شکیل اختر بی بی سی اردو ڈاٹ کام، دِلّی

نریندر مودی پر نسلی منافرت کو ہوا دینے کا الزام عائد کیا جاتا رہا ہے

نریندر مودی امریکہ کے دورے پر جانے والے تھے۔ دلی میں امریکی سفارتخانے نے نریندر مودی کو ویزا جاری نہ کرنے کی تصدیق کرتے ہوئے کہا کہ وہ جس مقصد کے لیے امریکہ جانا چاہتے تھے اس کے لیے سفارتی ویزا جاری نہیں کیا جا سکتا ۔ وہ امریکہ میں آباد گجراتی ہندوؤں کی دعوت پر وہاں جارہے تھے۔

امریکہ کے ایوان نمائندگان یعنی کانگریس میں دو ارا کینِ کانگریس نے مودی کے خلاف ایک قرارداد پیش کی تھی جس میں امریکہ سے مطالبہ کیا گیا تھا کہ وہ مسٹر مودی کی مذمت کرے کیوں کہ وہ بقول انکے اقلیتوں کی مذہبی آزادی کی خلاف ورزی کے قصوروار ہیں۔

قرارداد میں یہ بھی کہا گیا تھا کہ نریندر مودی کے دورِ اقتدار میں ہزاروں مسلمانوں کے قتل عام کے قصورواروں کو دانستہ طور پر سزائيں نہیں دی گئیں جب کہ سیکڑوں عیسائی مذہبی رہنماؤں پر حملے کیے گئے اور انکی عبادت گاہوں کو نقصان پہنچایا گیا۔

اس سے قبل امریکہ کی وزارت خارجہ کی بین الاقوامی تعلقات کی کمیٹی نے ایک رپورٹ کا بھی جائزہ لیا تھا جس میں کہا گیا تھا کہ نریندر مودی کے حکومتی سکولوں کی نصابی کتابوں میں نازیوں کی تعریف کی جا رہی ہے اور ہٹلر کو ایک ’عظیم قوم پرست‘ اور ’ سپر ہیرو‘ کے طور پر پیش کیا جارہا ہے۔ اس رپورٹ میں مودی پر نسلی برتری کے تصور کو فروغ دینے کا الزام عائد کیا گیا ہے۔

امریکہ میں کئی ہندو نژاد انجمنوں اور حقوق انسانی کی تنظیموں نے مسٹر مودی کی مجوزہ آمد کے خلاف مہم چلا رکھی تھی اور امریکی حکومت سے مطالبہ کیا تھا کہ وہ مودی کو ویزا نہ دے۔

نریندرمودی نے اس معاملے میں اب تک کوئی ردعمل ظاہر نہیں کیا ہے۔