سٹین ونسٹن نے چار آسکر ایوارڈ حاصل کیے

سٹین ونسٹن سٹوڈیو کے ترجمان کے مطابق سٹیو پلازما سیل کینسر کے مرض میں مبتلا تھے اور ان کا انتقال اتوار کو کیلیفورنیا میں ہوا۔

سٹین نے اپنے چالیس سالہ کیرئر کے دوران سیٹون سپیل برگ، جیمز کیمرون اور ٹم برٹن جیسے ہدایتکاروں کے ساتھ کام کیا اور انہیں حقیقی مناظر کو کمپیوٹر امیجنگ کے ساتھ ملا کر پیش کرنے کا خالق مانا جاتا تھا۔

سٹین ونسٹن کو ’ٹرمینیٹر 2‘، ’ایلیئنز‘ اور ’جراسک پارک‘ کے لیے چار مرتبہ آسکر ایوارڈ سے نوازا گیا جبکہ وہ ’بیٹ مین ریٹرنز‘، ’ایڈورڈ سیزرہینڈز‘ ، ’لاسٹ ورلڈ:جراسک پارک‘، ’اے آئی‘، ’پریڈیٹر‘ اور ’ہارٹ بیپس‘ جیسی فلموں میں اپنے کام کے لیے آسکر ایوارڈ کے لیے نامزد بھی ہوئے۔ سٹین نے حال ہی میں مقبول ہونے والی فلم’ آئرن مین‘ پر بھی کام کیا تھا۔

	سٹین نے حال ہی میں مقبول ہونے والی فلم’ آئرن مین‘ پر بھی کام کیا تھا۔

سٹین کی موت پر کیلیفورنیا کے گورنر اور سابق ہالی وڈ اداکار آرنلڈ شوارزنیگر نے کہا ہے کہ’ تفریحی صنعت ایک فطین سے محروم ہوگئی ہے اور میں نے اپنے بہترین دوستوں میں سے ایک کو کھو دیا ہے‘۔ ان کا کہنا تھا کہ سٹین کا کام اور انہیں ملنے والے چار آسکر ایوارڈ ان کی صلاحیت کا منہ بولتا ثبوت ہیں اور ان کی یاد ہمیشہ باقی رہے گی۔

سٹین ونسٹن ورجینیا میں پلے بڑھے اور یونیورسٹی آف ورجینیا سے تعلیم مکمل کرنے کے بعد پسِ پردہ کام کے آغاز سے قبل 1968 میں انہوں نے اداکاری کے میدان میں بھی قسمت آزمائی کی کوشش بھی کی۔ اس کے علاوہ انہوں نے سنہ 1972 میں والٹ ڈزنی سٹوڈیوز میں تین سالہ میک اپ اپرنٹس شپ بھی مکمل کی۔