کے کے: معروف انڈین گلوکار کرشنا کمار کنتھ عرف کے کے 53 برس کی عمر میں کلکتہ میں وفات پا گئے
،تصویر کا ذریعہSanjay Das
- مصنف, پرابھاکر مانی تیواری
- عہدہ, کلکتہ سے بی بی سی ہندی کے لیے
انڈیا کے معروف گلوکار کرشنا کمار کنتھ (کے کے) جنھوں نے گذشتہ تین دہائیوں میں بالی وڈ فلموں کے لیے متعدد مقبول گانے گائے 53 برس کی عمر میں کلکتہ میں وفات پا گئے ہیں۔
انھیں کلکتہ میں ایک کالج کے فنکشن میں مدعو کیا گیا تھا اور اس لائیو پرفارمنس کے دوران بھی انھوں نے طبیعت کی ناسازی کے شکایت کی تھی۔
منگل کی شام اسی لائیو پرفارمنس سے واپسی پر انھیں ایک نجی ہسپتال پہنچایا گیا تھا جہاں تین ڈاکٹروں نے ان کی موت کی تصدیق کی تھی۔ ان کی میت کو پوسٹ مارٹم کے لیے بھجوا دیا گیا ہے۔
وزیرِ مملکت اروپ بسواس جو فوری طور پر ہسپتال پہنچے تھے نے میڈیا سے بات کرتے ہوئے کے کے کی وفات کی تصدیق کی۔
انھوں نے ہسپتال کے باہر صحافیوں سے بات کرتے ہوئے کہا کہ ’ڈاکٹروں کا ابتدائی اندازہ یہی ہے کہ کے کے دل کا دورہ پڑنے کے باعث ہلاک ہوئے ہیں۔ تاہم ان کی موت کی اصل وجہ جاننے کے لیے میت کو پوسٹ مارٹم کے لیے بھجوا دیا گیا ہے۔
ان کا مزید کہنا تھا کہ ’مجھے اس بارے میں اس وقت معلوم ہوا جب میں دفتر سے گھر پہنچا اور اطلاعات کے مطابق کے کے کو مردہ حالت میں ہسپتال لایا گیا تھا۔‘
کے کے نے متعدد زبانوں کی فلموں میں اپنی آواز کا جادو جگایا جن میں تمل، تیلوگو، کناڈا، مالایالم، مراٹھی، بنگالی، ہندی اور گجراتی فلمیں شامل ہیں۔
وہ کلکتہ میں گوروداس کالج میں ایک لائیو پرفارمنس کے لیے آئے ہوئے تھے تاہم اس پرفارمنس کے دوران ہی اچانک ان کی طبیعت ناساز ہوئی اور وہ واپس ہوٹل چلے گئے۔
End of سب سے زیادہ پڑھی جانے والی
،تصویر کا ذریعہSanjay Das
ہوٹل کے باہر موجود ان کے مداحوں نے جب ان کے ساتھ تصویر بنانے کی خواہش ظاہر کی تو انھوں نے طبیعت کی ناسازی کے باعث انھیں منع کر دیا۔
اس دوران جب ان کی طبیعت مزید خراب ہوئی تو انھیں ایک نجی ہسپتال لے جایا گیا جہاں ڈاکٹروں نے تصدیق کی کہ ان کی وفات وہاں پہنچنے سے پہلے ہی ہو چکی تھی۔
کے کے نے بالی وڈ کی متعدد فلموں کے لیے گانے گائے جن میں ’تڑپ تڑپ کے اس دل سے‘، ’آنکھوں میں تیری‘، ’کیا مجھے پیار ہے‘ اور دیگر متعدد مقبول گانے شامل ہیں۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام, 1
انھوں نے اپنے بالی وڈ کریئر کا آغاز ’ہم دل دے چکے صنم‘ سے بطور پلے بیک سنگر کیا۔ کے کے مقبول گلوکار اور کمپوزر کشور کمار کے بیٹے امت کمار کے بہت قریبی دوست تھے۔‘
امت کی بیوی ریما گنگولی نے فیس بک پر ایک پیغام میں کے کے کی وفات کا اعلان کیا۔ انڈیا کے وزیرِاعظم نریندر مودی نے کے کے کی وفات پر دکھ کا اظہار کرتے ہوئے ایک تعزیتی ٹویٹ کیا ہے۔
انھوں نے ٹویٹ میں لکھا کہ ’گلوکار کرشنا کمار کنتھ کی اچانک موت پر دکھ ہے۔ ان کے گانوں میں جذبات کی مختلف انداز میں عکاسی ہوتی تھی اور ان کے گانے ہر عمر کے افراد کو متاثر کرتے تھے۔
’وہ اپنے گانوں کے ذریعے یاد رکھے جائیں گے۔‘
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام, 2
ان کی وفات پر بالی وڈ سمیت دنیا بھر میں سوشل میڈیا پر ان کے مداحوں کی جانب سے تعزیتی پیغامات شیئر کرنے کا سلسلہ جاری ہے۔
گلوکار ارمان ملک نے ایک ٹویٹ میں لکھا کہ ’یہ سال انڈین میوزک کے لیے ایک سیاہ سال ہے، پہلے لتا منگیشکر، پھر بپی، سدھو موسے والا اور اب کے کے۔ یہ سب ایک ذاتی نوعیت کے نقصان جیسا محسوس ہو رہا ہے۔‘
انڈین گلوکارہ شریا گوشل نے لکھا کہ ’مجھے اس خبر کو سن کر یقین نہیں آ رہا ہے۔ اس حقیقت کو قبول کرنا بہت مشکل ہے، میرے دل کے کئی ٹکڑے ہو چکے ہیں۔
انڈیا کی طرح پاکستان میں بھی اس وقت کے کے کی وفات ہی سوشل میڈیا پر موضوعِ بحث ہے اور #RIPKK ٹاپ ٹرینڈ ہے۔
،تصویر کا ذریعہTwitter/@shubhankrmishra
ان کے مداح نہ صرف ان کے معروف گانے شیئر کر رہے ہیں بلکہ کے کے کی زندگی اور کریئر کے بارے میں بھی بات کر رہے ہیں اور انھیں خراجِ تحسین پیش کر رہے ہیں۔
صارف علی خان نے لکھا کہ ’کے کے آپ ہمارے لڑکپن کا ایک اہم حصہ تھے۔ ہم نے آپ کے سارے گانے اونچی آواز میں گائے ہیں۔ ہر گانے کی ہمارے دل میں ایک علیحدہ جگہ ہے۔‘
،تصویر کا ذریعہTwitter/@bluesyfer
ایک صارف نے اپنے تاثرات کا اظہار کرتے ہوئے کہا کہ ’یہ ہلا دینے والی خبر ہے۔ مجھے یقین نہیں آتا، اس نے مجھے ہلا کر رکھ دیا، میں اس افسردہ خبر کے لیے تیار نہیں تھا۔ ایسا شخص جس کی سب سے میٹھی آواز تھی، ایک لیجنڈ اور بہترین انسان۔ کے کے تمھیں ہمیشہ یاد رکھا جائے گا۔‘
ایک صارف راشد نے کے کے کا ’دل عبادت‘ شیئر کرتے ہوئے لکھا کہ میں اس بات پر مزید زور نہیں ڈال سکتا کہ یہ گانا کتنا اچھا ہے۔ آپ اسے سن کر ہر مرتبہ واہ کہنے پر مجبور ہو جاتے ہیں۔ شاید کے کے بھی اسے دوبارہ گائیں تو ایسے نہ گا پائیں۔‘
