صلاح الدین بی بی سی اردو ڈاٹ کام، دلی

کشمیری شدت پسند تنظیموں نے ان انتخابات کے بائیکاٹ کا اعلان کیا ہے

اطلاعات کے مطابق پولنگ صبح آٹھ بجے شروع ہوئی۔ ابتداء میں پولنگ سٹیشنوں پر ویرانی چھائی رہی لیکن دوپہر تک کچھ رائے دہندگان پولنگ بوتھ‎ پر آنے شروع ہوگئے تھے۔ بعض خبر رساں ادراروں کی جانب سے دی گئی خبروں میں اسکی وجہ صبح کے وقت زیادہ سردی بتائی گئی ہے۔

شمالی کشمیر میں ضلع کپواڑہ اور بارہ مولہ میں دو میونسپل کونسلز اور آٹھ میونسپل کمیٹیز کے لیے آج ووٹ ڈالے جا رہے ہیں۔ ان انتخابات میں مقابلہ کانگریس، نیشنل کانفرنس اور حکمران پیپلز ڈیموکریٹک پارٹی جیسی سیاسی جماعتوں کے درمیان ہے۔

ان دو ضلعوں میں کل دو سو اکہتر امیدوار میدان میں ہیں جن میں سے اڑتالیس خواتین ہیں۔

کشمیری شدت پسند تنظیموں نے ان انتخابات کے بائیکاٹ کا اعلان کیا ہے اور عوام سے اپیل کی ہے کہ وہ ووٹ نہ ڈالیں۔ گزشتہ جمعے کو مشتبہ شدت پسندوں نے ایک امیدوار کو ہلاک کردیا تھا۔ مقامی پولیس کا کہنا ہے کہ ہلاک شدہ امیدوار غلام رسول دھوبی کا تعلق نیشنل کانفرنس سے تھا جبکہ نیشنل کانفرنس نے اس سے انکار کیا ہے۔