ట్రంప్ గ్రీన్‌లాండ్ ప్రణాళిక: చైనా కోపంగా, రష్యా సంతోషంగా ఎందుకున్నాయి?

గ్రీన్‌లాండ్‌పై అమెరికా నియంత్రణ 'అత్యవసరం' అని అమెరికా అధ్యక్షుడు డోనల్డ్ ట్రంప్ అంటున్నారు. అది జరగకపోతే రష్యా, చైనా కలిసి 'గ్రీన్‌లాండ్‌ను ఆక్రమించుకుంటాయి' అనేది ఆయన వాదన.

"అక్కడ రష్యా యుద్ధ విమానాలు, జలాంతర్గాములు ఉన్నాయి. చైనా యుద్ధ విమానాలను కూడా మోహరించారు" అని ట్రంప్ ఇటీవల అన్నారు.

డెన్మార్క్ పాక్షిక స్వయంప్రతిపత్తి ప్రాంతం(సెమీ అటానమస్ టెరిటరీ) గ్రీన్‌లాండ్‌.

ట్రంప్ గ్రీన్‌లాండ్‌ ప్రణాళికను డెన్మార్క్, దాని మిత్రదేశాలు వ్యతిరేకించాయి.

దీనికి ప్రతిస్పందనగా జనవరి 17న ట్రంప్ మాట్లాడుతూ.. డెన్మార్క్, ఫిన్లాండ్, ఫ్రాన్స్, జర్మనీ, నెదర్లాండ్స్, నార్వే, స్వీడన్, బ్రిటన్‌లు తన ప్రతిపాదనలను వ్యతిరేకిస్తే కనుక ఆ ఎనిమిది మిత్రదేశాలపై ఫిబ్రవరిలో కొత్త సుంకాలను విధిస్తానని హెచ్చరించారు.

గ్రీన్‌లాండ్‌ను రష్యా, చైనా కలిసి ఆక్రమిస్తాయనే భయాన్ని ట్రంప్ వ్యక్తం చేశారు.

దాంతో గ్రీన్‌లాండ్‌కు సంబంధించి ట్రంప్ నిర్ణయం ఆ రెండు దేశాలలో ఆగ్రహాన్ని కలిగించే అవకాశం ఉందని అర్థం చేసుకోవచ్చు.

రష్యా ఏమంటోంది?

ట్రంప్ ప్రకటనపై చైనా అభ్యంతరం వ్యక్తం చేయగా రష్యాలో స్పందన అందుకు భిన్నంగా ఉంది.

"రష్యా ప్రభుత్వ ఆధ్వర్యంలోని వార్తాపత్రిక ట్రంప్‌ను ప్రశంసించి, గ్రీన్‌లాండ్‌పై ట్రంప్ ప్రణాళికను వ్యతిరేకిస్తున్న యూరోపియన్ నాయకులను విమర్శించింది" అని బీబీసీ రష్యన్ ఎడిటర్ స్టీవ్ రోసెన్‌బర్గ్ తెలిపారు.

"అమెరికా అధ్యక్షుడు చరిత్రాత్మక విజయం సాధించడానికి డెన్మార్క్ మొండితనం, అమెరికా స్నేహితులుగా భావిస్తున్న బ్రిటన్, ఫ్రాన్స్‌ సహా తిరుగుబాటు యూరోపియన్ దేశాల నకిలీ ఐక్యత అడ్డంకిగా ఉన్నాయి" అని రష్యన్ వార్తాపత్రిక రోసిస్కాయా గెజిటా రాసింది.

"2026 జూలై 4న అమెరికా 250వ స్వాతంత్య్ర దినోత్సవాన్ని జరుపుకోనుంది. అప్పటికి ట్రంప్ గ్రీన్‌లాండ్‌ను స్వాధీనం చేసుకుంటే, అమెరికా గొప్పతనాన్ని స్థాపించిన వ్యక్తిగా ఆయన చరిత్రలో నిలిచిపోతారు, ట్రంప్ కారణంగా గ్రీన్‌లాండ్‌ అమెరికాలో భాగమైతే, అమెరికా ప్రజలు ఆ విజయాన్ని ఎప్పటికీ మర్చిపోలేరు" అని ఆ పత్రిక రాసింది.

"వెనకడుగు వేయకండి" అని ఈ రష్యన్ వార్తాపత్రిక ట్రంప్‌కు సూచించింది.

"గ్రీన్‌లాండ్‌ విషయంలో అమెరికా అధ్యక్షుడు వెనక్కి తగ్గడం ప్రమాదకరం. ఇది మధ్యంతర ఎన్నికల్లో రిపబ్లికన్ పార్టీ స్థానాన్ని బలహీనపరుస్తుంది. కేపిటల్ హిల్‌లో డెమొక్రటిక్ పార్టీ మెజారిటీ సాధించడానికి దారితీయొచ్చు. ఈ ప్రభావం ట్రంప్‌పై పడుతుంది. కానీ ఎన్నికలకు ముందు గ్రీన్‌లాండ్‌ను త్వరగా స్వాధీనం చేసుకుంటే ఈ రాజకీయ ధోరణిని తిప్పికొట్టవచ్చు" అని ఆ పత్రిక పేర్కొంది.

చైనా స్పందనేంటి?

గ్రీన్‌లాండ్‌కు సంబంధించి అమెరికా అధ్యక్షుడు డోనల్డ్ ట్రంప్ బెదిరింపులపై చైనా స్పందించింది.

తన సొంత ప్రయోజనాలకోసం "చైనా ముప్పు" అంటూ సాకులు చెప్పడం ఆపాలని ఆమెరికాను తమ దేశం కోరినట్లు చైనా విదేశీ వ్యవహారాల మంత్రిత్వ శాఖ ప్రతినిధి గువో జియాకున్ సోమవారం తెలిపారు.

"ట్రంప్ గ్రీన్‌లాండ్‌ ప్రణాళిక, ఆయన వ్యాఖ్యలపై చైనా మీడియాలో రెండు విషయాలు హైలైట్ అవుతున్నాయి. మొదటిది చైనాను ముప్పుగా చూపించడంపై గట్టి వ్యతిరేకత, రెండోది యూరప్ స్పందన" అని బీబీసీ మానిటరింగ్ పేర్కొంది.

"గ్రీన్‌లాండ్‌ విషయంలో చైనాను ముప్పుగా చూపించే అమెరికా, యూరప్ వ్యాఖ్యలను చైనా వ్యతిరేకిస్తుంది" అని జనవరి 12న చైనాకు చెందిన గ్లోబల్ టైమ్స్‌లో సంపాదకీయం ప్రచురితమైంది.

ఇలాంటి వ్యాఖ్యలవల్ల దశాబ్దాలుగా ఆర్కిటిక్ పర్యావరణాన్నికాపాడడంలో చైనా చేస్తున్న కృషి, క్రియాశీల పాత్ర కనుమరుగవుతాయని ఆ వ్యాసంలో రాశారు.

ఆర్కిటిక్ ప్రాంతంలో తన సైనిక విస్తరణ, వనరుల దోపిడీ, ఆధిపత్య ప్రయత్నాలను కప్పిపుచ్చుకోవడానికి చైనాను ఆర్కిటిక్‌కు ముప్పుగా అమెరికా చిత్రీకరిస్తోందని పేర్కొంది.

ఆర్కిటిక్‌లో రష్యా, చైనా కార్యకలాపాలు క్రమంగా పెరుగుతున్నాయని నార్త్ అమెరికన్ ఏరోస్పేస్ డిఫెన్స్ కమాండ్ సీబీసీకి చెప్పిన తర్వాత ఈ కథనం వచ్చింది.

జనవరి 13న ఆర్కిటిక్‌లో పెరిగిన చైనా కార్యకలాపాల గురించి నేటో చీఫ్ మార్క్ రుట్టే కూడా ప్రస్తావించారు.

అమెరికా, యూరప్ మధ్య ఉద్రిక్తత కూడా ప్రధాన సమస్యగా మారింది.

"గ్రీన్‌లాండ్‌ను విలీనం చేసుకుంటామన్న అమెరికా బెదిరింపులు.. అంతర్జాతీయ వ్యవస్థ, నేటో విశ్వసనీయత ప్రాథమికంగా విచ్ఛిన్నం కావడాన్ని సూచిస్తున్నాయి" అని జనవరి 9న చైనాకు చెందిన సీజీటీఎన్‌ కథనం ఒకటి పేర్కొంది.

"ఈ సంక్షోభం డెన్మార్క్ సార్వభౌమాధికారానికి అంతిమ పరీక్ష అని, అన్ని దేశాలకు కఠినమైన హెచ్చరిక" అని ఆ వ్యాసంలో ఉంది.

"ట్రంప్ మాటల వల్ల అమెరికా విషయంలో ఎలాంటి గందరగోళనికి గురికావద్దు" చైనా మీడియా యూరప్‌ దేశాలకు సూచించింది.

రష్యా ఎందుకు సంతోషంగా ఉంది?

కానీ రష్యా ఎందుకు ట్రంప్‌ను ప్రశంసిస్తోంది? బహిరంగంగా ప్రోత్సహిస్తోంది? అన్నది ప్రశ్న.

"ప్రస్తుత పరిస్థితి నుంచి రష్యా భారీ ప్రయోజనాలను ఆశిస్తోంది" అని స్టీవ్ రోసెన్‌బర్గ్ అన్నారు.

గ్రీన్‌లాండ్‌పై ట్రంప్‌కు ఉన్న మక్కువ, ఆ ద్వీపాన్ని స్వాధీనం చేసుకోవాలనే ఆయన సంకల్పం, ఈ ప్రణాళికను వ్యతిరేకించే యూరోపియన్ దేశాలపై సుంకాలు విధిస్తామనే ఆయన బెదిరింపు, ట్రాన్స్ అట్లాంటిక్ కూటమితోపాటు అమెరికా, యూరప్ మధ్య, అలాగే నేటో అంతర్గత సంబంధాలపై తీవ్ర ఒత్తిడిని పెంచాయి.

పాశ్చాత్య కూటమిని బలహీనపరిచే లేదా విచ్ఛిన్నం చేసేది ఏదైనా రష్యా దృష్టిలో పెద్ద సానుకూల అంశం.

"యూరప్ పూర్తిగా గందరగోళంలో ఉంది, నిజం చెప్పాలంటే దాన్ని అలా చూడడం సరదాగా ఉంది" అని రష్యన్ టాబ్లాయిడ్ మోస్కోవ్స్కీ కొమ్సోమోలెట్స్ గ్రీన్‌లాండ్‌పై రాసిన ఒక వ్యాసంలో పేర్కొన్నారు.

( బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)