حزبِ اختلاف کانگریس کے اتحادیوں پر مقدمات کا فائدہ اٹھانا چاہتی ہے

حلف برداری کا آغاز بھارت میں حزبِ اقتدار کی جماعت کانگریس پارٹی کی صدر سونیا گاندھی اور سابق وزیرِ اعظم اٹل بہاری واجپئی سے ہوا۔

پارلیمان کے پہلے کمیونسٹ سپیکر سومناتھ چیٹرجی بھی پارلیمان کے آغاز میں حلف اٹھانے والوں میں شامل ہیں۔

کانگریس کی سربراہی میں بننے والی حکومت نے نائب سپیکر کا عہدہ حزبِ اختلاف کی جماعتوں کے اتحاد این ڈی اے کو پیش کیا ہے لیکن این ڈی اے نے ابھی اس کے بارے میں کوئی اعلان نہیں کیا۔

تاہم این ڈی اے نے کانگریس کی سربراہی میں ہونے والے اتحاد پر حملے جاری رکھے ہیں اور کہا ہے کہ اس کے کئی وزراء بدعنوانی کے مقدمات اور دوسرے کئی سکینڈلز میں ملوث ہیں۔

جن وزراء پر مقدمات ہیں ان میں سے تین تو صرف لالو پرساد کی جماعت راشٹریا جنتا دل سے ہیں۔

این ڈی اے کے کنوینر جارج فرنینڈز نے صحافیوں کو بتایا کہ وہ مقدمات میں ملوث وزراء کے متعلق ایک یاد داشت صدر کو پیش کریں گے۔

دوسری طرف برسرِ اقتدار اتحاد پارلیمان کے سیشن میں پیش کیے جانے والا ڈرافٹ مکمل کرنے میں مصروف ہے۔

وزیرِاعظم من موہن سنگھ کی سربراہی میں بھارتی کابینہ کا ایک اجلاس منگل کو ہوا۔ خیال ہے کہ اجلاس میں ان نکات پر غور بحث ہوئی جن کا ذکر مشترکہ سیشن میں صدر اپنے خطاب میں کریں گے۔