مودی کی پیمائش مکمل، اب مادام تسود میں نظر آئیں گے

بھارتی وزیر اعظم نریندر مودی جلد ہی برطانیہ کے معروف مادام تسود میوزیم کا حصہ بننے والے ہیں۔

رواں سال اپریل سے لندن، سنگاپور، ہانگ کانگ اور بینکاک کے مادام تسود میوزیم میں ان کو دیکھا جا سکے گا۔

وزیر اعظم مودی سے قبل بھارت کے کئی شخصیات مادام تسود کی زینت بن چکی ہیں جن میں مہاتما گاندھی، اندرا گاندھی سے لے کر شاہ رخ خان اور ایشوریہ رائے تک شامل ہیں۔

دنیا بھر میں موم کے پتلوں کے لیے معروف میوزیم تساد کی طرف سے جاری کردہ بیان میں کہا گیا ہے کہ ’بھارتی وزیر اعظم مودی عالمی سیاست میں انتہائی متاثر کن شخصیت ہیں۔ انھیں سنہ 2015 میں ٹائم میگزین نے دنیا کی سرفہرست دس اہم شخصیات کے لیے شارٹ لسٹ کیا تھا۔‘

بیان میں کہا گیا ہے کہ ’مودی سوشل میڈیا پر بھی بہت مقبول ہیں اور اوباما کے بعد ٹوئٹر پر دوسرے سب سے زیادہ مقبول سیاست دان ہیں۔‘

بیان کے مطابق میوزیم کے کاریگروں نے رواں سال کے آغاز میں دہلی جا کر ان کے جسم اور چہرے مہرے کی پیمائش کی تھی۔

اس مجسمے میں مودی اپنے مخصوص کرتے اور بادامی رنگ کی جیکٹ میں نمستے کرتے ہوئے نظر آئیں گے۔

مودی نے کہا ہے جس پیشہ ورانہ انداز سے ان کی پیمائش لی گئی ہے وہ اسے دیکھ کر ’ان فنکاروں کی مہارت کے قائل ہو گئے ہیں۔‘

مادام تسود میں دنیا کی معروف شخصیتوں کے موم کے مجسمے نمائش کے لیے رکھے گئے ہیں۔

بھارتی رہنما مہاتما گاندھی پہلی بھارتی شخصیت ہیں جو مادام تسود کی زینت بنے اور امیتابھ بچن پہلے بالی وڈ اداکار ہیں جنھیں وہاں جگہ ملی۔

مادام تسود میں سابق بھارتی وزیر اعظم اندرا گاندھی بھی موجود ہیں۔

بھارتی سینیما سے امیتابھ بچن کے علاوہ، شاہ رخ خان، ایشوریہ رائے، کرینہ کپور، قطرینہ کیف، سلمان خان، رتیک روشن اور مادھوری دیکشت وغیرہ شامل ہیں۔

ان کے علاوہ کھیل کے میدان سے سچن تیندلکر بھی اس میوزیم کی زینت ہیں۔