Интиқоди Русия аз лағви дидори Путин ва Убомо

  • 8 Август, 2013
Image caption Раҳбарони Русия ва Омрико охирин бор дар моҳи июн дар ҳошияи иҷлоси Гурӯҳи 8 дар Ирлонди Шимолӣ бо якдигар мулоқот доштанд

Русия мегӯяд аз иқдоми Омрико барои лағви дидори моҳи ояндаи раҳбарони ин ду кишвар дар пайи эътои паноҳандагӣ ба Эдворд Иснувден, "дилсард" шудааст.

Мушовири равобити хориҷии раиси ҷумҳури Русия гуфтааст ин иқдоми Омрико нишон дода, ки Вошингтун наметавонад равобиташро бо Маскав бар асоси як мавзеъи баробар тақвият кунад.

Далели лағви дидори Борок Убомо ва Владимир Путин, ки қарор буд моҳ сентябр баргузор шавад,эътои паноҳандагии муваққат ба Эдворд Иснувден аз сӯйи давлати Русия эълом шудааст.

Эдворд Иснувден, таҳлилгари собиқи СИО, баъд аз ифшои як барномаи сиррии таҷассус ва назорати электруникӣ аз Омрико гурехт ва акнун Вошингтун дар пайи бозгардондан ва муҳокимаи ӯст.

Яке аз дастёрони Кохи Сафед гуфта эътои паноҳандагӣ ба оқои Иснувден танишҳои қаблии байни ин ду кишварро ташдид кардааст.

Бо ин ҳол, оқои Убомо, раиси ҷумҳурии Омрико, ҳамчунон бино дорад дар нишасти иқтисодии кишварҳои Гурӯҳи 20, ки моҳи оянда дар Сан Питерзбурги Русия баргузор мешавад, ширкат кунад.

Юрий Юшаков, мушовири равобити хориҷии Владимир Путин, рӯзи чаҳоршанбеи 8 август гуфт набояд Русияро ба хотири моҷарои оқои Иснувден сарзаниш кард.

Ӯ дар кунфронси хабарӣ, ки аз тариқи телефун баргузор шуд, гуфт: "Ин тасмими Омрико барои лағви дидори дуҷониба, ошкоро ба вазъияти Эдворд Иснувден, маъмури собиқи Сервисҳои Иттилоъотии Омрико муртабит аст; вазъияте, ки тақсири Русия нест."

Оқои Юшаков гуфт: "Солҳост, ки омрикоиҳо ҳозир нашудаанд бо Русия мувофиқатномаи истирдоди афрод имзо кунанд. Онҳо ҳамвора дархостҳои моро барои истирдоди афроде, ки дар хоки Русия муртакиби ҷурме шудаанд, рад кардаанд ва гуфтаанд, ки чунин мувофиқатномае байни мо нест."

Бо ин ҳол ин мушовири равобити хориҷии Владимир Путин афзуда, ки даъват барои нишасти дуҷониба ҳамчунон ба қуввати худ боқӣ аст.

Аз Иснувден то сомонаи дифъои мушакӣ

Image caption Русия ба Иснувден барои як сол паноҳандагӣ додааст.

Тасмим ба лағви ин нишаст дар ҷараёни сафари Борок Убомо ба Лус Анҷелес эълом шуд. Оқои Убомо соъоте пеш аз ин тасмим аз иқдоми Русия ба эътои паноҳандагӣ ба Эдворд Иснувден, "ибрози ноумедӣ" карда буд.

Кохи Сафед ҳамчунин эълом карда, ки пешрафти кофӣ дар дигар заминаҳои мавриди ихтилоф монанди сомонаи дифоъи мушакӣ, равобити тиҷорӣ ва ҳуқуқи башар сурат нагирифтааст.

Владимир Путин, раиси ҷумҳурии Русия, пештар гуфта буд, ки равобити миёни ду кишвар аз кашмакашҳои миёни созмонҳои иттилоъотӣ муҳимтар аст.

Ахиран фош шуд, ки Ожонси амнияти миллии Иёлоти Муттаҳидаи Омрико иттилоъоти марбут ба муколимоти даҳҳо милюн нафар аз атбоъи кишварро радёбӣ ва ҷамъоварӣ кардааст.

Ду рӯзномаи Гардиян ва Вошингтун Пуст дар гузоришҳое дар мабнои иттилоъоти ифшошуда тавассути оқои Иснувден гуфта буданд, ки Созмони Иттилоъотии Омрико аз як ширкати хадамоти телефун ва интернет хоста буда, ки тамомии шумораи телефунҳо, замони барқарории иртибот ва муддати муколимот ба давлат таҳвил дода шавад.

Ифшои ин иқдоми созмонҳои иттилоъотӣ ва амниятии Омрико бо вокуниши давлати Омрико рӯбарӯ шуд ва мақомҳои омрикоӣ ифшои ин ҷузъиётро маҳкум карданд.

Эдворд Иснувден пас аз гурехтан аз Омрико ва тарки Ҳунгкунг, ҳудуди як моҳро дар минтақаи тронзити фурудгоҳи Маскав гузаронд. Дар ин муддат Омрико ба кишварҳои дигар фишор меоварад, ки дархости паноҳандагии ӯро рад кунанд.

Аммо рӯзи аввали август оқои Иснувден ин фурудгоҳро тарк кард ва вориди хоки Русия шуд. Давлати Русия гуфтааст ба ӯ барои як сол паноҳандагӣ додааст.

Матолиби муртабит