بھارتی اداکارہ ایشوریہ رائے بھی میلے کی افتتاحی تقریب میں آئیں

بارہ دن تک جاری رہنے والے اکسٹھویں کانز فلمی میلے کی خاص بات انڈیانا جونز سلسلے کی نئی فلم ہے جس کا پریمیئر اس میلے میں ہوگا۔

انڈیانا جونز سیریز کی فلم ’ انڈیانا جونز اینڈ کنگڈم آف کرسٹ سکل‘ کے علاوہ اس میلے کے دوران ہالی وڈ کے مشہور اداکار اور ہدایتکار کلنٹ ایسٹ وڈ کی فلم ’چینجلنگ‘ اور سکرین رائٹر چالر کوفمین کی بطور ڈائریکٹر پہلی فلم بھی دکھائی جائے گی۔

اس برس فلمی میلے کی جیوری کی سربراہی اداکار شان پین کر رہے ہیں جن کا کہنا ہے کہ ’مجھے امید ہے کہ یہاں زیادہ مقابلہ نہیں ہو گا اور ہم جلد ہیں متفق ہو جائیں گے‘۔

	اس برس کانز فیسٹیول میں کوئی برطانوی فلم شامل نہیں

شان پین نے جنہیں کلنٹ ایسٹ وڈ کی فلم ’مسٹک ریور‘ میں اداکاری پر آسکر ایوارڈ کے لیے نامزد کیا گیا تھا، اپنے ساتھی کے لیے کسی بھی جانبداری کے امکان کو یکسر رد کیا۔

ان کا کہنا تھا کہ’ میں یہ نہیں جانتا کہ سنہ 1960 میں میری پیدائش سے اب تک کلنٹ ایسٹ وڈ نے کتنی فلمیں بنائی ہیں مگر مجھے انہوں نے صرف ایک میں کام دیا۔ اس لیے میرے خیال میں جانبداری کا کوئی امکان ہی نہیں ہے‘۔

اس برس کانز فیسٹیول میں کوئی برطانوی فلم شامل نہیں ہے تاہم فیسٹیول کے آرٹ ڈائریکٹر تھیاری فریماکس کے مطابق انہیں امید ہے کہ آئندہ برس کوئی برطانوی فلم اس میلے کی زینت بنےگی۔