 | | | پارک میں سہولیات ہوگارٹز کی عکاسی کریں گی (فائل فوٹو) |
جادوئی دنیا کے جانے پہچانے کردار ہیری پوٹر کی مہمات سے متاثر ہو کر امریکہ میں ایک تِھیم پارک بنایا جا رہا ہے۔ ریاست فلوریڈا میں ’ہیری پوٹر کی جادووئی دنیا‘ کے نام سے اس پارک کا افتتاح سنہ دو ہزار نو میں ہوگا۔ اس بارے میں ہیری پوٹر سیریز کی مصنفہ جے کے رولنگ نے کہا ’ میں نے اس منصوبے کی تفصیلات دیکھی ہیں اور میرا خیال ہے کہ ہیری پوٹر سلسلے کی کتابوں اور فلموں کے شائقین اس پارک سے مایوس نہیں ہوں گے۔‘ پارک میں جھولے، دکانیں اور دلچسپی کا دیگر سامان سیریز میں شامل ’ہوگارٹز‘ اور ’ہوگزمیٹ‘ جیسی جگہوں کی عکاسی کرے گا۔ اس بات کو یقینی بنانے کے لیے کہ مذکورہ پارک مصنفہ کے تخیل کے قریب ترین ہو، اس منصوبے کی قیادت آسکر ایوارڈ یافتہ ڈیزائنر سٹیورٹ کریگ کر رہے ہیں جو کہ ہیری پوٹر کی فلم سازی میں بھی شامل رہے ہیں۔ ان کا کہنا تھا ’ہمارا بنیادی ہدف یہ یقینی بنانا تھا کہ پارک کتاب میں دکھائی جانے والی ہیری پوٹر کی جادووئی دنیا کا صحیح عکاس ہو۔‘ ہیری پوٹر سلسلے کی کتابوں کا ترجمہ پینسٹھ زبانوں میں ہو چکا ہے اور دنیا بھر میں سیریز کی بتیس کروڑ پچاس لاکھ کاپیاں فروخت ہو چکی ہیں۔ اسی طرح اس سلسلے کی فلمیں دنیا بھر میں ایک اعشاریہ سات ارب پونڈ کا کاروبار کر چکی ہیں۔ سلسلے کی پانچویں فلم ہیری پوٹر اینڈ دی آرڈر آف فینکس(Harry Potter and the Order of the Phoenix) برطانیہ میں تیرہ جولائی سے نمائش کے لیے پیش کی جا رہی ہے جبکہ سیریز کی آخری کتاب ہیری پوٹر اینڈ ڈیتھلی ہالوز(Harry Potter and Deathly Hallows) اکیس جولائی کو منظر عام پر آ رہی ہے۔
| 
قطرینہ اور کرینہ کی دوستی
