ریحانہ بستی والا بی بی سی اردو ڈاٹ کام، ممبئی

ایک فلم کے بعد دوسری فلم کیوں کے سوال پر لگے رہو منا بھائی کے پروڈیوسر ودھو ونود چوپڑہ نے بی بی سی سے بات کرتے ہوئے کہا کہ اس میں کسی طرح کا تنازعہ نہیں ہے اور ان کی فلم غیرملکی فلموں میں ’بہترین فلم‘ کے زمرے میں پیش ہوگی۔

چوپڑہ نے اعتراف کیا کہ فلم ’رنگ دے بسنتی‘ ایک اچھی فلم ہے اور جب اس کی خصوصی اسکریننگ ہو رہی تھی اس وقت وہ پہلے شخص تھے جنہوں نے صرف دس منٹ کی فلم دیکھنے کے بعد ہی اسے دوبارہ شروع سے دکھانے کے لئے کہا تھا۔

چوپڑہ کا کہنا ہے کہ انہیں ان کی فلم ’لگے رہومنا بھائی‘ کے لئے پوری دنیا سے مداحوں کے فون اور پیغامات موصول ہوئے تھے جس میں انہوں نے فلم کی کافی تعریف کی ہے اور کہا کہ اس طرح کی فلم کو دنیا کے سامنے پیش کرنا ضروری ہے۔

	فلم میں ’گاندھی گیری‘ کو آج کے دورے کے لیے مزاحیہ طور پر پیش کی گئی ہے

فلم کو آسکر ایوارڈ کی فہرست میں شامل کرنے کے لئے چوپڑہ کی اپنی غیرملکی کمپنی ایروز انٹرنیشنل ضروری کارروائی پورا کر رہی ہے۔ چوپڑہ نے بتایا کہ یونیورسٹی آف ساؤتھ کیلیفورنیا کے طلباء اور پریس کے جانب سے انہیں مدعو کیا گیا ہے کہ وہ فلم کی نمائش کریں۔

چوپڑہ کے مطابق یہ ان کے لئے ایک اعزاز ہے کیونکہ اس فلم انسٹی ٹیوٹ نے دنیا کو بہترین فلمساز اور فنکار دیے ہیں جن میں جیمز آئیوری جارج لوکاس شامل ہیں.

رنگ دے بسنتی سے پہلے کینیڈا نے اداکار جان ابراہام کی فلم ’واٹر‘ کو غیرملکی زبنا کی فلموں کے زمرے میں آسکر میں بھیجا ہے۔

فلم ’لگے رہو منا بھائی‘ میں مہاتما گاندھی کا فلسفہ ’عدم تشدد‘ کا اس نئے زمانے میں تجربہ کیا گیا ہے جسے کامیاب بھی دکھایا گیا۔ فلم کافی مقبول ہوئی ہے اور اسی لئے اس فلم کو اب ممبئی میں بھی ٹیکس فری کر دیا گیا ہے۔