نادیہ دہابیہ بی بی سی نیوز

	’فرینڈز‘ کی آخری قسط کو امریکہ میں ساڑھے باون ملین افراد نے دیکھا تھا

باکس آفس پر ’سیکس اینڈ دا سٹی‘ کی کامیابی کے بعد یہ اطلاعات سامنے آ رہی تھیں کہ ’فرینڈز‘ کا کاسٹ میں شامل چھ مرکزی فنکار اس ڈرامے کو فلم کی شکل دینے پر تیار ہو گئے ہیں۔

تاہم وارنر برادرز کی برطانیہ میں تشہیری ڈائریکٹر جین ٹراٹمین کا کہنا ہے کہ اس’ساری خبر میں کوئی صداقت نہیں ہے‘۔

’سیکس اینڈ دا سٹی‘ نے اپنے ابتدائی ہفتے میں امریکی باکس باکس آفس پر قریباً چھپن ملین امریکی ڈالر کا کاروبار کیا تھا جبکہ اس قسم کی فلموں کے لیے ایک ریکارڈ ہے۔

’فرینڈز‘ کی کاسٹ میں شامل یہ چھ فنکار جن میں جینیفر آنسٹن، کورٹنی کوکس، لیزا کڈرو، ڈیوڈ شوئمر، میتھیو پیری اور میٹ لیبلانک شامل ہیں، چار برس قبل علیحدہ ہو گئے تھے اور اس وقت سے دوبارہ ان کے اکٹھا ہونے کی خبریں گرم ہیں۔

تاہم کورٹنی کوکس کی تشہیر کے نگران جان فوگلمین نے بی بی سی کو بتایا ہے کہ وہ کسی فلم کے منصوبے کے بارے میں نہیں جانتے۔ میتھیو پیری کی ترجمان کا بھی یہی کہنا ہے کہ ’اس حوالے سے کچھ نہیں ہو رہا اور یہ افواہ ہے‘۔

یاد رہے کہ ٹی وی ڈرامہ ’فرینڈز‘ کی آخری قسط کو امریکہ میں ساڑھے باون ملین افراد نے دیکھا تھا جبکہ برطانیہ میں یہ تعداد چھیاسی لاکھ کے لگ بھگ تھی۔