شبنم اپنی دیگر ساتھیوں کی طرح شو کے لیے پوری طرح تیار ہے لیکن ممبئی کی ایلورا نامی رقص بار میں آج اس کا کام درمیانی عمر کے صرف دو افراد کو محظوظ کرنا ہے۔ شبنم بالی وڈ کے گانوں کی دھنوں سے قدم ملانے کی کوشش میں ہے لیکن اس میں جوش کی کچھ کمی دکھائی دیتی ہے۔ اس کا کہنا ہے کہ محفل زیادہ شائقین سے جمتی ہے۔ ایلور بار کے علاوہ ممبئی کی دیگر باروں میں بھی کاروبار مندی کا شکار ہے۔ مہاراشٹر کی ریاستی حکومت نے رقص بارز پر پابندی عائد کرنے کی ہدایت کی تھی جس پر آئندہ چار ہفتے میں عمل درآمد کی صورت میں ایلورا بار ہمیشہ کے لیے بند ہو جائے گی۔ مہاراشٹر کے دیگر علاقوں میں ایسی بارز پہلے ہی بند ہو چکی ہیں۔ ممبئی میں ایسی بارز کی تعداد سات سو ہے جو شہر کی شبینہ زندگی کا اہم حصہ ہیں۔ ریاستی حکومت انہیں بند کرنے کے سلسلے میں قانون کی جلد تشکیل پر زور دے رہی ہے جو توقع کے مطابق چار ہفتوں میں طے پا جائے گا۔ لیکن بعض کے خیال میں چند بارز جلد ہی بند ہو جائیں گی۔ ریاستی حکومت نے ان بارز پر پابندی عائد کرتے ہوئے یہ موقف اختیار کیا تھا کہ ان کے باعث جسم فروشی اور جرائم میں اضافے کے علاوہ نوجوانوں میں اخلاقی اقدار کا فقدان بڑھ رہا ہے۔ | 
یہ صفحہ دوست کو ای میل کیجیئے
پرِنٹ کریں
