شکیل اختر بی بی سی، اردو ڈاٹ کام، دلی

ہندوستان میں موبائل فون صارفین کی تعداد فکسڈ لائنوں سے زیادہ ہے

عدالت عظمی نے اس سلسلے میں مرکزی حکومت ، ٹیلی کوم ریگولیٹری اتھارٹی اور سلیولر آپریٹر کو نوٹس جاری کیا ہے۔

عدالت نے یہ نوٹس مفاد عامہ کی ایک عرضی کی بنیاد پر دیا ہے جس میں یہ درخواست کی گئی ہے کہ مرکزی حکومت ایک ایسا قانون بنا ئے جس کے تحت بزنس ہاؤسز اور کمپنیاں اپنی مصنوعات اور خدمات کے فروغ کے لئے موبائل فون پر بغیر اجازت فون نہ کر سکیں۔

عرضی گزار کا کہنا ہے کہ ان چاہی کالز موبائل سبسکرائبرز کی پرائیویسی میں دخل دیتی ہیں اور ان پر دنیا کے دیگر ملکوں کی طرح پابندی عائد کی جانی چاہیئے۔

ہندوستان میں موبائل فون کی تعداد میں بہت تیزی سے اضافہ ہو رہا ہے ۔ سلیولر آپریٹرز اسوسیشن آف انڈیا کے مطابق دسمبر کے اواخر میں ملک میں موبائل فون کی تعداد تقریبا چار کروڑ 74 لاکھ تھی جبکہ روایتی فکسڈ لائن کے چار کروڑ 46 لاکھ کنکشن تھے۔ ایسوسی ایشن کے ایک اہلکار نے بی بی سی کو بتایا کہ موبائل فون کی تعداد میں ہر ہفتے ڈیڑھ سے دو لاکھ کی شرح سے اضافہ ہو رہا ہے۔

موبائل فون میں اضافے کے ساتھ غیر مطلوبہ اور غیر ضروری کالز اور ایس ایم ایس پیغامات میں بھی تیزی سے اضافہ ہو ا ہے۔ ہندوستان میں اب تک ایسا کوئی قانون یا ضابطہ نہيں ہے جن کے تحت اس طرح کی کالز پر روک لگائی جاسکے۔

لیکن صارفین کے حقوق کی تنظیمیں ایک عرصے سے ایک واضع قانون کی ضرورت شدت سے محسوس کر رہی ہیں۔