ساجد اقبال بی بی سی اردو ڈاٹ کام

پریٹی زنٹا نے اس خواہش کا اظہار کیا کہ ان کی نئی فلم ’ویز زہرہ‘ کا پریمیئر پاکستان میں ہو

دونوں بالی ووڈ سٹارز آج کل ایک شو میں شرکت کرنے کے لئے برطانیہ کا دورہ کر رہے ہیں۔ شو کے دیگر شرکاء میں شاہ رخ خان، رانی مکرجی، پریانکا چوپڑا اور ارجن رام پال شامل ہیں۔

انہوں نے کہا کہ ان کی خواہش ہو گی کہ ان کی نئی فلم ’ویز زہرہ‘ کا پریمیئر پاکستان میں ہو۔ انہوں نے کہا کہ جیسے جیسے لوگوں کے خیالات و جذبات ہوتے ہیں وہ فلموں میں بھی نظر آتے ہیں۔

’کچھ عرصہ پہلے پاکستان اور انڈیا کے مابین تعلقات کشیدہ تھے تو یہ کشیدگی دونوں ملکوں میں فلمی کہانیوں میں بھی نظر آ رہی تھی۔ اب دونوں ملکوں کے تعلقات میں کچھ بہتری آئی ہے تو یہ دونوں ملکوں میں بننے والی فلموں میں بھی نظر آ رہی ہے۔‘

’فلمی دنیا سے وابستہ لوگ مذہبی اور سیاسی تعصبات سے بلند ہو کر سوچتے ہیں‘

اداکار سیف علی خان نے کہا کہ فلمی دنیا سے وابستہ لوگ مذہبی اور سیاسی تعصبات سے بلند ہو کر سوچتے ہیں اسی لیے پاکستانی اداکاروں کی انڈین فلموں میں پرفارمنس کا ہر سطح پر خیر مقدم کیا گیا۔

حال ہی کراچی میں ہونے والے اپنے ایک شو کا ذکر کرتے ہوئے سیف علی خان نے کہا کہ عوام کی زبردست پذیرائی نے ثابت کیا کہ فن کے پرستار سرحدوں کو نہیں مانتے۔

تاہم انہوں نے خبر دار کیا کہ پاکستان اور ہندوستان کو آہستہ روی سے آگے بڑھنا چاہیے اور موجودہ دنوں میں ہونے والی پیش رفت سے زیادہ امیدیں نہیں باندھنی چاہیے کہیں ایسا نہ ہو انہیں ماضی کی طرح پھر مایوسی ہو۔