హైదరాబాద్ జంట పేలుళ్ల కేసు: ‘రికార్డు చాలా పెద్దది‘

హైదరాబాద్ జంట పేలుళ్ల కేసు తీర్పు వాయిదా పడింది. సెప్టెంబరు 4న తీర్పు ప్రకటించనున్నట్టు జడ్జి ప్రకటించారు. హైదరాబాద్ నాంపల్లిలోని క్రిమినల్ కోర్టుల ప్రాంగణంలో వీడియో కాన్ఫరెన్స్ ద్వారా నిందితులను కోర్టులో హాజరు పరిచారు.

"రికార్డు చాలా పెద్దది కావడంతో, తీర్పు సిద్ధం కాలేదు. దానివల్ల తీర్పు ప్రకటించలేదు. కేసును సెప్టెంబరు 4కి వాయిదా వేశారు. ఐదుగురు నిందితులను వీడియో కాన్ఫరెన్స్ ద్వారా కోర్టు ముందు హాజరుపరిచారు. తీర్పు చర్లపల్లిలోనే ఉంటుందని భావిస్తున్నాం. కానీ ఇప్పుడే చెప్పలేం" అని డిఫెన్స్ న్యాయవాది ఎంఎ అజీమ్ చెప్పారు.

ఈరోజు తుది తీర్పు వస్తుందని భావించిన బాధితులు కొందరు కోర్టు వద్దకు చేరుకున్నారు. మరోవైపు పోలీసులు కోర్టు దగ్గర భద్రతా ఏర్పాట్లు చేశారు.

ఈ పేలుడు ఘటనలో 42 మంది మృతి చెందగా, 300 మంది గాయపడ్డారు.

ఈ పేలుళ్ల వెనుక ఇండియన్‌ ముజాహిదీన్‌ సంస్థ హస్తం ఉన్నట్లు పోలీసులు ఇది వరకే ప్రకటించారు.

ఈ ఘటనకు సంబంధించి ఎండీ సిద్దిఖ్ ఇస్సార్ అహ్మద్, ఎండీ అక్బర్ ఇస్మాయిల్ చౌదరి, అనిక్ షఫిఖ్ సయ్యద్, ఫారుఖ్ షర్ఫుద్దీన్ తార్కష్‌లను ముంబయి పోలీసులు మొదట అరెస్టు చేశారు.

పీడీ యాక్ట్ కింద ముంబయి పోలీసుల నుంచి వీరిని ఆక్టోపస్ విభాగం, కౌంటర్ ఇంటెలిజెన్స్ అధికారులు అదుపులోకి తీసుకున్నారు. వీరిపై కేసు నమోదు చేసి నాంపల్లి కోర్టులో చార్జ్‌షీట్లు దాఖలు చేశారు.

చార్జ్‌షీట్లో ఐఎంకు చెందిన అనీఖ్, రియాజ్‌ భత్కల్, అక్బర్‌, ఇక్బాల్‌ భత్కల్, అమీర్‌ రజా ఖాన్, ఫారూఖ్‌ తర్ఖాష్, సాదిక్‌ షేక్‌లను నిందితులుగా పేర్కొన్నారు.

ఆ రోజు ఏం జరిగింది?

ఆగస్టు 25, 2007 రాత్రి 7.45 నిమిషాలు..

ట్యాంక్‌బండ్‌లోని లుంబినీపార్క్‌లో హైదరాబాద్ చరిత్ర దాని విశిష్టతలను వివరిస్తూ లేజర్ షో సాగుతోంది.

ఎక్కడినుంచో వచ్చిన ప్రేక్షకులంతా భాగ్యనగరం గొప్పతనాన్ని ఆసక్తిగా చూస్తున్నారు.

కొన్ని క్షణాలకు వారున్న చోట పెద్ద శబ్దంతో పేలుడు సంభవించింది. ఈ ఘటనలో 9 మంది చనిపోయారు.

ఈ ఘటన నుంచి తేరుకునేలోపే మరికొన్ని నిమిషాల్లోనే కోఠీలోని గోకుల్ చాట్‌లో పేలుడు జరగడంతో 33 మంది చనిపోయారు.

వెంటనే అప్రమత్తమైన పోలీసులు నగరంలోని రద్దీ ప్రాంతాల్లో సోదాలు నిర్వహించారు. మరో 19 బాంబులను గుర్తించి పేలకుండా నిర్వీర్యం చేశారు.

1125 పేజీలతో చార్జిషీట్

జంట పేలుళ్లకు సంబంధించి ఏడుగురి పేర్లతో కూడిన 1125 పేజీలతో మూడు చార్జిషీట్లను పోలీసులు దాఖలు చేశారు.

కేసులో 286 మందిని సాక్షులుగా పేర్కొన్నారు. మక్కా పేలుళ్ల తరువాత పోలీసుల కాల్పులకు ప్రతీకారంగా నిందితులు పేలుళ్లు జరిపినట్టు విచారణలో తేలింది.

ఐఈడీ బాంబుల వినియోగం

ఈ పేలుళ్లకు ఇంప్రువైజ్డ్‌ ఎక్స్‌ప్లోజీవ్‌ డివైస్‌ (ఐఈడీ)లను ఉపయోగించినట్లు దర్యాప్తు అధికారులు తేల్చారు.

టిఫిన్‌ బాక్సుల్లో బాంబులను ఉంచి వాటికి టైమర్లను అమర్చి పేలుళ్లు జరిపినట్టు చెప్పారు.

ఇవి కూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)