குஜராத்தில் தோனி அணி செய்த 'சம்பவம்' - வெற்றிக்கு 'இதுதான்' காரணமா?

நள்ளிரவு 1.35 மணி...3 நாட்களாக ரசிகர்கள் காத்திருந்த அந்த சம்பவம் நடந்தது…2023-ஐபிஎல் டி20 சாம்பியன் பட்டத்தை சென்னை சூப்பர் கிங்ஸ் அணி அபாரமாகக் கைப்பற்றியது.

28-ம் தேதி ஐபிஎல் பைனல் முடிவை அறிய வேண்டிய ரசிகர்கள் 30ம் தேதி நள்ளிரவு 1.35 மணிக்குத்தான் அறிய முடிந்தது. 5வது முறை ஐபிஎல் சாம்பியன் பட்டத்தை வென்று மும்பை இந்தியன்ஸ் அணிக்கு இணையாக சிஎஸ்கே அணியும் மகுடம் சூடியது.

சென்னை சூப்பர் கிங்ஸ் அணி இதுவரை 14 சீசன்களில் ஆடி, 10 முறை இறுதிப் போட்டிக்குச் சென்று, அதில் 5 முறை சாம்பியன் பட்டத்தைக் கைப்பற்றியுள்ளது. 2010, 2011, 2018, 2021 மற்றும் 2023 ஆகிய ஆண்டுகளில் சிஎஸ்கே அணி சாம்பியன் பட்டத்தை வென்று சாதனை படைத்துள்ளது.

ரூ.20 கோடி பரிசு

கோப்பை வென்ற சிஎஸ்கே அணிக்கு ரூ.20 கோடி ரொக்கப்பரிசும், 2ம் இடம் பெற்ற குஜராத் டைட்டன்ஸ் அணிக்கு ரூ.13 கோடியும் பரிசாக வழங்கப்பட்டது. சிஎஸ்கே கேப்டன் தோனி பரிசுத்தொகையைப் பெற்றபின், ராயுடு, ஜடேஜாவுடன் சேர்ந்து வெற்றிக் கோப்பையை தூக்கி மகிழ்ந்தார்.

3-வது இடம் பெற்ற மும்பை இந்தியன்ஸ் அணிக்கு ரூ.7 கோடியும், 4வது இடம் பெற்ற லக்னெள சூப்பர்ஜெயின்ட்ஸ் அணிக்கு ரூ.6.5 கோடியும் பரிசாக வழங்கப்பட்டது.

இப்படி ஒரு பைனலா…

வாவ்… என்ன மாதிரியான பைனல்!!. இதுவரை நடந்த ஐபிஎல் இறுதிப் போட்டிகளில் கடைசிப்பந்துவரை ரசிகர்களைக் கட்டிப்போட்ட, இதயத்துடிப்பை எகிற வைத்தது இந்த ஆட்டமாகத்தான் இருக்கும்.

சிஎஸ்கேவுக்கு எதிராக சென்னை(சாய் சுதர்ஷன்) வீரரின் அற்புதமான ஆட்டம், சிஎஸ்கே வெற்றி பெற குஜராத்(ஜடேஜா) வீரரின் உணர்வுப்பூர்வமான பங்களிப்பு என அனைத்துமே அழகு.

சிஎஸ்கே ரசிகர்கள் மறக்கமாட்டார்கள்

சிஎஸ்கே அணியின் வெற்றிக்கு ஜடேஜா, ராயுடு, ரஹானே, துபே ஆகியோரின் ஆட்டத்தில் யாரைக் குறிப்பிட்டு சொல்வது எனத் தெரியவில்லை. ஒவ்வொருவரும் தேவையான நேரத்தில் தங்களின் பங்களிப்பை அளித்து சிஎஸ்கே அணி சாம்பியன் பட்டத்தை வெல்லக் காரணமாக இருந்தனர்.

அதிலும் ஜடேஜாவின் கடைசி இரு பந்துகளில் அடித்த சிக்ஸரும், பவுண்டரியையும் சிஎஸ்கே ரசிகர்கள் இனி வாழ்நாளில் மறக்கமாட்டார்கள், ஜட்டு(ஜடேஜா)வையும் மறக்கமாட்டார்கள்.

இதுவரையிலான போட்டிகளில் தோனியின் வருகைக்காக ஜடேஜா உள்ளிட்டோர் களத்தில் பேட்டிங் செய்து கொண்டிருக்கும்போதே அவர்கள் ஆட்டமிழக்க வேண்டும் என்ற வகையில் ரசிகர்கள் முழக்கம் எழுப்பி வந்திருக்கிறார்கள். ஆனால் இந்த முறை தோனி ஆட்டமிழந்ததும் அரங்கம் முழுவதும் நிசப்தமாக இருந்தது.

தோனிக்குப் பதிலாக கடைசி இரு பந்துகளையும் எல்லைக்கு வெளியே அனுப்பி வெற்றி தேடித் தந்தார் ஜடேஜா. சென்னை அணியின் ரசிகர்கள் இதுவரை அரங்கத்தில் தனக்கு எதிராக எழுப்பிய முழக்கத்தையும் தவறு என்று மறைமுகமாகப் புரிய வைத்தார்.

ஜடேஜாவை தூக்கி கொண்டாடிய தோனி

சிஎஸ்கே அணி வெற்றி பெற்றதும் கொண்டாட்டத்தோடு வந்த ஜடேஜாவை தூக்கி, தனது மகிழ்ச்சியை மகேந்திர சிங் தோனி வெளிப்படுத்தி, கண்ணீர் சிந்திய தருணம் ரசிகர்களை மெய்சிலிர்க்க வைத்தது.

தோனியின் கேப்டன்ஷிப்புக்கு கிடைத்த வெற்றி

நட்சத்திர பேட்ஸ்மேன்கள், பந்துவீச்சாளர்கள் பெரிதாக யாருமில்லை, கடந்த சீசனில் 9-வது இடம், கேப்டன்ஷிப்பில் குழப்பம் என பல்வேறு சிக்கல்களைச் சந்தித்த நிலையில் இந்த சீசனை தோனி தலைமையில் சிஎஸ்கே அணி சந்தித்தது.

ஆனால், எந்த வீரரைக் கொடுத்தாலும் அவர்களை வெற்றியாளர்களாக மாற்ற முடியும் என்ற ரீதியில் தேஷ் பாண்டே, பத்திரணா, ஆகாஷ் சிங், கெய்க்வாட், துபே போன்ற சர்வதேச அனுபவம் இல்லாத வீரர்களை வைத்து, கோப்பையை வென்றது தோனி தலைமையிலான கேப்டன்ஷிப்புக்கு கிடைத்த மிகப்பெரிய வெற்றி.

மழையால் ஆட்டம் பாதிப்பு

ஆமதாபாத்தில் நேற்று நடந்த ஐபிஎல் டி20 போட்டியின் இறுதி ஆட்டத்தில் குஜராத் டைட்டன்ஸ் அணியை டக்வொர்ட் லீவிஸ் விதிப்படி 5 விக்கெட் வித்தியாசத்தில் சென்னை சூப்பர் கிங்ஸ் அணி வென்று 5-வது முறையாக சாம்பியன் பட்டத்தை கைப்பற்றியது.

முதலில் பேட் செய்த குஜராத் டைட்டன்ஸ் அணி 20 ஓவர்களில் 4 விக்கெட்இழப்புக்கு 214 ரன்கள் சேர்த்தது. மழை காரணமாக டக்வொர்த் லீவிஸ் விதிப்படி சிஎஸ்கே அணி வெற்றி பெற 15 ஓவர்களில் 171 ரன்கள் இலக்கு நிர்ணயிக்கப்பட்டநிலையில் அதை கடைசிப்பந்தில் எட்டி சாம்பியன் பட்டத்தை வென்றது.

திக்..திக்..நிமிடங்கள்

கடைசி ஓவரில் சிஎஸ்கே அணி வெற்றிக்கு 14 ரன்கள் தேவைப்பட்டது. களத்தில் ஷிவம் துபே, ஜடேஜா இருந்தனர். மோகித் சர்மா முதல் பந்தை ஆப்சைடு யார்கராக வீச துபே ரன் எடுக்கவில்லை. 2வது பந்தில் துபே ஒரு ரன் எடுத்து ஜடேஜாவிடம் ஸ்ட்ரைக்கைக் கொடுத்தார்.

மோகித் சர்மா 3-வது பந்தை லோ-புல்டாஸாக வீச, ஜடேஜா ஒரு ரன் எடுத்தார். 4-வது பந்தில் துபே ஒரு ரன் எடுத்து ஸ்ட்ரைக்கை ஜடேஜாவிடம் வழங்கினார்.

4 பந்துகளிலும் சிஎஸ்கே பேட்ஸ்மேன்கள் பெரிய ஷாட் ஏதும் அடிக்காமல் இறுக்கமாகச் சென்றதால், சிஎஸ்கே, குஜராத் ரசிகர்கள் இதயத்துடிப்பு எகிறியது. 4 பந்துகளையும் மோகித் சர்மா யார்கர்களாக வீசி ஜடேஜா, துபேவைக் கட்டுப்படுத்தினார்.

ஆனால், 5வது பந்தை மோகித் சர்மா லென்த்தை மாற்றி ஸ்லோ பாலாக வீசியவுடன், இதுக்குத்தானே காத்திருந்தேன் என்ற ரீதியில் ஜடேஜா லாங்ஆனில் சிக்ஸருக்கு பறக்கவிட்டார். கடைசிப் பந்தில் சிஎஸ்கே வெற்றிக்கு 4 ரன்கள் தேவைப்பட்டது. மோகித் சர்மா லோ-புல்டாசாக லெக்சைடு வீசிய பந்தை ஜடேஜா பவுண்டரிக்கு தட்டிவிட சிஎஸ்கே வென்றது.

மோகித் சர்மா அருமை

மோகித் சர்மா அற்புதமான கடைசி ஓவர் கடைசியில் இரு சிறிய தவறுகளுடன் முடிந்தது. 5-வது பந்தில் லென்த்தை தவறவிட்டதால் சிக்ஸர் சென்றது, கடைசிப் பந்தை லோபுல்டாசாக லெக்சைடு வீசியதுதான். மற்றவகையில் மோகிச் சர்மாவீசிய ஓவர் அற்புதமானது.

மோகித் சர்மா 13-வது ஓவரை வீசி 17 ரன்களை வழங்கினாலும் ராயுடு மற்றும் தோனி விக்கெட்டை வீழ்த்தி ஆட்டத்தை நெருக்கடிக்கு கொண்டு சென்றதையும் மறக்க முடியாது.

கடந்த சீசனில் குஜராத் டைட்டன்ஸ் அணியின் வலைப்பயிற்சி பந்துவீச்சாளராக இருந்த மோகித் சர்மா இந்த சீசனில் கலக்கியுள்ளார். 17 போட்டிகளில் ஆடிய மோகித் சர்மா 27 விக்கெட்டுகளை வீழ்த்தி 2வது இடம் பெற்றுள்ளார்.

ரசிகர்களை ஏமாற்றிய தோனி

சிஎஸ்கே அணி வெற்றிக்கு 14 பந்துகளில் 22 ரன்கள் தேவை என்ற நிலையில், கேப்டன் தோனி களமிறங்கவே, அரங்கில் ரசிகர்களின் கரகோஷம், விசில் சத்தம் காதைப் பிளந்தது.

ரசிகர்களின் மிகப்பெரிய ஆதரவுக்கு மத்தியில் தோனி களமிறங்கினார். சிஎஸ்கே அணியை தோனி கடைசிவரை களத்தில் இருந்து வெற்றி பெற வைப்பார் என ரசிகர்கள் எதிர்பார்த்தன். ஆனால், மோகித் சர்மா வீசிய 13-வது ஓவர் 5-வது பந்தில் எஸ்க்ட்ரா கவரில் தோனி தூக்கி அடிக்க, அதை மில்லர் கேட்ச்பிடிக்கவே கோல்டன் டக்அவுட்டில் தோனி வெளியேறி ரசிகரக்ளுக்கு ஏமாற்றம் அளித்தார்.

கடந்த முதல்தகுதிச்சுற்றிலும் இதேபோன் மோகித் சர்மா ஓவரில் எக்ஸ்ட்ரா கவரில்தான் தோனி கேட்ச் கொடுத்து ஆட்டமிழந்திருந்தார். அதேபோலவே இந்தமுறையும் கேட்ச் கொடுத்து தோனி மிகுந்த ஏமாற்றத்துடன் பெவிலியன் திரும்பினார்.

தோனி ஆட்டமிழந்து செல்வதற்கு முதல்பந்தில்தான் ராயுடுவும் விக்கெட்டை பறிகொடுத்திருந்தார். இதனால் அடுத்தடுத்து இரு விக்கெட்டுகளை சிஎஸ்கே இழந்து தடுமாற்றத்தைச் சந்தித்தது.

ஆட்டத்தை மாற்றிய சிஎஸ்கே ஹீரோக்கள்

சிஎஸ்கே அணியின் வெற்றிக்கு எந்த வீரரை குறிப்பிட்டுச் சொல்வது எனத் தெரியவில்லை. கான்வே(47), கெய்க்வாட்(26) அருமையான தொடக்கத்தை அளித்தனர். இருவரின் அதிரடியான ஆட்டத்தால் பவர்ப்ளேயில் 52 ரன்கள் சேர்த்த்து சிஎஸ்கேவுக்கு வலுவான தொடக்கம் அளித்தனர். முக்கியமான ஆட்டத்தை வெளிப்படுத்திய கான்வேவுக்கு ஆட்டநாயகன் விருது வழங்கப்பட்டது.

அதுமட்டுமல்லாமல், ரஹானே(27), ராயுடு(19) , துபே(32) ஆகியோர் தேவையான நேரத்தில் சூப்பர் கேமியோ அளித்து ஆட்டத்தில் பரபரப்பைக் குறைத்து வெற்றிக்கு அருகே கொண்டு சென்றனர். ஜடேஜா கடைசி நேரத்தில் அடித்த சிக்ஸர், பவுண்டரி பற்றி கேட்கவே தேவையில்லை, அவரின் அற்புதமான கடைசி இரு ஷாட்கள்தான் வெற்றிக்கான தருணம். இதில் சிஎஸ்கே வெற்றிக்கு எந்த வீரரைக் குறிப்பிடுவது எனத் தெரியவில்லை.

திருப்பம் ஏற்படுத்திய தருணம்

இருப்பினும் ரஷித் கான் ஓவரில் 2 சிக்ஸர்களை அடுத்தடுத்து, துபே பறக்கவிட்ட தருணமும், அதைத்தொடர்ந்து மோகித் சர்மா ஓவரில் ராயுடு அடித்த இரு சிக்ஸர்கள், ஒரு பவுண்டரியும்தான் ஆட்டத்தில் திருப்பு முனையை ஏற்படுத்தின. அதற்கு முன்பு ஆட்டம் குஜராத் கைகளில்தான் இருந்தது, ராயுடுவின் அமர்க்களமான ஆட்டத்துக்குப்பின்புதான் ஆட்டம் குஜராத்திடம் இருந்து சிஎஸ்கேவுக்கு மாறியது.

ரஷித் கான் ஓவரின் கடைசி இரு பந்துகளும், மோகித் சர்மாவின் ஓவரின் முதல் 3 பந்துகளும்தான் ஆட்டத்தைப் புரட்டிப்போட்டன. 6,6,6,4,6 என சிஎஸ்கே அணி சேர்த்த ஸ்கோர்தான் அவர்கள் கோப்பையை எட்ட காரணமாக இ ருந்தது. 4 பந்துகளில் சேர்த்த 28 ரன்கள்தான் சிஎஸ்கே அணியின் தலைவிதியை தீர்மானித்தது எனலாம்.

அதிலும் அம்பதி ராயுடு களமிறங்குபோது சிஎஸ்கே அணி வெற்றிக்கு 35 சதவீதம் மட்டுமே வாய்ப்பு இருந்தது. ஆனால் மோகித் சர்மா ஓவரில் 6,4,6 என ராயுடு விளாசியபின் சிஎஸ்கே வெற்றி வாய்ப்பு 93% ஆகஎகிறியது. ராயுடு 8 பந்துகளில் 19ரன்கள் சேர்த்து ஆட்டமிழந்தார்.

சிஎஸ்கே செய்த தவறுகள்

சிஎஸ்கே வீரர்கள் நேற்றைய ஆட்டத்தில் ஏராளமான தவறுகளைச் செய்தனர். கேட்சைக் கோட்டைவிடுதல், ரன்அவுட்டை தவறவிடுதல், ஓவர்த்ரோ மூலம் ரன்களை விடுதல் என பல வாய்ப்புகளை வீணடித்தனர்.

குறிப்பாக, 2வது ஓவரிலே சுப்மான் கில் ஆட்டமிழக்க வேண்டியது. கில் லெக் திசையில் அடித்த ஷாட்டை தீபக் சாஹர் கையில் பந்து விழுந்தும், கேட்சைப் பிடிக்காமல் கோட்டை விட்டார்.

தீக்சனா வீசிய 5வது ஓவரில், சுப்மான் கில் அடித்த ஷாட்டில் பந்தை தடுக்க வாய்ப்பு இருந்தும், டேவன் கான் கோட்டைவிட்டதால் பவுண்டரி சென்றது.

அதன்பின், ரவிந்திர ஜடேஜா பந்துவீச வந்தபோது, இரு ரன் அவுட்டை கோட்டைவிட்டார். தீக்சனா, தேஷ் பாண்டே இருவரும் பல பவுண்டரிகளை கோட்டைவிட்டனர். ஒட்டுமொத்தத்தில் சிஎஸ்கே வீரர்களின் பீல்டிங் மோசமாக இருந்தது. இதை கச்சிதமாக செய்திருந்தால், இன்னும் 20 ரன்கள் வரை குஜராத் அணியை கட்டுப்படுத்தி இருக்கலாம்.

கில், சாஹா அதிரடி

சுப்மான் கில், சாஹா இருவரும் நிதானமாக ஆட்டத்தைத் தொடங்கி 2 ஓவர்கள்வரை பொறுமை காத்தனர். தேஷ் பாண்டே வீசிய 2வது ஓவரில் கில் ஸ்குயர் லெக் திசையில் அடித்த ஷாட்டை தீபக் சாஹர் கோட்டை விட்டார். மும்பை அணிக்கு எதிரான ஆட்டத்தில் டேவிட் கோட்டைவிட்ட கேட்சால் கில் சதம் அடித்தார். இந்த ஆட்டத்தில் என்னஆகுமோ என்று ரசிகர்கள் எதிர்பார்த்தனர்.

3வது ஓவரில் இருந்து சாஹா அதிரடிக்கு மாறி சாஹர் ஓவரில் ஒரு சிக்ஸர், 2 பவுண்டரிகளை விளாசினார்.

ஏற்கெனவே முரட்டுத்தனமான ஃபார்மில் இருக்கும் கில், தேஷ் பாண்டேவின் 4-வது ஓவரில் ஹாட்ரிக் பவுண்டரிகளை விளாசினார். கில்லின் ரன் வேகத்தைக் கட்டுப்படுத்த, தோனி தீக்சனாவைக் கொண்டுவந்தார். தீக்சனா வீசிய 5வது ஓவரில் கில் ஹாட்ரிக் பவுண்டரிகளை விளாசி ரன்ரேட்டை உயர்த்தினார். இருவரின் அதிரடியால், 10 ரன்ரேட்டில் சென்றது. பவர்ப்ளே முடிவில் குஜராத் அணி, விக்கெட் இழப்பின்றி 62 ரன்கள் சேர்த்தது.

தோனியின் மின்னல் ஸ்டெம்பிங்

பவர்ப்ளே ஓவர் முடிந்து ஜடேஜா பந்துவீச அழைக்கப்பட்டார். ஜடேஜா வீசிய 7-வது ஓவரின் 2வது பந்தில் 2ரன்கள் ஓட கில் முயன்றார். அப்போது கில் ரன்அவுட் செய்யும் வாய்ப்பை ஜடேஜா தவறவிட்டார். அதே ஓவரில் 5வது பந்தில் சஹாவுக்கு ஒரு ரன்அவுட்டையும் ஜடேஜா கோட்டைவிட்டார்.

கடைசிப் பந்தில் அந்த திருப்புமுனை நடந்தது. ஜடேஜா வீசிய பந்து கில் பிரன்ட்புட்டில் அடிக்க முயல பந்து லெக் ஸ்பின்னாகி தோனியிடம் வந்தது. இந்த வாய்ப்பை தவறவிடாத தோனி, 0.1 வினாடிகளில், மின்னல் வேகத்தில் ஸ்டெம்பிங் செய்து கில்லை வெளியேற்றினார்.

மிகவும் எதிர்பார்க்கப்பட்ட கில் 39 ரன்னில் வெளியேற்றி சிஎஸ்கே அணியினர் பெருத்த நிம்மதி அடைந்தனர். 250 ஐபிஎல் போட்டியில் விளையாடிய தோனி, கில்லை ஸ்டெம்பிங் செய்து தனது 300-வது டிஸ்மிசலை எட்டினார்.

பொறுமை காத்த சுதர்ஷன்

கில் ஆட்டமிழந்து சென்றபின் சாய் சுதர்ஷன் களமிறங்கினார். ஆனால் கில் இருந்தபோது ரன்ரேட்டில் இருந்தவேகம் அதன்பின் இல்லாததால், ரன்ரேட் குறையத் தொடங்கியது. 10 ஓவர்கள் முடிவில் ஒரு விக்கெட் இழப்புக்கு 86 ரன்களையே குஜராத் அணி சேர்த்தது. 32 பந்துகளில் 50 ரன்களை எட்டிய குஜராத் அணி, அடுத்த 28 பந்துகளில் 36 ரன்களையே சேர்த்து ரன்ரேட் மந்தமாகியது.

12வது ஓவரில் பத்திரணா பந்துவீச அழைக்கப்பட்டார். அவர் வீசிய ஓவரில் சாய் சுதர்ஷன் இரு பவுண்டரிகளை விளாசி 13ரன்களைச் சேர்த்தார். ஜடேஜா வீசிய 13-வது ஓவரில் பவுண்டரி அடித்து சாஹா 36 பந்துகளில் அரைசதத்தை நிறைவு செய்தார்.

அதன்பின் சாஹா நீண்டநேரம் நிலைக்கவில்லை, தீபக் சாஹர் வீசிய 14-வது ஓவரின் கடைசிப்பந்தில் லெக்திசையில் தூக்கி அடிக்க சாஹா முயன்றார். ஆனால், பேட்டின் முனையில் பட்டு தோனியிடம் கேட்சாக மாறியது. சாஹா 54 ரன்னில் ஆட்டமிழந்து பெவிலியன் சென்றார்.

சாஹா களத்தில் இருந்தவரை சாய் சுதர்ஷன் பொறுமை காத்தவர் அவர் ஆட்டமிழந்தபின் அதிரடிக்கு மாறி தனக்கு கிடைத்த வாய்ப்பை சரியாகப் பயன்படுத்தி சிஎஸ்கே பந்துவீச்சை வெளுத்துவாங்கினார்.

சென்னை வீரரின் மிரட்டல் ஆட்டம்

அதன்பின் சாய் சுதர்ஷன் ஆட்டத்தை டாப்கியருக்கு மாற்றினார். தீக்சனா வீசிய 15-வது ஓவரில் சாய் சுதர்ஷன் மிட்விக்கெட்டில் இரு சிக்ஸர்களை விளாசி 33 பந்துகளில் அரைசதம் விளாசினார். சுதர்ஷன் அரைசதம் விளாசியதும் அவரைக் கட்டித்தழுவி ஹர்திக் பாண்டியா ஊக்கப்படுத்தினார்.

பதிரனா வீசிய 16-வது ஓவரிலும் 2 பவுண்டரிகள் விளாசி சுதர்ஷன் ரன்ரேட்டை வேகப்படுத்தினார். தேஷ் பாண்டே வீசிய 17-வது ஓவரை வெளுத்துவாங்கிய சுதர்ஷன் தேர்டு மேன் திசையில் ஒரு சிக்ஸர், மற்றும் ஹாட்ரிக் பவுண்டரிகளை விளாசி 20 ரன்களைச் சேர்த்தார்.

தேஷ் பாண்டே வீசிய 19-வது ஓவரை ஹர்திக்கும், சுதர்ஷனும் பொட்லகம் கட்டினர். . ஹர்திக் இரு சிக்ஸர்களையும், சுதர்சன் பவுண்டரியும் அடித்து 18 ரன்கள் சேர்த்தனர்.

டக்அவுட்டில் வரவேற்பு

பத்திரணா வீசிய கடைசி ஓவரை சுதர்ஷன் எதிர்கொண்டார். முதல் பந்தில் எக்ஸ்ட்ரா கவரில் ஒரு சிக்ஸரும், 2வது பந்தில் லாங்ஆனில் ஒரு சிக்ஸரையும் பறக்கவிட்டார். இதைப் பார்த்த ஹர்திக், சுதர்சனைக் கட்டிப்பிடித்து மகிழ்ச்சியை வெளிப்படுத்தினார்.

3வது பந்தில் சாய் சுதர்ஷன் கால்காப்பில் வாங்கி 96 ரன்களில் ஆட்டமிழந்தார்(47பந்துகள், 6சிக்ஸர், 8பவுண்டரி). சாய் சுதர்ஷனின் அருமையான ஆட்டத்தை வரவேற்ற குஜராத் அணியினர் அவரை டக்அவுட் பகுதியில் வரவேற்று அவரை உற்சாகப்படுத்தினர். கடைசியில் களமிறங்கிய ரஷித் கான் சிக்ஸர் அடிக்க முற்பட்டு ஆட்டமிழந்தார்.

சாய் சுதர்சன் தனது முதல்27 பந்துகளில் 37 ரன்கள்தான் சேர்த்திருந்தார். ஆனால், அதிரடிக்கு மாறியபின், கடைசி 20 பந்துகளில் அவரின் ஸ்ட்ரைக் ரேட் 200 ஆக உயர்ந்தது. ஐபிஎல் பைனலில் மிகக்குறைந்த வயதில் அரைசதம் அடித்தவர் என்ற பெயரை சாய் சுதர்சன் பெற்றார். குஜராத் டைட்டன்ஸ் வீரர் சாய் சுதர்ஷன் அடித்த 96 ரன்கள் என்பது ஐபிஎல் இறுதி ஆட்டத்தில் ஒரு பேட்ஸ்மேன் அடித்த 3வது அதிகபட்ச ஸ்கோர்.

20ஓவர்கள் முடிவில்குஜராத் அணி 4 விக்கெட் இழப்புக்கு 214 ரன்கள் குவித்தது.

‘தோனியிடம்தானே தோற்றேன்’

குஜராத் டைட்டன்ஸ் அணியின் கேப்டன் ஹர்திக் பாண்டியா கூறுகையில் “ இந்த சீசனில் நாங்கள் சிறப்பாகவே விளையாடினோம். எந்த நேரத்திலும், இடத்திலும் தோல்வி அடையாமல் இருக்க குழுவாக மிகுந்தநம்பிக்கையுடன் விளையாடினோம். ஒன்றாகவே வென்றோம், ஒன்றாகவே தோற்றோம். இந்த ஆட்டமும் அப்படித்தான். தோல்விக்கு ஏதும் காரணம் கூறப்போவதில்லை.

சாய் சுதர்ஷன் ஆட்டம் அற்புதமானது, இனி அவர் வாழ்வில் அதியசங்கள் நிகழும். அவருக்கு ஆதரவாக நாங்கள் இருப்போம். ரஷித்கான், ஷமி, மோகித் ஒவ்வொருவரும் தங்களின் பங்களிப்பை அளித்தனர். சிஎஸ்கே சிறந்த கிரிக்கெட்டை ஆடினார்கள். தோனியை நினைத்து மகிழ்ச்சியாக இருக்கிறது, இந்த கோப்பை அவருக்கென எழுதப்பட்டுள்ளது, நான் தோல்வி அடைந்தாலும், தோனியிடம் தோற்றதை மனதில் வைக்கமாட்டேன் நல்ல மனிதர்களுக்கு நல்லது நடக்கும்” எனத் தெரிவித்தார்.

‘அடுத்த சீசனும் வருவேன் ஆனால்’…

வெற்றிக்குப்பின் மகிழ்ச்சியுடன் பேசிய தோனி “சூழலைப் பார்த்து ஓய்வை அறிவிக்க சிறந்த நேரமாக இருந்தால், எளிதாக நன்றி சொல்லி, ஓய்வை அறிவித்துவிடுவேன். ஆனால், இன்னும் 9மாதங்கள் கடினமாக உழைத்து, இன்னும் ஒரு சீசன் விளையாட முயல்கிறேன், ஆனால், அதற்கு என் உடல் ஒத்துழைக்க வேண்டும், அதற்கு தயார் செய்ய வேண்டும்.

ஏராளமான அன்பை, நான் சிஎஸ்கே ரசிகர்களிடம் இருந்து பெற்றுள்ளேன், இன்னும் ஒரு சீசன் ஆடுவது எனக்கு மிகப்பெரிய பரிசாக இருக்கும். சிஎஸ்கே ரசிகர்கள் வெளிப்படுத்திய அன்பு, உணர்வுகள் அவர்களுக்கு ஏதாவது நான் செய்ய வேண்டும் என்கிறது. இது எனது கிரிக்கெட் வாழ்க்கையின் கடைசிப்பகுதி. நான் இங்குதான் பேசத் தொடங்கியதும், என் பெயரை ரசிகர்கள் உச்சரிக்கிறார்கள், இதேதான் சென்னையிலும் நடந்துத. என்னால்முடிந்த அளவு திரும்பி வந்து நான் விளையாடுவேன்.

ஒவ்வொரு கோப்பை, சீரிஸ் வெல்லும்போதும் அது எனக்கான சவால்தான். ஒவ்வொருவரும் விதவிதமான அழுத்தத்தைச் சந்தித்தார்கள். ரஹானே அனுபவமானவர். மற்ற வீரர்கள் இளைஞர்கள், புதியவர்கள், குழப்பத்தில் ஆழ்ந்தனர். ராயுடு களத்தில் இருந்தாலே 100% வெற்றியைக் கொடுத்துவிடுவார். இந்தியா ஏ அணிக்கு இருவரும் இணைந்து விளையாடியுள்ளோம். எப்போதும் சிறப்பாக ஏதேனும் செய்வார் என ராயுடு மீது எனக்கு நம்பிக்கை இருக்கும். என்னைப் போலவே அதிகம் செல்போன் பயன்படுத்தமாட்டார்” எனத் தெரிவித்தார்.

பர்பிள் கேப் விருது

அதிகவிக்கெட்டுகளை எடுத்து பர்பிள் கேப் வெற்றியாளர் விருதும் ரூ.15 லட்சம் பரிசும் குஜராத் டைட்டன்ஸ் வேகப்பந்துவீச்சாளர் முகமது ஷமி(28) வழங்கப்பட்டது.

2023 வளர்ந்துவரும் வீரர்

2023 சீசனில் வளர்ந்துவரும் இளைஞர், வீரர் விருதும், ரூ.20 லட்சமும் ராஜஸ்தான் ராயல்ஸ் தொடக்க ஆட்டக்காரர் யாசஸ்வில ஜெய்ஸ்வாலுக்கு வழங்கப்பட்டது.

ஆரஞ்சு தொப்பி விருது

2023 சீசனில் 3 சதங்கள், 4 அரைசதங்கள் விளாசி 890 ரன்கள் சேர்த்த குஜராத் டைட்டன்ஸ் அணியின் தொடக்க ஆட்டக்காரர் சுப்மான் கில்லுக்கு ஆரஞ்சு தொப்பி விருது வழங்கப்பட்டது. மதிப்பு மிக்க வீரர் விருதும், ரூ.12 லட்சமும் கில்லுக்கு வழங்கப்பட்டது.

சமூக ஊடகங்களில் பிபிசி தமிழ்: