 | | | ہیری پوٹر کی آخری کتاب اکیس جولائی کو دستیاب ہوگی |
مصنفہ جے کے رولنگ نے اپنی ہیری پوٹر سلسلے کی آخری کتاب ’دی ڈیتھلی ہالوز‘ کے بارے میں کہا ہے کہ اس کتاب کے آخری الفاظ لکھتے ہوئے انہیں خوشی کے ساتھ افسوس بھی ہوا۔ بی بی سی ٹی وی کے ایک ٹاک شو میں جے کے رولنگ نے کہا کہ ’کتاب کا آخری باب ختم کرتے ہوئے مجھے بہت افسوس ہوا۔‘ انہوں نے کہا کہ ہیری کا کیریکٹر مکمل طور پر فرضی تھا اور کسی کے بارے میں نہیں تھا تاہم ران ویسلی کا کیریکٹر ان کے ایک قریبی دوست ’شان‘ سے ملتا جلتا ہے۔ مصنف جے کے رولنگ نے جب اپنی کتاب ختم کی تو وہ اپنے ہوٹل کے کمرے میں اکیلی تھیں۔ انہوں نے کہا کہ وہ بہت روئیں اور شیمپین کی آدھی بوتل منی بار سے لے کر ایک ہی بار میں پی گئیں اور وہ اپنے گالوں پر بہتا ہوا مسکارا لے کر اپنے گھر واپس گئیں۔ جب اِن سے پوچھا گیا کہ اس بات میں کتنی سچائی ہے کہ آپ کی آخری کتاب کا آخری لفظ ’سکار‘ ہے تو انہوں نے جواب دیا ایسا بہت عرصہ پہلے تھا مگر اب نہیں۔ یہ لفظ اختتام کے قریب ضرور ہے لیکن کتاب اس لفظ پر ختم نہیں ہوتی ہے۔ جے کے رولنگ نے یہ بھی کہا کہ ساری ہیری پوٹر فلموں میں سب اداکاروں کو برطانوی رکھنا بہت بڑی کامیابی کی بات ہے۔ ہیری پوٹر کی آخری کتاب جو کہ اکیس جولائی کو دستیاب ہوگی اس کی ابھی سے سولہ لاکھ کاپیز انٹرنیٹ پر آرڈر ہوچکی ہیں۔ اس سلسلے کی تازہ ترین فلم ’آرڈر آف دی فینکس‘ کا یورپین پریمیئر لندن میں گزشتہ منگل کو ہوا اور یہ فلم گیارہ جولائی کو دنیا بھر میں نمائش کے لیے پیش کر دی جائے گی۔ | 
قطرینہ اور کرینہ کی دوستی
