కవిత ఇంటర్వ్యూ: 'ఆంధ్రప్రదేశ్ మీద మాకేమీ ప్రత్యేక దృష్టి లేదు... నిజామాబాద్ రైతులు కాంగ్రెస్, బీజేపీల మీదే పోటీకి దిగారు'

తెలంగాణ రాష్ట్ర సమితి లాంటి ప్రాంతీయ పార్టీలు ఎన్నికల అనంతరం కేంద్రంలో ప్రభుత్వ ఏర్పాటులో కీలక పాత్ర పోషిస్తాయని టీఆర్‌ఎస్ నిజామాబాద్ ఎంపీ కల్వకుంట్ల కవిత బీబీసీ తెలుగు ప్రతినిధి దీప్తి బత్తినికి సోమవారం ఇచ్చిన ప్రత్యేక ఇంటర్వ్యూలో చెప్పారు.

ఫెడరల్ ఫ్రంట్ (సమాఖ్య కూటమి) విషయమై వైఎస్‌ఆర్ కాంగ్రెస్ పార్టీ అధ్యక్షుడు జగన్మోహన్‌రెడ్డితో టీఆర్‌ఎస్ కార్యనిర్వాహక అధ్యక్షుడు కేటీ రామారావు చర్చించారని కవిత ఒక ప్రశ్నకు సమాధానంగా చెప్పారు.

ఎవరు విజయం సాధిస్తారనేది పక్కనబెడితే, టీఆర్‌ఎస్‌కు ఆంధ్రప్రదేశ్‌ కూడా దేశంలోని ఇతర రాష్ట్రాల మాదిరే ఒక రాష్ట్రమని ఆమె తెలిపారు.

ఫెడరల్ ఫ్రంట్ విషయమై ఇతర రాష్ట్రాల్లోని పార్టీలతో చర్చించినట్లుగానే ఏపీలో వైసీపీతో చర్చించామని కవిత తెలిపారు. అంతేకానీ, ఆంధ్రప్రదేశ్‌పై ప్రత్యేకంగా దృష్టి కేంద్రీకరించి చేసే ఆలోచన లేదని చెప్పారు. అంతిమంగా ఈ ప్రయత్నం దేశం గురించి చేస్తున్నదని తెలిపారు.

తెలంగాణ అనేది ప్రజల సెంటిమెంటు మాత్రమే కాదని, వారి ఆకాంక్ష కూడా అని కవిత చెప్పారు. ఈ రెండింటికి మధ్య చాలా తేడా ఉందని చెప్పారు.

ఆత్మగౌరవంతో కూడిన అభివృద్ధిని తెలంగాణ ప్రజలు కోరుకుంటున్నారని ఆమె తెలిపారు. ఆత్మగౌరవమనేది అత్యంత ముఖ్యమైన అంశమని, తెలంగాణ ప్రజల్లో ఈ భావన ఎప్పుడూ ఉందని పేర్కొన్నారు. గులాబీ జెండా దిల్లీలో రెపరెపలాడాలనే ఆకాంక్ష ప్రజల్లో ఉందన్నారు.

అవకాశం ఉండి కూడా ప్రజలకు ఏ మాత్రం మంచి చేయకపోవడం వల్ల బీజేపీ గ్రాఫ్ పడిపోతోందని కవిత వ్యాఖ్యానించారు.

గత అయిదేళ్లలో బీజేపీని అన్ని విషయాల్లో విమర్శించడం తప్ప ప్రజలకు కాంగ్రెస్ ఏం చేయగలదో ఆ పార్టీ చెప్పలేకపోయిందని పేర్కొన్నారు.

ఒకవైపు కాంగ్రెస్ నాయకత్వానికి దార్శనికత కొరవడిందని, మరోవైపు బీజేపీ చెప్పిన మాటలన్నీ అబద్ధాలేనని తేలిపోయిందని ఆమె విమర్శించారు.

ఈ పరిస్థితుల్లో, చెప్పిన మాటకు కట్టుబడి అభివృద్ధితో రాష్ట్రాలను ముందుకు తీసుకెళ్లిన టీఆర్‌ఎస్ లాంటి ప్రాంతీయ పార్టీలను, బీజేపీ, కాంగ్రెస్ లాంటి పార్టీలను ప్రజలు పోల్చి చూసుకుంటున్నారని ఆమె అభిప్రాయపడ్డారు.

జాతీయ పార్టీ, స్థానిక పార్టీ అనే అంశాలు ఇప్పుడు లేకుండా పోయాయని కవిత తెలిపారు. ఇప్పుడు ‘గ్లోకల్’ (గ్లోబల్ + లోకల్) పార్టీలు అంటే అంతర్జాతయ దృక్కోణంతో కూడిన స్థానిక పార్టీలు అవసరమని చెప్పారు. కాబట్టి టీఆర్‌ఎస్, తృణమూల్ కాంగ్రెస్(టీఎంసీ), బిజూ జనతాదళ్(బీజేడీ) లాంటి పార్టీలకు అవకాశాలు ఎక్కువగా ఉన్నాయని ఆమె తెలిపారు. ఈ సందర్భంలో, కాంగ్రెస్ లేని, బీజేపీలేని కూటమి ఏర్పడేందుకు అవకాశాలు పుష్కలంగా ఉన్నాయన్నారు.

'ఆ రైతులు బీజేపీ, కాంగ్రెస్‌లకు వ్యతిరేకంగానే పోటీకి దిగారు'

నిజామాబాద్ లోక్‌సభ స్థానంలో 170 మందికి పైగా రైతులు పోటీచేస్తుండటంపై అడిగిన ప్రశ్నకు కవిత స్పందిస్తూ- వారు జాతీయ పార్టీలైన బీజేపీ, కాంగ్రెస్‌లకు వ్యతిరేకంగానే బరిలోకి దిగారని చెప్పారు.

పసుపు పంటకు మద్దతు ధర ఇవ్వాలని, పసుపు బోర్డు ఏర్పాటు చేయాలని, ఎర్రజొన్నలకు మద్దతుధర ఇవ్వాలని ఐదేళ్లుగా అడుగుతూనే ఉన్నామని, కానీ కేంద్ర ప్రభుత్వం పట్టించుకోవడం లేదని ఆమె విమర్శించారు.

పసుపు రైతుల సమస్యలను జాతీయ పార్టీల దృష్టికి తీసుకొచ్చేందుకే నిజామాబాద్‌లో ఆ రైతులు నామినేషన్లు వేశారని కవిత తెలిపారు. ఆ రైతులు, తాను ఆ జాతీయ పార్టీలతోనే కొట్లాడుతున్నామని చెప్పారు. అక్కడ జరుగుతున్న పోరాటం తనపై కాదని, జాతీయ పార్టీలపై అని వ్యాఖ్యానించారు.

తెలంగాణ ప్రయోజనాల కోసం బీజేపీ, కాంగ్రెస్ ఏమీ చేయలేదని ఆమె ఆరోపించారు. "తెలంగాణకు చెందిన ఏడు మండలాలను కేంద్ర ప్రభుత్వం లాక్కొని ఆంధ్రప్రదేశ్‌కు అప్పనంగా అప్పజెబితే కూడా కేంద్ర మంత్రిగా ఉన్న బీజేపీ ఎంపీ బండారు దత్తాత్రేయ కనీసం నిరసన కూడా వ్యక్తంచేయలేదు’’ అని విమర్శించారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)