نارائن باریٹھ بی بی سی، جے پور

	جتیندر کےخاندان نےرانی پورا میں تین بیگھا زمین خریدی ہے

محکمہ ریونیو ریکارڈ کے مطابقجتیندر اور ان کے خاندان نے بوندی کے ہنڈولی تحصیل کے رانی پورا میں تین بیگھا زمین خریدی ہے۔

زمین کا یہ سودا ایک اپریل دو ہزار چھ کو ہوا۔ ہنڈولی تحصیل کے ریکارڈ کے مطابق رانی پورا کے چھوٹے لال نے ایک لاکھ تیس ہزار میں اس اراضی کو کپور خاندان کو فروخت کی ہے۔

اس سے پہلے فلم اداکار امیتابھ بچن اور عامر خان کے زرعی اراضی خریدنےپر کافی تنازعہ ہوا تھا۔ امیتابھ کو اس سلسلے میں مقدمہ کا بھی سامنا کرنا پڑا ہے۔

تاہم جتیندر کے زرعی اراضی کے خریدداری میں تنازعہ نہیں ہے اور بطور خریدار جتندر عرف روی کپور، ان کی اہلیہ شوبھا کپور ولدیت گوپال سپّی، اور بیٹا توشار کپور اور بیٹی ایکتا کپور کا نام درج ہے۔

بوندی میں نئے کسان بنے ان ستاروں کا پتہ کرشنا بنگلو ، گولموہر کراس روڈ، ممبئی درج کیا گيا ہے۔

سرکاری ذرائع نے بھی اس زمین کی خریداری کی تصدیق کی ہے۔ اس سودے کو حتمی شکل دینے کے لیے شوبھا کپورکو بوندی کا کئي چکر لگانے پڑے تھے حالانکہ باقی کاغذی کارروائی ممبئی میں ہی پوری گئی تھی۔

کپور خاندان نے زمین فروخت کرنے والے چھوٹے لال کو ہی زمین کی دیکھ بھال کا ذمہ سونپا ہے۔

جنوب مشرقی راجستھان میں بوندی نے حال کے برسوں میں دھان کی فصل کے لیے کافی نام کمایا ہے۔

ویسے تین بیگھا زمین پر بڑی کاشتکاری تو مشکل ہے لیکن مقامی لوگ اپنے ساتھ ملک کی مشہور ٹی وی سیریل ’ کیونکہ ساس بھی کبھی بہو تھی‘ کی ڈائریکٹر ایکتا کپور کے خاندان کو کاشتکاروں کی فہرست میں دیکھ کر کافی خوش ہوں گے۔