Vita vya Ukraine: Jinsi mchoro wa mtoto wa Urusi ulivyoibua uchunguzi wa polisi

Katikati ya mji wa Urusi wa Yefremov kuna ukuta uliofunikwa na picha za vita.

Picha kubwa za wanajeshi wa Urusi waliojifunika nyuso zao wakiwa na bunduki na herufi kubwa zaidi Z na V - alama za kile kinachoitwa "operesheni maalum ya kijeshi" nchini Ukraine.

Kuna shairi pia:

Ngumi nzuri inahitaji kuwa na mkono wa chuma

Kurarua ngozi kutoka kwa wale wanaotutisha

Hii ndio picha rasmi, ya kizalendo ya uvamizi wa Urusi nchini Ukraine.

Lakini katika mji huu, maili 200 (320km) kusini mwa Moscow, utapata taswira nyingine ya vita vya Ukraine. Ambayo ni tofauti sana.

Diwani wa jiji Olga Podolskaya ananionesha picha kwenye simu yake ya mkononi.

Ni ya mchoro wa mtoto.

Upande wa kushoto ni bendera ya Ukraine yenye maneno "yanayosifu Ukraine"; upande wa kulia, ya Urusi yenye maandishi "Hapana kwa vita!".

Makombora yanaporuka kutoka upande wa Urusi, mama na mtoto wake wamesimama kijasiri kwenye njia yao.

Picha hiyo ilichorwa mnamo Aprili 2022 na Masha Moskaleva mwenye umri wa miaka 12. Baba yake Alexei alikuwa amewasiliana na diwani wa mji kwa ushauri. Alimwambia kwamba baada ya kuona mchoro wa Masha, shule yake iliita polisi.

"Polisi walianza kuchunguza mitandao ya kijamii ya Alexei," Olga ananiambia. "Na wakamwambia kwamba alikuwa akimlea binti yake vibaya."

Mashtaka yalifuata.

Kwa chapisho la kupinga vita kwenye mitandao ya kijamii, Alexei alitozwa faini ya rubles 32,000 (karibu $415 au £338 wakati huo) kwa kudharau jeshi la Urusi.

Wiki chache zilizopita, kesi ya jinai ilifunguliwa dhidi yake. Tena, machapisho ya kupinga vita yaliweka msingi wa malipo ya kukashifu.

Na sasa Alexei anakabiliwa na kifungo kinachowezekana kuwa cha gerezani.

Alexei kwa sasa yuko chini ya kizuizi cha nyumbani huko Yefremov.

Binti yake Masha kwa sasa amepelekwa kwenye nyumba ya watoto. Alexei hataruhusiwa hata kuzungumza naye kwenye simu.

"Hakuna mtu ambaye amemwona Masha tangu Machi 1," Olga Podolskaya ananiambia, "licha ya majaribio yetu ya kufika nyumba ya watoto na kujua jinsi hali yake ilivyo.

"Mamlaka ya Urusi wanataka kila mtu afuate mstari huo. Hakuna mtu anayeruhusiwa kuwa na maoni yake mwenyewe. Ikiwa haukubaliani na kile mtu anachofikiria, basi usisome machapisho yao kwenye mitandao ya kijamii. Lakini usimweke mtu huyo chini ya kizuizi cha nyumbani cha kukaa katika nyumba ya watoto."

Tumesimama nje ya jengo la ghorofa huko Yefremov.

Dirisha linafunguliwa na mtu anatazama nje. Ni Alexei. Haturuhusiwi kuwasiliana naye. Chini ya sheria za kukamatwa kwake, Alexei anaruhusiwa tu kuwasiliana na wakili wake, mpelelezi na mtoa huduma ya kifungo.

Wakili wa Vladimir Biliyenko, amewasili hivi karibuni. Amemletea chakula na vinywaji ambavyo wanaharakati wa ndani wamemletea Alexei.

"Ana wasiwasi sana kwasababu binti yake hayuko naye," Vladimir ananiambia baada ya kumtembelea Alexei Moskalev. "Kila kitu ndani ya hiyo nyumba kinamkumbusha yeye. Ana wasiwasi kuhusu kile ambacho kinaweza kumtokea."

Namuuliza mwanasheria kwanini anadhani mamlaka imemchukua Masha.

"Ikiwa walikuwa na maswali ya kweli kwa baba, walipaswa kumuhoji kutoa taarifa. Walipaswa kumruhusu Masha, pia kuzungumza naye," Vladimir anasema.

"Hakuna lolote kati ya haya lililofanyika. Waliamua tu kumfukuza [kwenye nyumba ya watoto]. Kwa maoni yangu, kama sio aina ya mashtaka ya kiutawala na ya jinai ambayo Alexei amepokea, hili lisingefanyika, huduma za kijamii zinaonekana kuhangaishwa na familia hii. Nadhani ni kwa sababu za kisiasa tu. Shida za familia zilianza tu baada ya msichana wao kuchora picha hiyo."

Mtaani, ninawauliza majirani wa Alexei wanafikiri nini kuhusu hali hiyo.

"Yeye ni msichana mzuri, na sijawahi kuwa na shida na baba yake," anasema mstaafu Angelina Ivanovna. "Lakini ninaogopa kusema chochote. Ninaogopa."

"Labda tunaweza kukusanya saini ili kumsaidia Alexei," msichana mmoja anapendekeza. Lakini alipoulizwa maoni yake juu ya kile kinachotokea, anajibu: "Samahani, siwezi kukueleza chochote."

Ninauliza ikiwa anaogopa juu ya matokeo yanayoweza kutokea.

"Ndiyo, bila shaka."

Ni umbali mfupi kutoka kwenye jengo la ghorofa la Alexei Moskalev hadi Shule Nambari 9, ambako Masha alikuwa amesoma na kwamba baba yake anasema aliwaita polisi kuhusu mchoro wa Masha wa kupinga vita. Shule bado haijajibu ombi letu lililoandikwa la kutoa maoni. Tulipojaribu kutembelea, tuliambiwa hatukuweza kuingia. Simu zetu ziliita bila kupokelewa.

Lakini nimetembelea tovuti ya Shule nambari 9. Picha za hapo zinanikumbusha ukuta wa kizalendo niliouona katikati ya mji.

Ukurasa wa nyumbani unaangazia Mashujaa wa Operesheni Maalum ya Kijeshi - picha dazeni mbili za askari wa Urusi waliopigana nchini Ukraine.

Kuna kauli mbiu za kizalendo pia: "Kila kitu Ushindi. Tuwaunge mkono vijana wetu walio mstari wa mbele!"

Wanajeshi waliorudi kutoka Ukraine walitembelea Shule nambari 9 mnamo mwezi Oktoba mwaka jana. Katika hotuba yake mkurugenzi wa shule hiyo ya Larisa Trofimova alitangaza: "Tunajiamini sisi wenyewe na katika Nchi yetu, ambayo haiwezi kamwe kufanya makosa."

Katika jiji lote wafuasi wa familia ya Moskalev na waandishi wa habari wanakusanyika katika mahakama ya ndani. Tume ya Masuala ya Watoto ya Yefremov inachukua hatua za kisheria kuzuia rasmi haki za mzazi za Alexei.