'Куреи Шимолӣ дигар наметавонад аз буҳронсозӣ суд бибарад'
Борок Убомо, раиси ҷумҳурии Омрико гуфтааст, ки Куреи Шимолӣ дигар ба хотири рафторҳои таҳрикомез ташвиқ нахоҳад шуд.
Ӯ дар кунфронси хабарии муштарак бо Порк Гунҳой, раиси ҷумҳурии Куреи Ҷанубӣ гуфт, ки Куреи Шимолӣ акнун беш аз ҳар замоне мунзавӣ аст.
Хонуми Порк, ки нахустин раиси ҷумҳури зани Куреи Ҷанубӣ аст, дар аввалин сафари хориҷии худ пас аз ба қудрат расидан дар феврали соли ҷорӣ ба Омрико рафтааст.
Пеш аз ин дидори руасои ҷумҳури Омрико ва Куреи Ҷанубӣ мақомоти омрикоӣ гуфта буданд, ки Куреи Шимолӣ ду мушаки миёнбурди худро аз як пойгоҳи соҳилии партоби мушак хориҷ кардааст. Ба гуфтаи таҳлилгарон, ин иқдоми Куреи Шимолӣ аз сатҳи танишҳо костааст.
Оқои Убомо пас аз дидори худ бо хонуми Порк, ки дар Кохи Сафед баргузор шуд, гуфт: "Рӯзҳое, ки Куреи Шимолӣ метавонист буҳрон дуруст кунад ва имтиёз бигирад, гузаштаанд."
Раиси ҷумҳури Омрико бар иштироки назар бо Куреи Ҷанубӣ дар бораи ҳифзи "мавзеъи боздорандаи" худ таъкид кард.
Ӯ гуфт: "Қарор нест ба рафтори таҳрикомез ҷоиза бидиҳем, вале мунтазирем Куреи Шимолӣ як шеваи сулҳомез дар пеш бигирад."
Борок Убомо гуфт: "Дастикам то кунун мо иқдоме аз сӯйи Куреи Шимолӣ надидаем, ки нишон диҳад мехоҳанд дар масири дигаре қадам бардоранд."
Ин дидори раиси ҷумҳури Куреи Ҷанубӣ ва Омрико бо 60-солагии иттиҳоди Вошингтун ва Сэул ҳамзамон шудааст.
Порк Гунҳой дар ин дидор гуфт кишвараш ончиро, ки ӯ "густохӣ ва саркашии" Куреи Шимолӣ хонда, таҳаммул намекунад.
Ӯ дар айни ҳол гуфтааст: "Ба ҷои ин ки сирфан умедвор бошем Куреи Шимолӣ иваз шавад, ҷомеъаи байналмилалӣ бояд мудовиман ин паёмро бо садои воҳид бифиристад, ки онҳо ҳеҷ интихобе ҷуз ин надоранд, ки тағйир кунанд."
Дар ҳафтаҳои гузашта гумон бурда мешуд, ки Пюнг Ёнг (Пхенян) дар ҳоли омода шудан барои партоби мушак аст. Куреи Шимолӣ ҳамчунин забон ба таҳдид низ гушуда буд.
Ин таҳдидҳо дар пайи таҳримҳои ҷадиди Созмони Милал алайҳи Куреи Шимолӣ матраҳ шуд, ки пас аз севумин озмоиши мушакии Пюнг Ёнг дар декабри гузашта вазъ шуданд.
Куреи Шимолӣ ҳамчунин аз размоишҳои густардаи солонаи муштараки байни Омрико ва Куреи Ҷанубӣ хашмгин буд. Ин размоишҳо ҳафтаи пеш поён ёфтанд.
Дар ҳамин ҳол, бонки давлатии Чин гуфтааст, ки мубодилот бо бонки тиҷорати хориҷии Куреи Шимолиро рӯзи сешанбе мутаваққиф кардааст. Гумон меравад ин аввалин бор бошад, ки як ниҳоди чинӣ хилофи манофеъи Куреи Шимолӣ ҳаракат мекунад.
Ҳафтаи пеш дар 3 май як шаҳрванди омрикоӣ дар Куреи Шимолӣ ба ҳабс бо аъмоли шоқа маҳкум шуд.
Хабаргузории давлатии Куреи Шимолӣ гузориш дод, ки Пи Ҷун Ҳуи 44-сола ба "тавтеъа алайҳи низом" муҷрим шинохта шуда ва ба 15 сол ҳабс бо аъмоли шоқа маҳкум шудааст.
Ин нахустин бор нест, ки Куреи Шимолӣ шаҳрванди омрикоиро боздошт ва ба муҷозотҳои сангин маҳкум мекунад.
