ኣትሌት ናዝሬት ወልዱ፡ "በዓል ቤተይ ኣሰልጣንየይ ምዃኑ ዕድለኛ'የ"

ዓመተ 2004 ኣብ ታሪኽ ኣትሌቲክስ ኤርትራ ሓደ ታሪኽ ዝተመዝገበላ ዓመት'ያ ነይራ።

ኣትሌት ዘርአሰናይ ታደሰ ኣብቲ ኣብ ኣቴንስ ዝተካየደ ኦሎምፒክ፡ ኣብ ናይ 10000 ሜትሮ ንኢትዮጵያውያን ኣትሌታት ቀነኒሳ በቀለን ስለሺ ስህንን ተኸቲሉ ሳልሳይ ኮይኑ ብምእታው ንኤርትራ ቀዳማይቲ ነሓስ ሜዳልያ ኣግዚሙዋ።

ዓወት ዘርእሰናይ ታደሰ ንብዙሓት ኣነቓቒሑን ንግሆ ንግሆ ዘብዘብ ከም ዝብሉን ገይሩ'ዩ።

ናዝሬት ወልዱ'ውን እቲ ማዕበል እቲ ካብ ዘሰራሰሮም ኣትሌት እያ፤ ካብዚ ብምብጋስ'ውን ይኸውን ካብ ኩሎም ኣትሌታት ንዘርእሰናይ ታደሰ'ያ ተድንቕ።

ኣብ 1991 ኣብ ከሰላ ሱዳን ዝተወለደት ናዝሬት ወልዱ ጓል 8 ዓመት ምስ ኮነት ምስቶም ጠቅሊሎም ናብ ኤርትራ ዝኣተዉ ወለዳ ናብ ኤርትራ ዞባ ጋሽ ባርካ ንኡስ ዞባ ሻምብቆ ከተማ ሻምብቆ ብምጉዓዝ ቁልዕነታ ኣሃዱ ኢላ ፈሊማቶ።

"ኩሉ ምንቅስቓሰይ ጉያ'ዩ" እትብል ናዝሬት፡ ኣብ መጀመርታ ዝያዳ ደራፊትን ተላሃይትን ናይ ምዃን ጥሙሕ ከም ዝነበራ'ያ ንቢቢሲ ገሊጻ።

ኤርትራዊት ኦሎምፒካዊት ኣትሌት ናዝሬት ወልዱ ቀዳም ናብ ሰንበት ኣብ ዘውግሐ፡ ኣብ ደቡብ ኮርያ ኣብ ዝተኻየደ ዳጉ ኢንትርናሽናል ማራቶን ንውድድራ ብክልተ ሰዓት 21 ደቂቕን 56 ካልኢትን ብምዝዛም ቀዳማይቲ ክትወጽእ እንከላ፡ ብሓደ ግዜ ሰለስተ ክብረ ወሰናት ሰይራ።

ናይ ውልቃ፥ ናይ ኤርትራ ከምኡ'ውን ኣብ ዳጉ ኢንትርናሽናል ማራቶን ተመዝጊቡ ዝጸንሐ ግዜ ኣመሓይሻ።

ብዘይካ እዚ ኣብቲ ውድድር ን25 ኪሎ ሜትር ከምኡ'ውን 35 ኪሎ ሜትር ንምዝብጻሕ ዝወሰደላ ግዜ'ውን ቅደሚ ሕጂ ኣብ ኤርትራ ብደቂ ኣንስትዩ ዘይተመዝገበ ግዜ ብምምዝጋብ ናይ ውሽጢ ሃገር ክብረ ወሰን ክትሕዝ ክኢላ'ያ።

"እዚ ናይ ትማሊ ዓወተይ ድምር ናይ ዓመታት ጻዕሪ እዩ።" ብምባል ኸኣ ናብቲ ኣትለቲክስ ዝጀመረትሉ ዓመት መሊሳትና።

ናዝሬት ወልዱ ተማሃሪት መባእታ እንከላ፡ ወዲ ትምህርታ እንተስ ኣፍለጦ ናይ ስፖርት ነይርዎ ወይ'ውን ንሓፈሻዊ ምንቅስቓሳ ርእዩ ኣብ ሞንጎ ትምህርቲ "መምህር ናዝሬት'ኮ ንፍዕቲ ጎያይት'ያ" ስለ ዝበለ ናይ ስፖርት መምህሮም ከም ዝፈተ ናዝሬት ትገልጽ።

ናዝሬት ወልዱ ኣብ ቤት ትምህርታ ኣብ መጀመርታ 2003 ዝያዳ ኣብ ዝላ ኣቶኵራ እያ ትርሰርሕ ነይራ። ኣብኡ'ውን ሰነፍ ኣይነበረትን ቀዳማይቲ ትወጽእ ነይራ።

ኣብ 2004 ኣብ ሳዋ ኣብ ዝተኻየደ ፌስቲቫል መንእሰያት'ውን ኣብ ናይ ሓጺር ርሕቀትን ኣብ ዝላን ብምውድዳር ኣብ ክልቲኡ ቀዳመይቲ ወጺኣ።

ሓሙሻይ ክፍሊ ኣብ ዝበጽሓትሉ ናይ ምጉያይ ዓቕማ ዝርኣዩ ኣለይቲ ክለብ ሰቲት ናብ ኣስመራ ብምምጻእ ስሩዕ ልምምድን ውድድርን ከም እትገብር ገይሮም። ውድድራት ኸኣ በዚ ገይራ ኣሃዱ ኢላ ጀሚራቶ።

"ግዜ እንታይ ኣለዎ ሕጂ ኣብ ኣትሌትክስ 19 ዓመታት ኣቑጺረ ኣለኹ" ትብል ናዝሬት።

ናዝሬት ወልዱ ቅድሚ ሕጂ ዘመዝገበቶ ዓወታት

እታ ኣብ ብዙሕ ውድድራት ብምውድዳር ብዙሕ ዓወታት ዘመዝገበት ናዝሬት ወልዱ እታ ዝያዳ ዝተሓጎስክላ ዓወት ኣየነይቲ እያ ምስ በልናያ ከይተማተአት'ያ ነታ ናይ ደቡብ ኮርያ ዓወታ ምዃና ገሊጻ።

"እዛ ናይ ዳጉ [ደቡብ ኮርያ] ማራቶን እታ ኣብ ህይወትይ ንግሆን ምሸትን ዝደልያን ዝጸዓርኩላን ዓይነት ዓወት'ያ"።

ቅድሚ ሕጂ ብዙሕ ምድላዋት ገይራ 'ኣብ ጽቡቕ ቁመና ኣለኹ' ኣብ ዝበለትሉ ውድድራት ቅሩብ መዓልታት ምስ ተረፎ ብተደጋጋሚ መጉዳእቲ የጋጥማ ብምንባሩ ብዙሕ ሕጉስቲ ከም ዘይነበረት'ያ ትዛረብ።

ብምስዓብ "ኣነ ኣብ ኣትሌቲክስ ጻዕራም'የ፤ ብዙሕ'ውን ተዓዊተ'የ። እዛ ኣብ ደቡብ ኮርያ ዝተዓወትኩላ ግን ልክዕ ከምዚ ኣብ ኦሎምፒክ ወርቂ ዝተዓወትኩ ኮይኑ'ዩ ተሰሚዑኒ" ትብል።

ሓዳርን ስፖርትን

ኣትሌት ናዝሬት ኣብ ታሕሳስ 2012 ነቲ ከም ኣስልጣኒኣ ኮይኑ ዝሰርሕ፡ ኣብ ምስልጣን ኣትሌቲክስ 'ለቨል 5' ዝበጽሐ ሊቨንግስቶን ኣብርሃም ተመርዕያ።

"እወ! ብዓል ቤተይ እንከላይ ኣሰልጣኒየን እዩ፤ ብዓል ቤተይ ስለ ዝኾነ ኣይኮንኩን ዘድንቖ ክድነቕ ስለ ዘለዎ'ዩ። ኣብ ኤርትራ እቲ ዝበለጸ ኣስለጣኒ ናይ ኣትሌቲክስ'ዩ" ትብል።

ወሲኻ፡ "ሊቨንግስቶን ኣብርሃም [ብዓል ቤታ] ኣሰልጣንየይ ስለ ዝኾነ'የ ኣብ ከምዚ ደረጃ ክበጽሕ ክኢለ። በዓል ቤተይ ኣሰልጣንያይ ምዃኑ ዕድለኛ'የ" ኢላ።

ናዝሬት ወልዱ ናይ ነዊሕ ርሕቀት ውድድር ምስ ሓዳር ኣዝዩ ከም ዝኸብድ ብምግላጽ፡ በዓል ቤታ ኣሰልጣኒኣ ብምዃኑን ብዛዕባ ኣትሌቲክስ እኹል ኣፍልጦ ስለ ዘለዎን ግን ብዙሕ ከም ዝቃለለላ ንቢቢሲ ገሊጻ።

"ሰብ ክንዕወት ወይ ክንስዓር እንከለና እዩ ዝርኢ፤ ኣብ ጥቃና ስለ ዘየለ እንታይ ብድሆታት ከምንሰግር ኣይፈልጦን'ዩ" ብምባል 42 ኪሎ ሜትር ጎይኻ ዝስምዓካ ድኻም ብቃላት ከም ዘይግለጽ ትሕብር።

42 ኪሎ ሜትርን ልዕሊኡን ልምምድ ገይርካ መጺኻ ኣብ ገዛ ተወሳኺ ናይ ሓዳር ስራሕ ከተካይድ ከም ዘጸግም እትሕብር ናዝሬት "ንነገራት ኣኽቢድካ እንተሪኢኻዮ'ዩ ዝኸብድ" ትብል።

ብምስዓብ ብዓል ቤታ ሊቨንግስቶን ኣብርሃም ብዙሕ ከም ዝሕግዛ ተብርህ።

"ሓደ ሓደ ግዜ ካብ ልምምድ መጺአ ድኽም ኣብ ዝብለሉ ባዕሉ ቁርሲ ሰሪሑ ዘብልዓኒ ግዜ ኣሎ" ብምባል ኸኣ ኣብ ኩሉ ዓወታታ ኣብርክቶ በዓል ቤታ ልዑል ምዃኑ ተብርህ።

ናይ መጻኢ መደባት

ናዝሬት ወልዱ እዚ ኣብ ደቡብ ኮርያ ዘመዝገበቶ ዓወት ምስ ብዙሓት መወልትን ማናጀራትን ክትራኸብ ገፊሕ ዕድል ይፈጥረላ ከም ዘሎ ንቢቢሲ ገሊጻ።

"እዚ ኣመዝጊበዮ ዘለኹ ኣብ ኒውዮርክ ማራቶን፡ ኣብ ሎንዶን ማራቶን ከምኡ'ውን ኣብ ቦስቶን ማራቶን ዕድመ ንክረክብ ዘኽእል እዩ" ኢላ።

ብምስዓብ "ሕጂ ብቀዳምነት ዝሰርሓሉ ዘለኹ ግን ድሕሪ ሰለስተ ወርሒ ኣብ ኣመሪካ ኣብ ዝካየድ ቻምፒዮና ዓለም ንሃገረይ ወኪለ ክወዳደር እየ።

"ኣብ ቻምፒዮና ዓለም ካብዚ ኣመዝጊበዮ ዘለኹ ሰዓት ዝበለጸ ሰዓት ብምምዝጋብ ነቲ ትጽቢት ኣሕዲሩለይ ዘሎ ህዝበይን መንግስትን ከሐጉስ ይሰርሕ ኣለኹ" ክትብል ንቢቢሲ ተዛሪባ።

ምስ መረብ ሰቲት መሰልጠኒ ዞባ ማእከል ተጠርኒፋ ትወዳደር ናዝሬት "እዚ ዓወተይ ንብዙሓት ደቂ ኣንስትዮ መንገዲ ዝኸፍት እዩ። ካብ ሕጂ ንድሓር ኸኣ ንቅድሚት'ምበር ንድሕሪት ምኻድ የለን" ክትብል ገሊጻ።