معروف پاکستانی اداکار عابد علی انتقال کر گئے
،تصویر کا ذریعہRahma Ali
- مصنف, ریاض سہیل
- عہدہ, بی بی سی اردو ڈاٹ کام، کراچی
پاکستان کی ڈرامہ انڈسٹری پر چار دہائیوں تک راج کرنے اور ہر کردار میں سمو جانے کی صلاحیت رکھنے والے اداکار عابد علی انتقال کر گئے ہیں۔ ان کے اہل خانہ نے ان کے نجی ہسپتال میں انتقال کی تصدیق کر دی ہے۔
عابد علی کی بیٹی اداکارہ رحمہ علی نے انسٹا گرام پر اپنے والد کا ہاتھ تھامے ایک تصویر شیئر کی اور یہ بھی تحریر کیا کہ ’میرے ہاتھوں میں میرے باپ نے اپنی آخری سانسیں لیں، مجھے افسوس ہے کہ میں اس وقت کال ریسیو نہیں کرسکتی، میڈیا کے لیے تصدیق کرتی ہوں کہ ہاں وہ چلے گئے ہیں۔‘
عابد علی کو یرقان کی شکایت پر ہسپتال لے جایا گیا تھا جہاں ڈاکٹروں نے انھیں جگر کے کینسر کی تشخیص کی، جس کے بعد وہ لاہور اور پھر کراچی میں زیر علاج رہے۔
عابد علی کی تین بیٹیاں ہیں جن میں بڑی بیٹی ایمان علی اداکارہ اور ماڈل جبکہ دوسری رحمہ علی بھی اداکارہ ہیں۔
گزشتہ دنوں رحمہ علی نے والد کے ساتھ انسٹاگرام سٹوری میں لکھا تھا کہ ’پاپا گزشتہ دو ماہ سے شدید بیمار ہیں۔ تمام تر علاج اور ادویات بروکار لائی گئی ہیں، تسبیح اور سورہ رحمان کا ورد بھی کیا گیا لیکن ڈاکٹروں نے اب حتمی رائے دے دی ہے کہ وہ ان کی زندگی بچانے کے لیے کچھ بھی نہیں کرسکتے‘۔
اداکار عابد علی نے 70 سے 90 کی دہائی تک پی ٹی وی کے کئی مقبول ڈراموں میں کام کیا جن میں ’وارث‘ 'پیاس'، 'دوریاں'، 'دشت'، 'مہندی'، 'دیار دل' اور دیگر شامل ہیں۔
پاکستان میں جب نجی ٹیلی وژن نے قدم رکھا تو عابد علی نے ان چینلز پر بھی کئی ڈراموں میں کام کیا اور اس کے علاوہ ہدایت کاری بھی کی۔
عابد علی کی بیٹیوں ایمان علی اور رحمہ علی نے سوشل میڈیا پر والد کی طبیعت سے متعلق آگاہ کرتے ہوئے سب سے دعاؤں کی درخواست کی تھی۔
End of سب سے زیادہ پڑھی جانے والی
بعدازاں رحمہ علی نے سب سے دعاؤں کی اپیل کرتے ہوئے کہا تھا کہ ڈاکٹرز کے جواب کے باوجود اللہ سے بڑی کوئی طاقت نہیں۔
عابد علی کی پیدائش کوئٹہ میں ہوئی تھی۔ سکول کے دنوں میں ان کی توجہ تحریر اور مصوری کی طرف رہی تاہم 1969 میں کالج کے دنوں میں انھوں نے ریڈیو پر اپنی کرشماتی آواز کے سحر سے سب کو متاثر کردیا۔ 1973 میں وہ لاہور چلے گئے جہاں پاکستان ٹیلیویزن پر اپنی قسمت آزمانے کی کوشش کی اور بالآخر وہ اس میں کامیاب ہوگئے اور وارث جیسے سُپر ہٹ ڈرامے میں انھیں کردار بھی ملا۔
انھوں نے اداکارہ حمیرہ علی سے شادی کی جو متعدد ڈارموں میں کام کرچکی ہیں۔ ان کی تین بیٹیاں ہیں جن کے نام ایمان علی، مریم علی اور رحمہ علی ہیں۔ عابد علی نے حمیرہ علی سے علیحدگی کے بعد اداکارہ رابعہ نورین سے شادی کرلی تھی۔
