ظاہرہ شیخ کی جان کو خطرہ ہے

مقدمے کے مطابق ایک ہندو گروہ نے بارہ مسلمانوں کو بیکری کو آگ لگا کر جلا دیا تھا۔

اصل مقدمے کے بعد گواہ ظاہرہ شیخ نے عدالت میں جھوٹ بولنے کا اعتراف کیا تھا۔

گجرات فسادات میں ایک ہزار سے زیادہ لوگ مارے گئے تھے۔

اصل مقدمے میں ظاہرہ شیخ ان گواہوں میں شامل تھیں جنہوں نے اس مقدمے
میں ان اکیس ہندوؤں کے خلاف گواہی دینی تھی جن پر بیکری کو آگ لگانے کا الزام ہے۔

لیکن عدالت میں تمام گواہ اپنے بیانات سے مکر گئے اور ملزمان کو رہا کرنا پڑا۔

بعد میں ظاہرہ شیخ نے ممبئی کی ایک عدالت میں بیان دیا کہ اس نے عدالت میں جھوٹ بولا تھا کیونکہ اسے بھارتیہ جنتا پارٹی کے رہنماؤں سے اپنی جان کا خطرہ تھا۔

بھارتی سپریم کورٹ نے اس مقدمے کی دوبارہ سنوائی کا حکم دیا تھا۔

اور اب یہ مقدمہ دوبارہ شبہات کا شکار ہو گیا ہے کیونکہ ظاہرہ شیخ ایک بار پھر
اپنے بیان سے منحرف ہو گئی ہیں۔

اس بار انہوں نے انسانی حقوق کی تنظیم’جسٹس اینڈ پیس‘ پر دباؤ ڈالنے کا الزام لگایا ہے۔

ظاہرہ شیخ نے جو گجرات کے شہر بڑودہ میں ہیں بدھ کو کہا کہ انہوں نے سپریم کورٹ سے جھوٹ بولا تھا۔ انہوں نے ایسا’جسٹس اینڈپیس‘ کی سربراہ تیستا ستالود کے دباؤ پر کیا۔

تنظیم’جسٹس اینڈپیس‘ نے اس الزام کی تردید کی ہے۔

ظاہرہ شیخ نے الزام لگایا کہ انہیں انگریزی زبان میں چھاپے گئے بیان پر دستخط کرنے پر مجبور کیا گیا جبکہ وہ انگریزی سے نابلد ہیں۔

ممبئی سے بی بی سی کے نمائندے زبیر احمد کے مطابق یہ واضح نہیں کہ ظاہرہ شیخ نے اپنا بیان کیوں بدلا۔

2002 کے فسادات نے گجرات کی ہندو اور مسلم آبادی کو تقسیم کر دیا تھا۔