تھی۔

’اب جب امن مذاکرات کا سلسلہ آگے بڑھ رہا ہے تو ایسی بیانات کی کوئی وجہ سمجھ نہیں آتی۔‘