زین ملک کے البم میں 'اردو اور قوالی کے بول'

پاکستانی نژاد معروف برطانوی گلوکار زین ملک نے اپنے نئے البم 'مائنڈ آف مائن' سے پردہ اٹھایا ہے۔

ایک انٹرویو میں انھوں نے بالی وڈ کی محبت اور اپنے نئے البم کے بارے میں کھل کر باتیں کی ہیں۔

جہاں انھوں نے یہ بتایا ہے کہ انڈیا کے معروف موسیقار اے آر رحمان کے ساتھ انھوں نے ایک گیت پر کام کیا ہے وہیں انھوں نے شاہ رخ خان کے بارے میں اپنے خیالات کا اظہار بھی کیا ہے۔

دوسری جانب انھوں نے اپنے انسٹاگرام اکاؤنٹ پر برصغیر میں اداکاری کے لیجنڈ کہے جانے والے اداکار کی ایک تصویر ڈالی ہے جس میں ان کے والد دلیپ کمار کے ساتھ نظر آ رہے ہیں۔ ان کی اس پوسٹ کو چار گھنٹے میں سات لاکھ سے زیادہ لوگوں نے لائک کیا ہے۔

انھوں نے پہلی بار کسی انڈین میگزین کے لیے پوز کیا ہے اور ایک تفصیلی انٹرویو دیا ہے۔ ان کا یہ انٹرویو ایلے انڈیا کے فروری سنہ 2018 کے شمارے میں شائع ہوا ہے۔

بالی وڈ کے بارے میں انھوں نے کہا: 'اگر آپ کو بالی وڈ کی کوئی اچھی فلم دیکھنی ہو تو دیو داس دیکھیں۔ کیا آپ نے دیوداس دیکھی ہے؟ اس میں شاہ رخ خان ہیں اور آپ جانتے ہیں کہ شاہ رخ خان کون ہیں؟

انھوں نے اپنے نئے البم مائنڈ آف مائن کے بارے میں بھی تفصیل دیتے ہوئے کہا: 'اس میں یقینی طور پر بہت ساری اردو ہے۔ اچھی قوالی کے بول ہیں۔ اور اس میں بھنگڑا کی ترنگ بھی ہے۔ میں نے اے آر رحمان کے ساتھ ایک گیت پر کام کیا ہے۔'

'ون ڈائرکشن' کی ٹیم کے رکن رہنے والے زین ملک نے کہا کہ وہ شاہ رخ خان کو اس وقت تک خود پسند سمجھتے تھےجب تک وہ ان سے نہیں ملے تھے۔

انھوں نے کہا: 'میں جب تک ان سے نہیں ملا تھا ذاتی طور پر ان کا بڑا مداح نہیں تھا۔ مجھے احساس ہوا کہ وہ بہت منکسر المزاج ہیں۔ انھوں نے مجھے ایک بالکل دوسرا رخ دکھایا۔'

شاہ رخ خان نے زین ملک کے ساتھ ایک سیلفی ٹویٹ کی جو اپنے زمانے میں ریکارڈ ایک لاکھ سے زیادہ بار ری ٹویٹ کی گئی۔