ریت کی بوریوں اور کنکریٹ کی دیواروں کے ساتھ ساتھ مُصوری کے رنگ

عراق میں آجکل کے ماحول میں ہر سرکاری عمارت اور ذرائع ابلاغ کے دفاتر کے باہر بم حملوں سے بچاؤ کے لیے تیرہ فٹ اونچی دیوار ہے۔

عراقیوں نے سلیٹی رنگ کے ان ڈھانچوں کو مصوری کے لیے کینوس کے طور پر استعمال کرنا شروع کر دیا ہے۔

فرانسیسی سفارتخانے کے باہر دیوار پر جنگلی گھوڑے، اڑتے ہوئے قالین اور خیالوں کی دنیا کے مینار بن چکے ہیں۔ اس کے ساتھ ساتھ ایک سادہ سا منظر ہے جس میں ایک عراقی کسان ٹریکٹر پر اپنے بیوی بچوں کے پاس گھر آ رہا ہے۔

مصوری کے اس فن پارے کے ہر حصے پر امن کی علامت فاختہ کی تصویر ہے۔

خبر رساں ایجنسی رائٹرز کے دفتر کے باہر دیوار کو پھولوں اور عراقی پرچم کی تصاویر سے سجایا گیا ہے۔

بی بی سی کے دفتر کے باہر دیوار پر عراق کی تاریخ کو تصاویر میں بیان کیا گیا ہے۔

اس دیوار پر سینکڑوں سال پرانی جنگوں اور بادشاہوں کی زندگی کے مناظر بنائے گئے ہیں۔

شہر بھر میں مختلف مقامات پر نظر انے والی تصاویر کے موضوعات تاریخ اور مصور کے تخیل کا اظہار ہیں۔

عراق میں بی بی سی کے نامہ نگار راجر ہیرنگ کا کہنا ہے انہیں بتایا گیا ہے کہ عراقی تاریخ کے یہ مناظر فائن آرٹس کے ایک پروفیسر نے بنائے ہیں۔