ریحانہ بستی والا ممبئی

زلزلےسے پاکستانی زیرِ انتظام کشمیر میں 25000 لوگ ہلاک ہوئے

اداکار سنجے دت نے ایک بار پھر لاکھوں زلزلہ متاثرین کی امداد کے لیے کنسرٹ کرنے کی تیاریاں شروع کر دی ہیں۔ اس سے قبل سونامی متاثرین کے لیے سنجے دت نے اپنے دیگر بالی وڈ ساتھیوں کی مدد سے فروری میں بڑے پیمانے پر پروگرام کیا تھا جس میں بالی وڈ اور لالی وڈ کے فنکاروں نے شرکت کی تھی۔

سنجے دت نے ممبئی میں صحافیوں کو بتایا کہ فنکار کا دل حساس ہوتا ہے اور ہمیں لاکھوں لوگوں کو یوں بے سہارا ، بے یار ومددگار دیکھ کر بہت تکلیف ہو رہی ہے۔ ان کا کہنا تھا کہ بالی وڈ نے ہمیشہ ایسے مواقع پر متحد ہو کر کام کیا ہے اور انہیں یقین ہے کہ اس مرتبہ بھی ان کے بلانے پر سب یکجا ہوں گے۔

پروگرام کے وقت اور مقام کے بارے میں ان کا کہنا تھا کہ ابھی صرف فیصلہ ہوا ہے اور بہت جلد وہ اپنے ساتھیوں کے ساتھ مل کر لائحہ عمل طے کریں گے۔

اس ہولناک تباہی سے قبل سلمان خان پاکستان میں ایک امدادی پروگرام میں شرکت کرنے دسمبر میں جانے والے تھے اور اس کے لیے پاکستان کے منتظمین نے سلمان کے بھائی سہیل خان کی کمپنی سے رابطہ بھی قائم کر لیا تھا۔ اب دیکھنا یہ ہے کہ مالی امداد کے لیے فنڈ اکٹھا کرنے کے لیے پروگرام پاکستان میں ہی ہو گا یا پھر بھارت میں پروگرام کر کے اس سے جمع رقم حکومت پاکستان کے حوالے کی جائے گی ۔