عدالت نے برٹنی کو گزشتہ ہفتے ان کے والد کی نگرانی میں دیا تھا

عدالتی کمشنر ریوا گوٹز نے ایک ڈاکٹر کو نامزد کیا ہے جو اس بات کا جائزہ لے گا کہ لاس اینجلس ہسپتال میں داخل سپیئرز کوئی فیصلہ کرنے کی حالت میں ہیں بھی یا نہیں۔

جیمز سپیئرز چودہ فروری کو ہونے والی سنوائی میں نفسیاتی رپورٹ پیش کیے جانے تک اپنی بیٹی کے مالیاتی اور ذاتی معاملات کے نگران رہیں گے۔

عدالت نے برٹنی کو گزشتہ ہفتے ان کے والد کی نگرانی میں دیا تھا۔ اس قسم کا فیصلہ اس صورت میں دیا جاتا ہے جب عدالت کی نظر میں کوئی اپنا خیال رکھنے اور اپنے معاملات چلانے کی حالت میں نہیں ہوتا۔

بطورِ نگران برٹنی کے والد کو ان کے نقد اثاثوں پر تصرف کا اختیار ہے اور وہ کسی بھی شخص کو برٹنی سے ملاقات سے روک سکتے ہیں۔عدالت نے برٹنی کے وکیل کی جانب سے بھی یہ درخواست مسترد کر دی کہ انہیں برٹنی کے والد کی جگہ اثاثوں کا نگران مقرر کیا جائے۔

برٹنی کے والد نے گزشتہ ہفتے کے اختتام پر ان کے مینجر سام لطفی کے خلاف عدالتی حکم بھی حاصل کیا تھا جس کے تحت لطفی پچیس سالہ برٹنی سے کوئی رابطہ نہیں رکھ سکتے۔