عارف وقار بی بی سی اردو ڈاٹ کام، لاہور

	راگنی اور رام لال فلم ’سہتی مراد‘ میں

بڑی بڑی آنکھوں والی راگنی کو متعارف کرانے کا سہرا ہدایتکار روپ۔ کے۔ شوری کے سر تھا جِن کے ہمسائے میں گوجرانوالا سے ایک فیملی آکر آباد ہوئی تھی۔ ہدایتکار کی جوہر شناس نگاہ اِس گھرانے کی ایک لڑکی پہ ٹِک گئی اور مسٹر شوری نے لڑکی کے باپ سے اس کے سکرین ٹیسٹ کی اجازت چاہی۔ نتیجہ شاندار نکلا اور لڑکی کو ’راگنی‘ کا فلمی نام دے کر نئی فلم دُلا بھٹی میں کاسٹ کر لیا گیا۔ فلم کے ہیرو لاہور کے ایک بہت شوقین مزاج امیر زادے ایم۔ ڈی۔ کنور تھے جِن کا انارکلی میں بہت بڑا کاروبار تھا لیکن چہرے پر ایک بار چُونا لگوانے کے بعد انہوں نے محسوس کر لیا تھا کہ اب اُن کی زندگی فلم ایکٹنگ کے کاروبار سے باہر نہیں جاسکتی۔

فلم شاہ جہان سے انارکلی تک  قبل از تقسیم کے ہندوستان کی معروف فلمی ہیروئن اور پاکستان کی ابتدائی فلموں میں کریکٹر رول ادا کرنے والی اداکارا راگنی کا 27 فروری کو لاہور کے ایک ہسپتال میں انتقال ہوگیا۔ زندگی کے آخری ایام میں انہوں نے اپنی اولاد پر بوجھ بننے کی بجائے لاہور کے ایک محلّے میں تنہائی اور سادگی کی زندگی گزارنے کو ترجیح دی۔ متحدہ ہندوستان کی فلم شاہ جہان سے لے کر پاکستانی فلم انارکلی تک انہوں نے یادگار کردار ادا کئے اور بعد میں پاکستان کی کچھ پنجابی فلموں میں بھی کام کیا

فلم کا مقبول ترین گیت وہ تھا جِس میں راگنی اُن کی غُلیل سے کھیلتی ہے اور اسے والہانہ پیار کرتے ہوئے گاتی ہے:

’بول بول نی گُلیلے میرے چن دِیئے‘

یہ گیت شروع ہوتے ہی ہال میں موجود زندہ دلانِ لاہور مستی میں جھومنے لگتے۔ کئی لوگوں نے راگنی پر فلمائے ہوئے اس گیت کی خاطر بار بار یہ فلم دیکھی۔ راگنی پر فلم بند ہونے والے دیگر گیتوں میں یہ دو گیت بھی خاصے مقبول ہوئے :

’رب دی جناب وِچوں ایہو دِل منگدا‘
اور
’آکھے نہ لگدی انّھی جوانی‘

	راگنی اور کنور فلم ’دُلّا بھٹی‘ میں

دُلا بھٹی کی کامیابی کے بعد کئی فلم سازوں نے راگنی کو کاسٹ کرنا چاہا لیکن اپنے والد کے مشورے سے راگنی نے فلم ’ہمت‘ میں کام کرنے کا فیصلہ کیا۔ اس فلم کے ہدایتکار بھی آر۔ کے۔ شوری تھے، موسیقی ماسٹر گوبند رام کی تھی اور مکالمے عزیز کاشمیری نے لکھے تھے۔ فلم کے اداکاروں میں بیگ، کنور، منورما، ظہور شاہ، کملا اور مجنوں کے علاوہ لاہور کے مشہور ترین ایکٹر ماسٹر غلام قادر بھی شامل تھے۔

’ہمت‘ کی شاندار کامیابی کے بعد راگنی نے فلم ’سہتی مُراد‘ میں مرکزی کردار ادا کیا۔ پنجاب کی اِس لوک کتھا کو منوہر سنگھ صحرائی نے فلم سکرپٹ کی شکل دی تھی اور گیت عزیز کاشمیری اور ولی نے لکھے تھے۔ فلم کی موسیقی اُس وقت کے معروف ترین فلمی موسیقار غلام حیدر نے ترتیب دی تھی اور پلے بیک گلوکاری کےلئے امراؤ ضیا بیگم اور شمشاد بیگم کی خدمات حاصل کی گئ تھیں۔ راگنی پر فلمایا ہوا ، شمشاد کا یہ گیت انتہائی مقبول ہوا:
اُچّی ماڑی تے دُدھ پئی رِڑکاں
مینوں سارے ٹبّر دیاں جھِڑکاں

	راگنی اور کرن دیوان فلم ’میرا ماہی‘ میں

راگنی کی تیسری کامیاب فلم ’میرا ماہی‘ تھی۔ یہ بھی 1941 میں بنی اور اس میں راگنی کے مقابل کرن دیوان کو لیا گیا۔ اس فلم کی کہانی بی۔ آر چوپڑا اور ایم ۔آر۔ کپور نے مِل کےلکھی تھی اور مکالمے لکھوانے کےلئے لاہور کے ایک مصنف ایم ۔ سروری کی خدمات حاصل کی گئی تھیں۔

یہ امر دلچسپی سے خالی نہیں کہ بی۔ آر۔ حوپڑا کی طرح ہیرو کرن دیوان بھی ایک فلم جرنلسٹ تھے اور لاہور سے ایک رسالہ ’جگت لکشمی‘ نکالتے تھے۔

راگنی کے ساتھ ’میراماہی‘ میں کرن دیوان کی آمد ایک نیک فال ثابت ہوئی اور اس فلم کی کامیابی کے بعد انھیں بمبئی بُلالیا گیا جہاں انھوں نے بےشمار فلموں میں کام کیا۔ راگنی کو بھی یہ پیشکس ہوئی لیکن انھوں نے والد کے مشورے پہ لاہور چھوڑنے سے انکار کردیا۔ بعد کے حالات نے ثابت کیا کہ یہ فیصلہ غلط نہیں تھا کیونکہ 1942 کے بعد راگنی کو پونجی، پٹواری، داسی، من مانی، دھمکی، کیسے کہوں اور بِندیا جیسی فلموں میں کام کرنے کا موقع ملا جہاں اُن کےمقابل ایم اسماعیل، اوم پرکاش، الناصر، نجم الحسن اور غلام محمد جیسے منجھے ہوئے اداکار کام کر رہے تھے۔

1946 میں راگنی کو ایک نئے ہیرو کے ساتھ کاسٹ کیا گیا۔ فلم کا نام تھا ’فرض‘ اور ہیرو تھا سدھیر جو بعد میں پاکستانی فلموں کا جنگجو ہیرو کہلایا۔

راگنی کی شہرت اب پنجاب سے نکل کر کلکتہ اور بمبئی تک پھیل چُکی تھی اور والد کا نیا مشورہ یہ تھا کہ اب بمبئی جانے کا مناسب وقت آگیا ہے، چنانچہ ایک بھاری معاوضے کے عوض راگنی نے فلم شاہ جہان میں سہگل کے مقابل مرکزی کردار قبول کر لیا۔

	راگنی اور سدھیر فلم ’فرض‘ میں

فریادی نے بادشاہ سے درخواست کی کہ قتل و غارت کا یہ سلسلہ کسی طرح رکوایا جائے۔ بادشاہ نے فیصلہ کیا کہ روحی کو محل میں بلا کر شاہی مہمان کے طور پر ٹھہرایا جائے اور خود اُس کے لئے ایک مناسب رشتہ تلاش کیا جائے لیکن جب روحی (راگنی) محل میں آکر رہنے لگتی ہے تو محلاتی سازشوں کا ایک ایسا جال بُنا جاتا ہے جس کی جکڑ میں خود بادشاہ بھی آ جاتا ہے۔

راگنی کے حسن و جمال، سہگل کی آواز اور نوشاد کی موسیقی نے ایسا جادو جگایا کہ ہر جانب فلم شاہ جہان کا ڈنکا بجنے لگا۔ راگنی نے اس فلم کا معاوضہ پچاس ہزار لیا تھا۔ آج سے ساٹھ برس پہلے اس رقم میں پوری فلم پروڈیوس ہوجاتی تھی لیکن اس شاندار کامیابی کے بعد جب ہدایتکار اے۔ آر۔ کاردار اپنی اگلی فلم کے لئے راگنی کے پاس گئے تو اُس نے ایک لاکھ روپے کا مطالبہ کردیا۔ کاردار نے یاد دلایا کہ میں نے تمہیں پنجاب کے محدود سرکٹ سے نکال کر سارے ہندوستان میں متعارف کرایا ہے اور پہلے ہی تمہیں سب سے زیادہ معاوضہ دے رہا ہوں، اب اسے دوگنا تو مت کرو۔ اس پر راگنی کے والد نے جواب دیا ’آپ بزنس کر رہے ہیں کاردار صاحب، آپ کو معلوم ہونا چاہیئے کہ جب کسی چیز کی مانگ بڑھتی ہے تو اُس کی قیمت میں بھی اضافہ ہوجاتا ہے۔‘

	راگنی کے آخری ایام گوشہء تنہائی میں گزرے

راگنی کی اداکاری نے دِل آرام کے کردار کو لا فانی بنا دیا ہے اور اگرچہ انارکلی کی کہانی مستقبل میں شاید ہزاروں بار فلمائی جائے گی لیکن انور کمال کی انارکلی میں راگنی کا کردار امر ہو چکا ہے۔