سیف علی خان کو اس سال بالی وڈ کے بہترین اداکار کا ایوارڈ دیا گیا ہے

سیف علی خان کی انسانیت اور ہمدردی کا مظاہرہ اس وقت ہوا جب ممبئی میں انکی گاڑي سے ایک تیرہ سالہ بچہ ٹکرا کر زخمی ہو گیا۔ سیف اس وقت اپنے ایک شو میں پرفارم کرنے جا رہے تھے۔

سیف کی کار کی ٹکر سے شکیل شیخ نامی بچے کی پیر کی ہڈی ٹوٹ گئی تھی ۔ مصروفیات کے باوجود سیف علی خان نے شکیل کو ہسپتال میں داخل کروایا اور خود ہی پولیس کو اس واقعہ کی اطلاع بھی دی۔

پولیس نے سیف علی خان کے خلاف مقدمہ درج کیا لیکن بعد میں انہیں ضمانت پر رہا کر دیا گیا۔

سیف نے شکیل کے علاج کے لئے ہسپتال کا خرچ اٹھانے کا اعلان کیا ہے ۔ اس واقعہ کے بعد سیف کا کہنا ہے کہ ’بھلے ہی ہمارا سسٹم دھیما ہے لیکن اگر کوئی جرم نہیں کیا گيا ہے تو بہتر یہی ہوگا کہ اصولوں کے مطابق ہی چلا جائے ۔

سیف علی خان کی ہی طرح سال دو ہزار دو میں سلمان خان نے غفلت کی حالت میں فٹ پاتھ پر سوئے لوگوں پر اپنی گاڑی چڑھا دی تھی ۔ اس واقعہ میں ایک شخص ہلاک ہو گیا تھا۔ لیکن اس وقت سلمان وہاں سے فوراً چلے گئے تھے۔ اس معاملے میں ان پر ممبئی کی ایک ذیلی عدالت میں مقدمہ بھی چل رہا ہے۔