 |  کیرا کی خوبصورتی اور ہالی ووڈ امیج فلم کو مشہور کر سکتا ہے |
ہالی ووڈ کے مشہورِ زمانہ مزاحیہ اداکار چارلی چپلن کی 22 سالہ پوتی کیرا چپلن اپنا فلمی کیرئیر لیڈی گوڈیوا پر بننے والی ایک فلم سے شروع کرنے والی ہیں۔ اس فلم کی فلمبندی کا آغاز 2005 کے وسط میں ہوگا اور یہ فلم 2006 میں نمائش کے لیے پیش کی جائے گی۔فلمبندی کے لیے مجوزہ مقامات میں کوونٹری میموریل پارک، سٹی ہال اور وراک کا قلعہ بھی شامل ہیں۔ اس فلم کے پروڈیوسر ڈینس ٹموتھی کا خیال ہے کہ کیرا چپلن کے اس فلم میں کام کرنے سے ان کی فلم کی شہرت میں اضافہ ہوگا۔ ڈینس ٹموتھی کا کہنا تھا کہ ’ کیرا کی خوبصورتی اور ہالی ووڈ امیج فلم کو مشہور کر سکتا ہے۔‘ ٹموتھی نے بی بی سی کو بتایا کہ کیرا سے قبل لیڈی گوڈیوا کے کردار کے لیے ہالی ووڈ کی اداکارہ پامیلا اینڈرسن کا نام زیرِ غور تھا لیکن عمر کے فرق کی بنا پر انہیں فلم نہیں لیا گیا۔ ڈینس ٹموتھی کا کہنا ہے کہ ان کی یہ فلم ایک فیملی مووی ہوگی اور اس میں ایسا کچھ نہیں ہوگا جس پر کسی کو کوئی اعتراض ہو۔ کیرا چپلن کے علاوہ اس فلم میں امریکی اداکارہ جینیفر ٹیلی اور ٹی وی اداکار انتھونی ہیڈ بھی کام کریں گے۔ اس فلم کی تیاری پر چار اعشاریہ چار ملین ڈالر لاگت آئے گی اور امید ہے کہ اسے اگلے برس کانز فلم میلے میں نمائش کے لیے پیش کیا جائے گا۔ | 
یہ صفحہ دوست کو ای میل کیجیئے
پرِنٹ کریں
