عارف وقار بی بی سی اردو ڈاٹ کام، لاہور

	کمپنی عہد کی ایک پینٹنگ، نئی تعبیر کے لبادے میں

لیکن سندھ کے ایک آرٹسٹ کو اظہارِ فن کے لئے لاہور کا رُخ کیوں کرنا پڑا؟

احمد علی کا کہنا ہے کہ انھوں نے کراچی میں اپنے فن پاروں کی نمائش کے لئے بہت پاپڑ بیلے لیکن وہاں کمرشل گیلریوں کا تسلط ہے جنھیں فن پاروں کے تخلیقی جوہر سے زیادہ اسکی کاروباری اہمیت کا خیال رہتا ہے۔

	کراچی میں کمرشل گیلریوں کا تسلط ہے

اگرچہ اُن کی بیشتر تصاویر سلیٹوں پر بنائی گئی ہیں اور جہاں موضوع ایک سلیٹ کی حدود سے باہر نکلتا ہوا محسوس ہو وہاں دو یا تین سلیٹس استعمال کی گئی ہیں، لیکن نمائش گاہ میں داخل ہوتے ہی سب سے پہلے جِس تصویر پر نگاہ پڑتی ہے وہ بڑے سائز کے کینوس پر بنائی گئی ہے اور دو سو برس پرانے ایک فوجی قلعے کی غمازی کرتی ہے۔ البتہ عمارت پہ لہراتے ہوئے برطانوی جھنڈے کی چمک دمک ماند پڑ چکی ہے اور سرخ چلیپائی لکیروں پر سفیدی کی تہہ سی آگئی ہے۔

	سلیٹ پر نقش برطانوی دور کی ایک اور شبیہہ

سلیٹوں پر بنی ہوئی شبیہوں میں آپ کو برٹش راج کے کئی معروف چہرے دکھائی دیتے ہیں مثلاً لارڈ میکالے، رُڈیارڈ کپلنگ اور جارج پنجم وغیرہ۔

جیکب آباد کے مُوسِس سرجیکب کے لئے مصّور کے دِل میں ایک نرم گوشہ دکھائی دیتا ہے اور وہ عوامی بھلائی کے اُن کاموں کو خراجِ عقیدت پیش کرنا چاہتے ہیں جو سر جان جیکب نے اپنی زندگی میں انجام دیئے اور جن کی بدولت وہ علاقے کے عوام میں ایک پیر فقیر کا درجہ حاصل کر چکے ہیں، حتیٰ کہ اُن کا باقاعدہ مزار تعمیر کیا گیا ہے جس پر لوگ چادریں بھی چڑھاتے ہیں۔

مصّور کا کہنا ہے کہ دورِ استعمار میں جن انگریز افسروں نے عوام میں گُھل مل کر اُن کی فلاح و بہبود کو زندگی کا مطمح نظر بنا لیا تھا، انھیں فراموش نہیں کرنا چاہیئے۔