Kwa nini watoto nchini Singapore ni wazuri sana katika somo la hisabati?

Singapore imeorodheshwa katika nafasi ya juu duniani katika hisabati, usomaji na ufanisi wa sayansi miongoni mwa wanafunzi wa shule katika mitihani ya Pisa ya 2022.

Kihistoria nchi hiyo imekuwa na mafanikio makubwa katika hisabati hasa, na sifa nyingi huchangiwa na jinsi somo hilo linavyofunzwa

Hisabati ya Singapore ni nini na kwa nini imefanikiwa sana?

Pisa (Programu ya Tathmini ya Wanafunzi wa Kimataifa) ni mfumo wa kuorodhesha wa viwango vya elimu vya watoto wa miaka 15, ulioanzishwa na Shirika la Ushirikiano wa Kiuchumi na Maendeleo (OECD).

Katika hisabati, mojawapo ya masomo makubwa matatu ya Pisa 2022, watoto wenye umri wa miaka 15 nchini Singapore walipata pointi 575 ikilinganishwa na wastani wa pointi 472 katika nchi 81 zilizoshiriki.

Mamlaka za Singapore zinaamini kuwa elimu ya hisabati ina jukumu muhimu katika kuwawezesha watu kufikiria kimantiki na kiuchanganuzi, kwa hiyo tangu wakiwa wadogo, watoto wa Singapore hujifunza jinsi ya kuendeleza michakato muhimu ya hisabati kama vile kufikiria, mawasiliano na uundaji wa mifano.

Mbinu bainifu ya taifa ya kufundisha hisabati inajulikana kama Hisabati ya Singapore.

Hapo awali ilitengenezwa na Wizara ya Elimu ya Singapore katika miaka ya 1980 kwa shule zake za umma.

Mbinu hiyo huhamisha mwelekeo wake kutoka kwa kukariri hadi kuwa na uelewa wa kina wa kile wanachosoma, na imekubaliwa sana katika aina mbalimbali ulimwenguni katika miongo ya hivi karibuni.

Je, Hisabati za Singapore hufanyaje kazi?

Kuna mawazo mawili ya msingi ambayo yana msingi wa mbinu ya Hisabati ya Singapore: Mbinu ya Zege, Picha, Kikemikali (CPA) na dhana ya umahiri.

CPA si ya kipekee kwa Hisabati ya Singapore na ilitengenezwa na mwanasaikolojia wa Marekani Jerome Bruner katika miaka ya 1960.

Inatokana na wazo kwamba watoto au hata watu wazima wanaweza kupata hisabati ngumu kwa sababu ni ya kufikirika.

Kwa hivyo CPA huleta dhana dhahania kwa njia inayoonekana, na kisha tu kuendelea hadi masomo changamano zaidi.

"Katika Hisabati ya Singapore, watoto daima hufanya jambo fulani thabiti," Dk Ariel Lindorff, Profesa Mshiriki wa Elimu katika Chuo Kikuu cha Oxford, aliiambia BBC.

"Wanaweza kuwa na 'cubes' za kuongeza na kuziweka pamoja. Wanaweza kuunda kitu cha picha. Wanaweza kuwa na baadhi ya picha za maua wanazoziweka pamoja, au watu au vyura au kitu ambacho ni rahisi kuhusisha nacho na rahisi kuelekeza kuliko nambari tu.”

CPA kwa hivyo hutoa njia ya kuelewa hesabu kupitia uwakilishi huu tofauti.

Mara tu watoto wanapoonyesha kwamba wana uelewa thabiti wa hatua halisi na za picha za tatizo la hisabati, basi wanasonga mbele hadi hatua ya kidhahania ya kujifunza.

"Njia ya Hisabati ya Singapore haitegemei kukariri," anasema Dk Lindorff.

Dhana ya 'umahiri'

Nguzo nyingine ya mbinu ya Hisabati ya Singapore ni dhana ya "umahiri" - wazo kwamba kila mwanafunzi darasani anasonga mbele pamoja, kuhakikisha kwamba hakuna anayeachwa nyuma.

Kwa mfano, watoto wanapojifunza mada fulani kama vile kujumlisha, wengine wanaweza kuielewa kwa haraka zaidi kuliko wengine.

Hata hivyo, badala ya kuwahamisha wanafunzi hao kwenye somo tofauti kabisa, wanapewa shughuli za ziada zinazohusiana na mada hiyo hiyo ili kuongeza uelewa wao.

"Hii haimaanishi kwamba kila mtu anapaswa kusimama na kusubiri hadi kila mwanafunzi apate," anasema Dk Lindorff.

"Wazo ni kwamba ikiwa baadhi ya watoto wana uelewa mzuri wa kujumlisha, mwalimu hatawasogeza mbele kwa kutoa badala yake atawapa kitu ambacho kinapanua dhana ya kuongeza zaidi."

Shughuli hizi zinaweza kufanya kazi kwenye nambari kubwa au miundo tofauti.

Kwa hivyo watoto ambao wana ufahamu bora bado watasuluhisha aina sawa ya shida kama darasa lingine lakini watafanya kwa njia tofauti.

Katika Hisabati ya Singapore, ni muhimu kuwaruhusu wanafunzi waone hesabu kuwa muhimu na inayofikika.

"Wazo ni kwamba kila mtu ana uwezo wa kufanya hisabati na kila mtu anapaswa kuwa na ujuzi wa dhana hiyo kwa kiwango fulani," anasema Dk Lindorff.

"Wengine wanaweza kuwa wa haraka zaidi, wengine wanaweza kuwa wa kina kidogo katika kile wanachoelewa ... Mara nyingi tunafikiri kwamba baadhi ya watu wanapata hesabu na wengine hawapati - hiyo sivyo ninaamini kwa ukweli, na hilo si jambo la msingi la Hisabati ya Singapore pia. .”

Hisabati ya Singapore inaweza kufanya kazi mahali pengine?

Mbinu hiyo tayari inatumika katika baadhi ya nchi nyingine, kama vile Marekani, Kanada, Israel, Uingereza na nyingine nyingi.

Lakini Dk Lindorff anaamini kwamba mafanikio ya mbinu ya Hisabati ya Singapore yanahusiana kwa karibu na utamaduni wa elimu, muktadha na historia ya Singapore.

"Sidhani kama unaweza kuchukua mbinu hii na kuibwaga katika nchi zingine," anasema.

"Singapore ina historia ya kuvutia na ya kipekee, na ni sehemu ndogo sana. Kufikiria kuhusu mabadiliko ya elimu nchini Singapore ni tofauti na kufikiria kuhusu mabadiliko nchini Uingereza au Marekani.

Anasema pia kwamba walimu nchini Singapore wana matarajio mazuri zaidi ya kazi na usaidizi bora ikilinganishwa na nchi nyingine na kwamba mtazamo wa watoto wa Singapore kuhusu elimu ya hisabati pia ni sababu muhimu katika mafanikio ya Hisabati ya Singapore.

"Ni nini watu wanafikiri ni faida ya kujifunza hisabati na ni nini maana yake," anauliza.

"Je, ni kutatua maswali kadhaa ya kazi ya nyumbani au ni juu ya kutatua shida katika maisha yao?"

Imetafsiriwa na Yusuf Jumah na kuhaririwa na Ambia Hirsi