ኮሮናቫይረስ ኣብ ልዕሊ ቆልዑ ዘኸትሎ ሓደጋ ኣዝዩ ዝተሓተ ከምዝኾነ ብመጽናዕቲ ተረጋጊጹ

ህጻናት ብሰንኪ ኮሮናቫይረስ ንኸቢድ ሕማም ኮነ ንሞት ዝሳጥሑሉ ሓደጋ ኣዝዩ ዝተሓተ ከምዝኾነ፡ ሓድሽ ትንታነ ረኽሲ ኮቪድ-19 ኣረጋጊጹ።

እቲ ለበዳ ካብ ዝተረኣየሉ እዋን ጀሚሩ ኣብ ዝነበሩ 12 ኣዋርሕ፡ ኣብ እንግሊዝ ዝተኣከበ መረዳእታ ከምዘመልክቶ ዕድሚኦም ትሕቲ 18 ዓመት ዝኾኖም 25 ቆልዑት ጥራይ ሞይቶም።

እቶም ዝተፈላለዩ ዓይነታት ሕዱር ሕማማት ዝነበሮምን ንጸገማት ጥዕና መትኒታት ዝተቓልዑን ሰባት ከኣ፡ ብዝያዳ ኣብ ሓደጋ ከምዝወደቑ ይግለጽ።

ኣብዚ እዋን ዕድሚኦም ትሕቲ 18 ዓመት ዝኾኑ ቆልዑ ዋላ ኣብ ሓደጋ ከውድቖም ዝኽእል ሕዱር ጥዕናዊ ጸገማት እናሃለዎም፡ ክታበት ኮቪድ-19 ክወስዱ ኣይግበርን ዘሎ።

ንመረዳእታ ጥዕና ማሕበረሰብ ዓዲ እንግሊዝ ዝዳህሰሱ ኮይኖም፡ መብዛሕቲኦም እቶም ብሰንኪ ኮቪድ-19 ዝሞቱ ነኣሽቱ ቆልዑ [ትሕቲ 18 ዓመት] ካልእ ተደራቢ ጸገማት ጥዕና ዝነበሮም’ዮም።

ነቲ ኣብ ዓዲ እንግሊዝ ብሰንኪ ኮቪድ-19 ዘጋጠመ ሞት 25 ቆልዑት፡ ምስቲ ዘለዋ 12 ሚልዮን ብዝሒ ህጻናት ኣነጻጺርካ ክረኣይ ከሎ ካብ 1 ሚልዮን ህጻናት 2 መጠን ሞት ኣጋጢሙ ማለት’ዩ።

‘ኣብ ሆስፒታል ምጽናሕ ልሙድ ዘይምዃን’

ተመራመርቲ ክሳብ ለካቲት 2021 ኣብ ዝነበረ እዋን ብሰንኪ ኮቪድ-19 ንቕልጡፍ ሕክምናዊ ሓገዝ ናብ ሆስፒታል ናይ ዝተሰወዱ ህጻናትን ነኣሽቱ ቆልዑን ብዝሒ ዳህሲሶም ነይሮም።

ነቲ ምርምር ዝመርሐ ፕሮፌሰር ሩሰል ቪነር፡ ህጻናት ክታበት ኮሮናቫይረስ ቅድሚ ምውሳዶም ብዙሕ ሓበሬታ መሰረት ዝገበረ ውሳነ ክኸውን ከምዘለዎ ይምዕድ።

ዋላ እኹል ዝኾነ ክታበት እንተተረኺቡ፡ ነቶም ክታበት ከምዘድልዮም ዝተኣመነሎም ቆልዑት ጥራሕ ክወሃብ ከምዘለዎ ወሲኹ ይገልጽ።

በዓልቲ ሞያ ሕክምና ህጻናትን ጥዕና ቆልዑን ኮሌጅ ሮያል ዶክተር ኤልሳቤጥ ዊትቴከር፤ ኣብ ውሽጢ ሆስፒታላት ውሑዳት ቆልዑት ጥራይ ብጽኑዕ ሓሚሞም ምርኣይ ዘተባብዕ ከምዝኾነ ገሊጻ።

“ነዚ መጽናዕቲ ዝወዓለ መረዳእታ ክሳብ ወርሒ ሚያዝያ 2021 ንዝነበረ ኩነታት ጥራይ ዘጠቓለለ’ኳ እንተኾነ፡ ምስቲ ኣብዚ እዋን ዘሎ ደልታ ዝበሃል ዓይነት ቫይረስ ዝተረኣየ ለውጢ የለን። እዚ መረዳእታ ከኣ ንህጻናት፣ ነኣሽቱ ቀልዑን ስድርኦምን ዘተኣማምን ከምዝኸውን ተስፋ እገብር” ኢላ።