ماہرہ خان کانز فلم فیسٹیول کے ریڈ کارپٹ پر

پاکستانی اداکارہ ماہرہ خان نے فرانس کے شہر کانز میں جاری فلم فیسٹیول میں گذشتہ روز ریڈ کارپٹ پر قدم کیا رکھا کہ سوشل میڈیا پر ان کا نام ٹرینڈ کرنے لگا۔

ریڈ کارپٹ پر قدم رکھنے سے قبل ہی ماہرہ خان نے اپنے منفرد اور غیر معمولی لباس و انداز سے کانز میں اپنی موجودگی کا احساس دلا دیا تھا۔

ان کے مداح کے علاوہ فلمی شخصیتوں نے کانز میں ان کی پہلی بار شرکت کا خیر مقدم کیا ہے۔

خیال رہے کہ گذشتہ سال فیشن برانڈ 'لا اوریئل' نے انھیں سائن کیا تھا اور رواں سال وہ لا اوریئل کی دیگر برانڈ ایمبیسڈرز کے ساتھ وہاں نظر آئیں۔

ماہرہ خان کے علاوہ بالی وڈ اداکارہ کنگنا راناوت بھی اس بڑے فلمی میلے میں پہلی بار شرکت کر رہی ہیں۔

اس سے قبل ایشوریہ رائے بچن اور دیپکا پاڈوکون ریڈ کارپٹ پر اپنے جلوے بکھیر چکی ہیں۔ لیکن گذشتہ روز ماہرہ خان اور بالی وڈ اداکارہ سونم کپور نے ریڈ کارپٹ کو رونق بخشی۔

سونم کپور نے ماہرہ سے ملاقات پر خوشی کا اظہار کیا اور ان کے ساتھ اپنی ایک تصویر بھی ٹویٹ کی۔

33 سالہ ماہرہ نے خبررساں ادارے روئٹرز کو انٹرویو دیتے ہوئے کہا: کم از کم میرے لیے یہ بڑی بات ہے اور میرے ملک کے لیے تو ہے ہی ۔۔۔ تمام لوگوں کی نظریں مجھ پر ہیں۔

انھوں نے مزید کہا: 'پاکستان کے بہت سے رنگ ہیں اور ہم جیسے فنکاروں، موسیقاروں، اداکاروں اور مصنفوں کا ملک سے باہر سفر کرنا دوسرے لوگوں کو ہمارے بارے میں بہتر جاننے کا موقع فراہم کرتا ہے۔

اطلاعات کے مطابق ماہرہ خان کے ملبوسات پاکستانی ڈیزائنروں نے ڈیزائن کیا ہے اور انھوں نے ریڈ کارپٹ پر آنے سے قبل جو ساڑھی پہنی تھی وہ مناحل اور مہرین نے ڈیزائن کی تھی۔ ماہرہ نے اپنی تصویر کا عنوان 'کھجور والی چوٹی' دیا تھا۔

ماہرہ خان نے ابھی تک کم سے کم میک اپ کا استعمال کیا ہے اور اس لیے بھی ان کی تعریف ہو رہی ہے۔

ماہرہ خان کو کئی انداز میں دیکھا گیا اور انھوں نے اپنی تصویریں بھی پوسٹ کی ہیں لیکن انھوں نے یہ اعتراف بھی کیا ہے کہ وہ آج کے بچوں کی طرح جلدی جلدی بہت سی تصویریں اپ لوڈ کرنے سے قاصر ہیں۔

ماہرہ خان کو 'ہم سفر' ٹی وی سیریل سے مقبولیت ملی اور پھر انھوں نے شاہ رخ خان کے ساتھ فلم رئیس میں کام کیا۔

حال میں بالی وڈ اداکار رنبیر کپور کے ساتھ ان کی تصاویر تنازعے کا باعث بنی تھیں۔

ان کی فلم 'ورنہ' کی کامیابی کے بعد اب ان کی فلم 'سات دن محبت ان' آنے والی ہے۔