شکیل اختر بی بی سی اردو ڈاٹ کام، دلی

اس سے قبل حزب اختلاف کے رہنما لعل کرشن اڈوانی نے کہا تھا کہ وہ اپنا استعفی واپس نہیں لیں گے

دن بھر کی ڈرامائی سیاسی سرگرمیوں کے بعد مسٹر اڈوانی کو منانے کے لئے ایک نئی قرارداد تیار کی گئی جس میں مسٹر اڈوانی کے دورہِ پاکستان کی کامیابی کو تسلیم تو کیا گیا لیکن ساتھ ہی یہ بھی کہا ہے کہ وہ دو قومی نظرے کے تصور سے اتفاق نہیں کرتی اور یہ کہ قائد اعظم محمد علی جناح ملک کی تقسیم کے لئے ذمہ دار تھے۔

مسٹر اڈوانی کے استعفی کی واپسی کا اعلان کرتے ہوئے محترمہ سشما سوراج نے کہا کہ ’پارٹی یہ مانتی ہے کہ جناح دو قومی نظریے کے تصور کے حامی تھے اور ان کی وجہ سے ہی ملک تقسیم ہوا تھا۔ جناح کی وجہ سے ہی لاکھوں لوگ بے گھر ہوئے اور بڑی تعداد میں لوگوں کا خون بہا۔‘

محترمہ سشما سوراج نے کہا کہ بانیِ پاکستان کےسلسلے میں پارٹی میں جو بحران پیدا ہو گیا تھا اسے قرارداد میں صاف کر دیا گیا ہے ۔ انکا کہنا تھا کہ اسکے بعد مسٹر اڈاونی نے کہا کہ انکے دورۂ پاکستان کے بارے میں پارٹی نے سب کچھ کہہ دیا ہے اور میرے بیان سے پارٹی کارکنوں کے درمیان جس طرح کی غلط فہمی پیدا ہو گئی تھی وہ اب ختم ہو گئی ہے اس لئے میں اپنا استعفی واپس لے رہا ہوں ۔‘

لیکن بی جے پی کی نظر یاتی تنظيموں کے رویے میں ان مصالحانہ کوششوں سے کوئی نرمی نہیں پیدا ہوئی ہے۔ وشو ہندو پریشد کے رہنما آچاریہ گریراج کشور نے کہا ہے کہ قرارداد کی منظوری اور استعفیٰ کی واپسی محض ایک ڈرامہ تھا۔

’پارٹی نے جناح کے بارے میں مسٹر اڈوانی کے خیالات کی توثیق نہیں کی ہے۔ اس کے باوجود وہ صدر بنے ر ہیں۔ میں تو اسے صرف ان کی سیاسی کمزوری قرار دوں گا۔‘

وشو ہندو پریشد نے آئندہ ہفتے مسٹر اڈوانی کے ان بیانات اور سنگھ پریوار کی نظریاتی اساس پر مفصل بحث کے لئے ایک اجلاس طلب کیا ہے اور یہ واضع کیا ہے کہ مسٹر اڈوانی جب تک اپنے بیانات سے منحرف نہیں ہوتے وہ انہیں معاف نہیں کر سکتی ۔

فی الحال بی جے پی کے اندر ایک زبردست بحران ختم ہو گيا ہے لیکن قائد اعظم کی سیاسی شخصیت اور نظریات کی یہ بحث اب بی جے پی اور سنگھ پریوار کے درمیان ہوگی۔ لیکن اس بحث میں سبقت فی الحال اڈوانی کو حاصل ہے۔